નવી દિલ્હી, 27 ફેબ્રુઆરી (હિ.સ.) ચાલુ નાણાકીય વર્ષ 2024-25 ના ત્રીજા ક્વાર્ટર માટે ગ્રોસ ડોમેસ્ટિક પ્રોડક્ટ (જીડીપી) ડેટા આવતીકાલે જાહેર કરવામાં આવશે. ઓક્ટોબર-ડિસેમ્બર ક્વાર્ટરમાં ભારતનો જીડીપી વૃદ્ધિ દર સકારાત્મક રહેવાની ધારણા છે. નિષ્ણાતો માને છે કે ત્રીજા ક્વાર્ટરમાં તે લગભગ 6.3-6.4 ટકાની રેન્જમાં રહી શકે છે.

ગુરુવારે સત્તાવાર સૂત્રોએ જણાવ્યું હતું કે, 31 ડિસેમ્બર, 2024 ના રોજ પૂરા થતા ચાલુ નાણાકીય વર્ષના ત્રીજા ક્વાર્ટર માટે દેશના જીડીપી ડેટા 28 ફેબ્રુઆરીએ સાંજે 4 વાગ્યે જાહેર થવાની સંભાવના છે. આર્થિક નિષ્ણાતો કહે છે કે, સરકારી ખર્ચમાં વધારો થવાને કારણે ઓક્ટોબર-ડિસેમ્બર ક્વાર્ટરમાં દેશનો વૃદ્ધિ જીડીપી દર વધીને 6.3 ટકા થવાની શક્યતા છે.

તે જ સમયે, મોટાભાગની રેટિંગ એજન્સીઓએ ઓક્ટોબર-ડિસેમ્બર ક્વાર્ટરમાં જીડીપી વૃદ્ધિ 6.3-6.5 ટકા રહેવાનો અંદાજ લગાવ્યો છે. ઇન્ડિયા રેટિંગ્સે ચાલુ નાણાકીય વર્ષના ત્રીજા ક્વાર્ટર માટે સૌથી વધુ 6.5 ટકાનો જીડીપી વૃદ્ધિદરનો અંદાજ આપ્યો છે, જ્યારે નોમુરાએ સૌથી ઓછો 5.8 ટકાનો અંદાજ આપ્યો છે. અન્ય અંદાજોમાં, બેંક ઓફ બરોડા અને સ્ટેટ બેંક ઓફ ઈન્ડિયા ત્રીજા ક્વાર્ટરમાં ભારતીય અર્થતંત્ર અનુક્રમે 6.4 ટકા અને 6.2-6.3 ટકાના દરે વૃદ્ધિ પામશે તેવી અપેક્ષા રાખે છે. રેટિંગ એજન્સી આઈસીઆરએ એ 6.4 ટકા જીડીપી વૃદ્ધિની આગાહી કરી છે.

ઉલ્લેખનીય છે કે, ચાલુ નાણાકીય વર્ષના પ્રથમ ત્રિમાસિક ગાળા (એપ્રિલ-જૂન)માં દેશના અર્થતંત્રનો વિકાસ દર 6.7% હતો, પરંતુ સામાન્ય ચૂંટણીઓ અને નબળા વપરાશ માંગને કારણે સરકારના મૂડી ખર્ચમાં ઘટાડો થવાને કારણે, જુલાઈ-સપ્ટેમ્બરના બીજા ત્રિમાસિક ગાળામાં તે ધીમો પડીને 5.4% થઈ ગયો, જે સાત ત્રિમાસિક ગાળામાં સૌથી નીચો છે.

હિન્દુસ્થાન સમાચાર / પ્રજેશ શંકર / મુકુંદ

હિન્દુસ્થાન સમાચાર / ડો.હિતેશ એન.વ્યાસ