વડોદરા, 6 ઓગસ્ટ (હિ.સ.): વડોદરા મ્યુનિસિપલ કમિશનર હાલમાં એક્શન મોડમાં કાર્યરત રહી શહેરના વિવિધ વિકાસ કાર્યોની જાતે જ મુલાકાત લઈ નિરીક્ષણ કરી રહ્યા છે. શહેરમાં ચાલતી મોટી પ્રોજેક્ટ્સની કામગીરી સમયસર અને ગુણવત્તાસભર રીતે પૂર્ણ થાય તે માટે તેઓ સતત મેદાને હાજરી આપી માર્ગદર્શન આપી રહ્યા છે. આજ રોજ તેઓ વડોદરામાં ચાલી રહેલી બુલેટ ટ્રેન પ્રોજેક્ટના કાર્યસ્થળે પહોંચ્યા હતા.

બુલેટ ટ્રેન પ્રોજેક્ટ, જે ભારતના સૌથી મહત્વાકાંક્ષી ઈન્ફ્રાસ્ટ્રક્ચર પ્રોજેક્ટ્સમાંનો એક છે, વડોદરા શહેરમાંથી પસાર થાય છે અને અહીં અનેક મહત્વપૂર્ણ બાંધકામ કાર્યો ચાલી રહ્યા છે. કમિશનરે સ્થળ પર હાજર રહી કામની પ્રગતિ, સલામતીના ધોરણો, મશીનરીની કાર્યક્ષમતા તથા મજૂરોને આપવામાં આવતી સુવિધાઓની સમીક્ષા કરી. કાર્યસ્થળે ઈજનેરો અને પ્રોજેક્ટ ટીમ સાથે બેઠક કરીને તેમણે સમયમર્યાદા, કાર્યની ગુણવત્તા અને શહેરના ટ્રાફિક પર પડતા પ્રભાવ વિશે વિગતવાર ચર્ચા કરી.

તેમણે સ્પષ્ટ સૂચના આપી કે બુલેટ ટ્રેનનું કામ શહેરના વિકાસ માટે ઐતિહાસિક છે, તેથી તેની ગુણવત્તામાં કોઈ પ્રકારનો સમાધાન ન થાય. સાથે સાથે આસપાસના વિસ્તારોમાં ધૂળ પ્રદૂષણ, અવાજ પ્રદૂષણ અને ટ્રાફિક વ્યવસ્થાને ઓછામાં ઓછું અસર થાય તે માટે જરૂરી પગલાં લેવા પર ભાર મૂક્યો.

કમિશનરએ નાગરિકોને વિશ્વાસ અપાવ્યો કે બુલેટ ટ્રેન પ્રોજેક્ટના પૂર્ણ થવાથી વડોદરાની કનેક્ટિવિટી, વેપાર અને રોજગારીની તકોમાં અભૂતપૂર્વ વૃદ્ધિ થશે. તેઓએ શહેરના અન્ય ચાલી રહેલા પ્રોજેક્ટ્સ અંગે પણ ટૂંક સમયમાં મેદાન મુલાકાત લેવાની વાત કરી. વડોદરાવાસીઓમાં તેમના આ સક્રિય અભિગમને લઈને પ્રશંસા વ્યક્ત થઈ રહી છે, કારણ કે તે શહેરના વિકાસ માટે એક મજબૂત સંકલ્પના નિશાની છે.

---------------

હિન્દુસ્થાન સમાચાર / Dhruvik Gondaliya