નવી દિલ્હી, 22 મે (હિ.સ.) : પ્રધાનમંત્રી નરેન્દ્ર મોદીએ શુક્રવારે જણાવ્યું હતું કે, ભારત અને સાયપ્રસ વચ્ચે વધતા વિશ્વાસ અને ભારત-યુરોપિયન યુનિયન મુક્ત વેપાર સમજૂતી (એફટીએ) થી નવી શક્યતાઓ ઉભરી આવી છે અને બંને દેશો આગામી પાંચ વર્ષમાં સાયપ્રસથી ભારતમાં રોકાણને બમણા કરવાના લક્ષ્ય સાથે આગળ વધશે.

સાયપ્રસના રાષ્ટ્રપતિ નિકોસ ક્રિસ્ટોડોલિડ્સ સાથે વાતચીત કર્યા પછી એક સંયુક્ત પ્રેસ નિવેદનમાં પ્રધાનમંત્રી મોદીએ કહ્યું કે આજે ભારત અને સાયપ્રસે તેમના વિશ્વસનીય સંબંધોને વ્યૂહાત્મક ભાગીદારીના સ્તરે લઈ જવાનો નિર્ણય લીધો છે, જે દ્વિપક્ષીય સંબંધોને નવી ગતિ અને નવું પરિમાણ આપશે.

પ્રધાનમંત્રીએ જણાવ્યું હતું કે, ભારત અને સાયપ્રસ વચ્ચેની મિત્રતા મજબૂત અને ભવિષ્યલક્ષી છે. લોકશાહી, કાયદાના શાસન અને તમામ દેશોની સાર્વભૌમત્વ અને પ્રાદેશિક અખંડિતતા માટે આદર જેવા સહિયારા મૂલ્યો બંને દેશો વચ્ચેની ભાગીદારીનો પાયો છે.

તેમણે કહ્યું હતું કે, ભારત આ સિદ્ધાંતો માટે સંપૂર્ણપણે પ્રતિબદ્ધ છે અને આગળ પણ ચાલુ રાખશે.

પ્રધાનમંત્રીએ જણાવ્યું હતું કે, છેલ્લા દાયકામાં સાયપ્રસથી ભારતમાં થયેલું રોકાણ લગભગ બમણું થયું છે, જે બંને દેશો વચ્ચે વધેલા વિશ્વાસનું પ્રતીક છે. તેમણે કહ્યું હતું કે, ભારત-યુરોપિયન યુનિયન મુક્ત વેપાર સમજૂતીએ નવી આર્થિક તકોનું સર્જન કર્યું છે અને આ તકોનો લાભ ઉઠાવીને બંને દેશો આગામી પાંચ વર્ષમાં ફરીથી રોકાણને બમણું કરવાના લક્ષ્ય સાથે આગળ વધશે.

પ્રધાનમંત્રીએ જણાવ્યું હતું કે, ભારત-સાયપ્રસના સંબંધો સમયાંતરે કસોટી પર ખરા ઉતર્યા છે અને વ્યૂહાત્મક ભાગીદારીની રચના આ સંબંધોને નવી મહત્વાકાંક્ષા અને નવી ગતિ આપશે.

તેમણે કહ્યું કે બંને દેશો સંબંધોને વધુ મજબૂત કરવા માટે સ્થળાંતર અને ગતિશીલતા સમજૂતી અને સામાજિક સુરક્ષા સમજૂતી પર સંમત થયા છે. આ ઉપરાંત ઉચ્ચ શિક્ષણ અને સંસ્કૃતિના ક્ષેત્રમાં પણ સમજૂતીઓ પર હસ્તાક્ષર થઈ રહ્યા છે.

પ્રધાનમંત્રીએ કહ્યું હતું કે, ભારત-યુરોપના સંબંધો નવા સુવર્ણ યુગમાં પ્રવેશી રહ્યા છે. એવા સમયે જ્યારે સાયપ્રસ યુરોપિયન યુનિયન કાઉન્સિલની અધ્યક્ષતા ધરાવે છે, ત્યારે તે ભારત અને સમગ્ર યુરોપ વચ્ચે એક મહત્વપૂર્ણ રોકાણ પ્રવેશદ્વાર તરીકે ઉભરી રહ્યું છે.

વૈશ્વિક મુદ્દાઓ પર ચર્ચાનો ઉલ્લેખ કરતા પ્રધાનમંત્રીએ કહ્યું કે, પછી તે યુક્રેન હોય કે પશ્ચિમ એશિયા, ભારત સંઘર્ષોનો વહેલી તકે અંત લાવવા અને શાંતિ સ્થાપિત કરવાના પ્રયાસોને સમર્થન આપવાનું ચાલુ રાખશે. તેમણે ઉમેર્યું હતું કે, વધતા જતા વૈશ્વિક પડકારોનો સામનો કરવા માટે વૈશ્વિક સંસ્થાઓમાં ઝડપી અને નોંધપાત્ર સુધારા પણ જરૂરી છે.

હિન્દુસ્થાન સમાચાર/સુશીલ કુમાર/અનુપ શર્મા

હિન્દુસ્થાન સમાચાર / હર્ષ શાહ