પાટણ, 5 ઓગસ્ટ (હિ.સ.)રાધનપુર પોલીસ સ્ટેશન વિસ્તારના બંધવડ ખાતે આવેલા સોલાર પ્લાન્ટમાંથી કોપર વાયરની ચોરીના કેસમાં એલસીબી પાટણે મહત્વની સફળતા મેળવી છે. પોલીસે ૧૧૦ કિલોગ્રામ કોપર વાયર, અંદાજિત કિંમત રૂ. ૧,૧૦,૦૦૦ સાથે બે આરોપીઓને ઝડપી લીધા છે. પકડાયેલા બંને આરોપીઓ રાજેશભાઈ ગાંડાભાઈ ઠાકોર (ઉ.૩૦) અને ચમનભાઈ સોનાભાઈ ઠાકોર (ઉ.૩૫), બંને રહે. સુલતાનપુરા, રાધનપુરના નિવાસી છે.

પાટણ એસપીની સૂચના અનુસાર મિલકત સંબંધિત ગુનાઓ સામે પગલાં લેવા એલસીબી પાટણના પોલીસ ઇન્સ્પેક્ટર આર.જી. ઉનાગરના માર્ગદર્શન હેઠળ ટીમે રાધનપુર વિસ્તારમાં પેટ્રોલિંગ દરમિયાન મળેલી ખાનગી માહિતીના આધારે બાવડોની ઝાડીઓમાંથી તપાસ કરતાં ચોરીનો મુદ્દામાલ મળ્યો હતો. પૂછપરછ દરમિયાન આરોપીઓએ કબૂલાત આપી કે ૧૦ દિવસ પહેલા બંધવડ-અરજસણ રોડ પરના સોલાર પ્લાન્ટમાંથી વાયર ચોરી કર્યો હતો.

આ મામલે રાધનપુર પોલીસ સ્ટેશનમાં IPC 2023ની કલમ ૩૦૩(૨) મુજબ ગુનો નોંધવામાં આવ્યો હતો. સાથે જ ભારતીય નાગરિક સુરક્ષા સંહિતા અધિનિયમ-2023ની કલમ ૩૫(૧)(ઈ) અને ૧૦૬ મુજબ આગળની કાર્યવાહી કરવામાં આવી. એલસીબી પાટણની કામગીરીથી વણઉકેલાયેલ ચોરીના ગુનામાં ભેદ ઉકેલાયો છે અને આરોપીઓને કાયદેસરની કાર્યવાહી માટે રાધનપુર પોલીસના હવાલે કરવામાં આવ્યા છે.

હિન્દુસ્થાન સમાચાર / પરમાર હાર્દિકકુમાર