નવી દિલ્હી, 23 જૂન (હિ.સ.) બુધવારે આવેલ જોરદાર ઘટાડા બાદ, ફરી એકવાર ભારતીય શેરબજારમાં તેજી જોવા મળી રહી છે. સેન્સેક્સ અને નિફ્ટી બંને સૂચકાંકો સતત ખરીદીના ટેકાથી, તેજીનું વલણ બનેલું જોવા મળી રહ્યું છે. અત્યાર સુધી શેરબજારમાં 1 ટકાથી વધુના વધારા સાથે ટ્રેડિંગ જોવા મળી રહ્યું છે.

ટ્રેડિંગના શરૂઆતના ૧ કલાકમાં હીરો મોટોકોર્પ, આયશર મોટર્સ, મારુતિ સુઝુકી, આઈસીઆઈસીઆઈ બેંક અને ભારતી એરટેલના શેર સ્થિર વલણ જાળવી રહ્યા છે. બીજી તરફ એપોલો હોસ્પિટલ્સ, ટાઇટન કંપની, પાવર ગ્રીડ કોર્પોરેશન અને ઓએનજીસીના શેરો વેચવાલી દબાણ હેઠળ ઘટાડા સાથે ટ્રેડ થતા જોવા મળી રહ્યા છે. શરૂઆતના વેપારમાં સૌથી વધુ ખરીદ-વેચાણ ટીસીએસના શેરમાં જોવા મળે છે. જેમાં અત્યાર સુધીમાં રૂ. 500 કરોડની ડીલ થઈ છે. એ જ રીતે, રિલાયન્સ ઇન્ડસ્ટ્રીઝના શેર પણ અત્યાર સુધીમાં રૂ. 466 કરોડમાં ખરીદ્યા અને વેચાયા છે.

બોમ્બે સ્ટોક એક્સચેન્જ (બીએસઈ) સેન્સેક્સ આજે 150.22 પોઈન્ટના વધારા સાથે 51,972.75 પોઈન્ટ પર ખુલ્યો હતો. કારોબાર શરૂ થતાની સાથે જ બજારમાં ચોતરફ ખરીદી શરૂ થઈ ગઈ હતી. જેના કારણે સેન્સેક્સ ઝડપથી આગળ વધવા લાગ્યો. ટ્રેડિંગના પ્રથમ અડધા કલાકમાં સતત ખરીદીના સમર્થનથી સેન્સેક્સ 547.30 પોઈન્ટ ઉછળીને 52,369.83 પોઈન્ટની સપાટીએ પહોંચ્યો હતો.

સેન્સેક્સની જેમ જ નેશનલ સ્ટોક એક્સચેન્જ (એનએસઈ)ના નિફ્ટીએ પણ આજે 15,451.55 પોઈન્ટના સ્તરથી 38.25 પોઈન્ટના વધારા સાથે ટ્રેડિંગ શરૂ કર્યું હતું. બજારમાં સતત ખરીદીના સમર્થનથી નિફ્ટીએ પણ કારોબાર શરૂ થતાની સાથે જ તેજીનો માર્ગ અપનાવ્યો હતો. સતત ખરીદીના સમર્થનથી, નિફ્ટી ટ્રેડિંગના પ્રથમ અડધા કલાકમાં 164.65 પોઇન્ટ વધીને 15,577.95 પોઇન્ટની સપાટીએ પહોંચ્યો હતો.

આજે, મિશ્ર વૈશ્વિક સંકેતો વચ્ચે શેરબજારે પ્રી-ઓપનિંગ સેશનમાં મિશ્ર કારોબારની શરૂઆત કરી હતી. આ સત્રમાં બીએસઈ સેન્સેક્સ 142.26 પોઈન્ટ એટલે કે, 0.27 ટકા વધીને 51,964.79 પોઈન્ટના સ્તરે હતો. બીજી તરફ, પ્રિ-ઓપનિંગ સેશનમાં નિફ્ટી 93 પોઈન્ટની નબળાઈ સાથે 15,320.30 પોઈન્ટની સપાટીએ પહોંચી ગયો હતો.

હિન્દુસ્થાન સમાચાર / યોગિતા / માધવી