નવી દિલ્હી, 21 મે (હિ.સ.) : કેન્દ્ર સરકારે દેશમાં ઝડપથી વિકસતા સૌંદર્ય ઇન્જેક્શન અને વૃદ્ધત્વ વિરોધી સારવારો પર કડક વલણ અપનાવ્યું છે. કેન્દ્રીય આરોગ્ય મંત્રાલય હેઠળની સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઇઝેશન (સી. ડી. એસ. સી. ઓ.) એ આ સંબંધમાં જાહેર જનતાને ચેતવણી આપતી નોટિસ બહાર પાડી છે. સંસ્થાએ સ્પષ્ટતા કરી છે કે ઈન્જેક્શન દ્વારા કોઈ કોસ્મેટિક પ્રોડક્ટનો ઉપયોગ કરી શકાતો નથી.

સંસ્થા અનુસાર, સૌંદર્ય પ્રસાધનો માત્ર બાહ્ય ઉપયોગ માટે છે અને તેમને શરીરમાં દાખલ કરવું નિયમોની વિરુદ્ધ છે.

આ નોટિસ સંસ્થાના ડ્રગ કંટ્રોલર જનરલ ડૉ. રાજીવ રઘુવંશી દ્વારા જારી કરવામાં આવી છે. ત્વચાને સફેદ કરવા, વૃદ્ધત્વ વિરોધી અને ગ્લુટાથિઓન જેવા સૌંદર્ય ઇન્જેક્શનને કોસ્મેટિક ઉત્પાદનો તરીકે વેચવાની અથવા પ્રોત્સાહન આપવાની મંજૂરી નથી, એમ નોટિસમાં જણાવવામાં આવ્યું છે.

સંસ્થા અનુસાર, ડ્રગ્સ એન્ડ કોસ્મેટિક્સ એક્ટ, 1940 અને કોસ્મેટિક્સ રૂલ્સ, 2020 હેઠળ, કોસ્મેટિક ઉત્પાદનોનો ઉપયોગ માત્ર ત્વચા, વાળ, નખ અથવા બાહ્ય અવયવોને લગાવવા, છંટકાવ કરવા અથવા સાફ કરવાના હેતુથી કરી શકાય છે. વૃદ્ધત્વ વિરોધી ઇન્જેક્શનનો ઉપયોગ આ અધિનિયમમાં આવરી લેવામાં આવ્યો નથી. આરોગ્ય મંત્રાલયે સૌંદર્ય ક્લિનિક્સ, સૌંદર્ય કેન્દ્રો અને તબીબી વ્યાવસાયિકોને પણ નિયમોનું પાલન કરવાનો નિર્દેશ આપ્યો છે.

હિન્દુસ્થાન સમાચાર/વિજયલક્ષ્મી/મુકુંદ

હિન્દુસ્થાન સમાચાર / હર્ષ શાહ