રાજકોટ 18 જુલાઈ (હિ.સ.) : રાજકોટ-જેતપુર નેશનલ હાઈવે પર વધતા ટ્રાફિકને નિયંત્રણમાં રાખવા અને અકસ્માતોની ઘટનાઓ ઘટાડવા માટે મહત્વપૂર્ણ પગલા લેવામાં આવ્યા છે. ટ્રાફિક પોલીસ વિભાગ દ્વારા કુલ ૧૬ મહત્વપૂર્ણ સ્થળો પર આશરે ૩૦ જેટલા ટ્રાફિક માર્શલ્સની નિમણૂક કરવામાં આવી છે. ટ્રાફિક માર્શલ્સને ૨૪ કલાક શિફ્ટ પદ્ધતિએ ફરજ બજાવવા માટે નિયુક્ત કરવામાં આવ્યા છે, જેથી કોઈપણ સમયે ટ્રાફિક વ્યવસ્થામાં ખલેલ ન પડે.

મોટાભાગના અકસ્માતો રોંગ સાઈડથી આવતા વાહનોના કારણે થવાના બનાવોને ધ્યાનમાં રાખીને આ નિર્ણય લેવામાં આવ્યો છે. ટ્રાફિક માર્શલ્સનું મુખ્ય કાર્ય માર્ગ પર ટ્રાફિકનું યોગ્ય સંચાલન કરવું, રોંગ સાઈડમાંથી આવતા વાહનચાલકોને અટકાવવું અને જરૂર પડ્યે દંડની કાર્યવાહી કરવી છે. ઉપરાંત, યાત્રીઓ અને વાહનચાલકોને ટ્રાફિક નિયમો વિશે સમજ આપી સુરક્ષા અંગે જાગૃત કરવાનો પણ આ માર્શલ્સને જવાબદાર બનાવવામાં આવ્યા છે.

રાજકોટ શહેરથી લઈને જેટપુર સુધીના હાઈવેના સૌથી વધુ અકસ્માતપ્રવણ વિસ્તારો અને મુખ્ય જંકશન પર માર્શલ્સ તૈનાત કરવામાં આવ્યા છે. નક્કી કરાયેલ શિફ્ટ મુજબ દિવસ-રાત સતત મોનિટરિંગ ચાલુ રાખીને વાહનવ્યવહાર સરળ બને તેમજ અકસ્માતોની સંભાવના ઓછી થાય તે દિશાએ કામગીરી હાથ ધરાઈ છે.આ ઉપરાંત, ટ્રાફિક માર્શલ્સના કામકાજની નિયમિત સમીક્ષા પણ કરવામાં આવી રહી છે, જેથી તેમની કામગીરીમાં ગુણવત્તા જળવાઈ રહે. આ વ્યવસ્થા અમલમાં આવ્યા બાદ લોકોને ટ્રાફિક નિયમોનું પાલન કરાવવા તથા સુરક્ષિત મુસાફરી સુનિશ્ચિત કરવામાં મોટો સહારો મળી રહ્યો છે.

---------------

હિન્દુસ્થાન સમાચાર / Gondaliya Abhishek