અમદાવાદ, 14 નવેમ્બર (હિ.સ.) : દેશની પ્રથમ ‘સ્લીપર વંદે ભારત ટ્રેન’ અમદાવાદ થી 130ની મુંબઈ સેન્ટ્રલ પહોંચી. દેશની પ્રથમ ‘સ્લીપર વંદે ભારત ટ્રેન’નું ટ્રાયલ આજે અમદાવાદથી મુંબઈની વચ્ચે કરવામાં આવ્યું હતું. સવારે અમદાવાદથી 130ની સ્પીડે સ્લીપર વંદે ભારત ટ્રેન નીકળી હતી, જેમાં રસ્તામાં આવતા વડોદરા, સુરત સહિતના સ્ટેશન પર માત્ર તેની એક ઝલક જોવા મળી હતી. દેશની પહેલી નોનસ્ટોપ ‘સ્લીપર વંદે ભારત ટ્રેન’નું બીજુ ટ્રાયલ સફળ રહ્યું છે. આ ટ્રેનમાં 16 કોચ છે, જેના રેકમાં ફેરફાર કરાયેલી બોગીઓ છે. વંદે ભારત ટ્રેનથી પણ વધુ અધ્યતન સુવિધાઓ સ્લીપર વંદે ભારે ટ્રેનમાં કરવામાં આવી છે. આ ટ્રેન શરૂ થતાં હવે માત્ર 5 કલાકમાં જ અમદાવાદથી મુંબઈ પહોંચી શકાશે.

પશ્ચિમ રેલવે પાસેથી મળતી માહિતી પ્રમાણે, ગત 11 નવેમ્બરના રોજ સ્લીપર વંદે ભારત ટ્રેનના રેક અમદાવાદ આવવા માટે રવાના થયા હતા. 13 નવેમ્બરના રોજ અમદાવાદ ખાતેના સાબરમતી યાર્ડ ખાતે સ્લીપર વંદે ભારત ટ્રેનના રેક આવી ગયા હતા. ત્યારબાદ તેમાં જરૂરી ટેકનિકલ તપાસ કરવામાં આવી હતી. આ સાથે આરડીએસઓની ટીમે ઇન્સ્ટ્રુમેન્ટ ટેન્શન અને સલામતીની તપાસ શરૂ કરી દીધી હતી.

આજરોજ 14 નવેમ્બર સવારે 9:00 વાગ્યે દેશની પ્રથમ સ્લીપર વંદે ભારત ટ્રેનનું ટ્રાયલ શરૂ કરવામાં આવ્યું હતું. અમદાવાદથી 130ની સ્પીડે મુંબઈ સેન્ટ્રલ સુધીનું ટ્રાયલ હાથ ધરવામાં આવ્યું હતું. સ્લીપર વંદે ભારત ટ્રેન 15 નવેમ્બર અથવા 16 નવેમ્બરના રોજ મુંબઈથી પરત અમદાવાદ આવશે. અમદાવાદથી ઉપડેલી સ્લીપર વંદે ભારત ટ્રેન 130ની સ્પીડે વડોદરા, સુરત અને ત્યારબાદ મુંબઈ સેન્ટ્રલ પહોંચી હતી.

આ ટ્રાયલ દરમિયાન પશ્ચિમ રેલવેના વિવિધ વિભાગો, મિકેનિકલ, ઇલેક્ટ્રિકલ, સિગ્નલ અને ટેલીકોમ્યુનિકેશન સહિતના વિભાગો દ્વારા ટ્રાયલમાં કામગીરી કરવામાં આવી હતી. આ ટ્રાયલ દરમિયાન ડેટા રેકોર્ડિંગ, સેન્સર અને સલામતીના ઉપકરણોનું પરીક્ષણ કરવામાં આવ્યું છે. આ સાથે જ આર.ડી.એસ.ઓ અને આઈ.સી.એફ.ની સંયુક્ત ટીમને સમગ્ર રૂટ પર ગતિ, સ્થિરતા અને સલામતીના ધોરણોનું નિરીક્ષણ કર્યું છે. અમદાવાદથી મુંબઈ સુધીનું દેશની પ્રથમ સ્લીપર વંદે ભારત ટ્રેનનું બીજુ ટ્રાયલ પણ સફળ રહ્યું છે.વંદે ભારત સ્લીપર ટ્રેનમાં 16 કોચ છે. તેમાં 11 3-AC, 4 2-AC અને એક 1-AC કોચનો સમાવેશ થાય છે.

પશ્ચિમ રેલવેના સી.પી.આર.ઓ. વિનીત અભિષેકે જણાવ્યું હતું કે, આ ટ્રાયલ દરમિયાન અલગ-અલગ 50 જેટલા અલગ-અલગ મુદ્દા ઉપર ધ્યાન રાખવામાં આવતું હોય છે. જેમાં ખાસ ડેટા રેકોર્ડિંગ, સેન્સર અને સલામતીના ઉપકરણો હોય છે, તેના પર વધુ ધ્યાન આપવામાં આવતું હોય છે. આ ટ્રાયલ જે રેક છે, તેની સલામતી સહિતના તમામ મુદ્દા ઉપર જો કોઈ ખામી હોય તો તેને સુધારો કરવા માટે કરવામાં આવતો હોય છે.

દેશની પ્રથમ સ્લીપર વંદે ભારત ટ્રેન કયા રૂટ પર ચાલશે તે હજુ નક્કી થયું નથી. અઠવાડિયા પહેલા સ્લીપર વંદે ભારત ટ્રેનના પહેલા રેકનો ટ્રાયલ સવાઈ માધવપુર-કોટા-નાગડા સેક્શન વચ્ચે કરવામાં આવ્યું હતું. જેમાં સ્લીપર વંદે ભારત ટ્રેનની સ્પીડ 180 સુધી લઈ જવામાં આવી હતી અને આ ટ્રાયલ પણ સફળ રહ્યું હતું. ત્યારે આજે સ્લીપર વંદે ભારત ટ્રેનના બીજા રેકનો ટ્રાયલ અમદાવાદથી મુંબઈની વચ્ચે 130ની સ્પીડે કરવામાં આવ્યો છે.

હિન્દુસ્થાન સમાચાર / હર્ષ શાહ