નવી દિલ્હી, 20 મે (હિ.સ.). પ્રધાનમંત્રી નરેન્દ્ર મોદીએ આદર્શ જીવન મૂલ્યો અને શાસ્ત્રો પર આધારિત આચરણના મહત્વ પર ભાર મૂકતા કહ્યું કે, સુવ્યવસ્થિત ધોરણોથી માર્ગદર્શિત માનવ વ્યવહાર વ્યક્તિ અને સમાજ બંનેને પ્રકાશિત કરે છે.

પ્રધાનમંત્રી મોદીએ સોશિયલ મીડિયા પ્લેટફોર્મ 'એક્સ' પર એક સંસ્કૃત સુભાષિત શેર કરતાં લખ્યું:

“तस्माच्छास्त्रं प्रमाणं ते कार्याकार्यव्यवस्थितौ।

ज्ञात्वा शास्त्रविधानोक्तं कर्म कर्तुमिहार्हसि।।

આ શ્લોકનો અર્થ સમજાવતા તેમણે કહ્યું કે, વ્યક્તિએ શું કરવું જોઈએ અને શું ન કરવું જોઈએ, તે નક્કી કરવા માટે શાસ્ત્રોને માર્ગદર્શક માનવા જોઈએ. શાસ્ત્રોમાં દર્શાવેલા નિયમો અને સિદ્ધાંતોને સમજીને જ મનુષ્યે પોતાના કર્મ કરવા જોઈએ.

પ્રધાનમંત્રીએ કહ્યું કે, ધાર્મિક અને નૈતિક આચરણ એક દીવા સમાન હોય છે, જે માત્ર વ્યક્તિના જીવનને જ નહીં પરંતુ સમગ્ર સમાજને પણ દિશા અને પ્રકાશ આપે છે. તેમણે ઉમેર્યું કે, જ્યારે વ્યક્તિ સ્થાપિત મૂલ્યો અને આદર્શો અનુસાર જીવન જીવે છે, ત્યારે તેનું આચરણ સંતુલિત, સ્વીકાર્ય અને સમાજ માટે ઉપયોગી બને છે.

તેમણે કહ્યું કે, આજે દેશવાસીઓ સંયમ, દૃઢતા અને કર્તવ્યનિષ્ઠા સાથે રાષ્ટ્ર નિર્માણમાં સક્રિય ભૂમિકા ભજવી રહ્યા છે. આ ભારતીય જીવનમૂલ્યો અને આદર્શ આચરણનું જીવંત ઉદાહરણ છે.

પ્રધાનમંત્રી મોદીએ જણાવ્યું હતું કે, શ્રેષ્ઠ આચરણ એ જ છે, જે વ્યક્તિની સાથે સાથે સમગ્ર સમાજને હકારાત્મક દિશા આપવાનું કાર્ય કરે. તેમણે દેશવાસીઓને નૈતિક મૂલ્યો અને કર્તવ્યપરાયણતાને જીવનનો આધાર બનાવવાનું આહ્વાન પણ કર્યું હતું.

હિન્દુસ્થાન સમાચાર / માધવી ત્રિપાઠી / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ