વેલિંગ્ટન, નવી દિલ્હી, 11 મે (હિ.સ.)। ન્યુઝીલેન્ડ ક્રિકેટની નવી પુરુષ અને મહિલા ટી-20 લીગ ‘એનઝેડ-20’ની શરૂઆત લંબાવવામાં આવી છે. અગાઉ આ લીગની શરૂઆત જાન્યુઆરી 2027માં પ્રસ્તાવિત હતી, પરંતુ હવે તે ડિસેમ્બર 2027માં શરૂ થવાની શક્યતા છે.

સોમવારે જારી કરાયેલા એક નિવેદનમાં ન્યુઝીલેન્ડ ક્રિકેટ બોર્ડે જણાવ્યું હતું કે, લીગની સ્થાપના અને લાઈસન્સ પ્રક્રિયાને લઈને તમામ પક્ષો સાથે સકારાત્મક વાતચીત ચાલી રહી છે. જોકે, બોર્ડે સ્વીકાર્યું હતું કે, સ્પર્ધાને મજબૂત અને સફળ બનાવવા માટે હજુ વધુ સમયની જરૂર છે.

ન્યુઝીલેન્ડ ક્રિકેટ બોર્ડના અધ્યક્ષ ડાયના પુકેતાપુ-લિન્ડને જણાવ્યું હતું કે, “અમે ઈચ્છીએ છીએ કે ન્યુઝીલેન્ડમાં ઘરેલું ટી20 ક્રિકેટનું ભવિષ્ય ટકાઉ, સ્પર્ધાત્મક અને વૈશ્વિક ક્રિકેટને અનુરૂપ હોય. એનઝેડ-20 સાથે અમારી વાતચીત સકારાત્મક રહી છે, પરંતુ લીગને લાંબા ગાળાની સફળતા અપાવવા માટે વધારાનો સમય જરૂરી છે.”

તેમણે જણાવ્યું હતું કે, જાન્યુઆરી અને ફેબ્રુઆરી 2027માં ઓસ્ટ્રેલિયા અને શ્રીલંકા સામે અગાઉથી નિર્ધારિત ટેસ્ટ શ્રેણીઓને કારણે કાર્યક્રમ ઘણો વ્યસ્ત છે, જેના કારણે લીગ માટે પૂરતો સમય મળી શક્યો ન હતો.

ન્યુઝીલેન્ડ ક્રિકેટ બોર્ડે સ્પષ્ટતા કરી છે કે, 2026-27 સીઝનમાં સુપર સ્મેશ સ્પર્ધા ચાલુ રહેશે. આ સાથે ભારત અને શ્રીલંકાની પુરુષ ટીમો અને બાંગ્લાદેશની મહિલા ટીમના ન્યુઝીલેન્ડ પ્રવાસ પણ નિર્ધારિત કાર્યક્રમ મુજબ યોજાશે.

એનઝેડ-20 સ્થાપના સમિતિના અધ્યક્ષ ડોન મેકિનને જણાવ્યું હતું કે, લીગને ઉતાવળમાં શરૂ કરવાને બદલે વિશ્વસ્તરીય બનાવવી એ અમારી પ્રાથમિકતા છે.

તેમણે કહ્યું, “અમે ઈચ્છીએ છીએ કે એનઝેડ-20 કોઈપણ બાંધછોડ વગર શરૂ થાય અને પહેલા દિવસથી જ લાંબા ગાળાની સફળતા માટે સજ્જ હોય. એ પણ જરૂરી છે કે આ સ્પર્ધા આંતરરાષ્ટ્રીય ક્રિકેટ સાથે તાલમેલ સાધીને ચાલે, નહીં કે તેની વિરુદ્ધ.”

મેકિનને જણાવ્યું હતું કે, ન્યુઝીલેન્ડ અને વિદેશના રોકાણકારોનો રસ સતત વધી રહ્યો છે. આ જ કારણ છે કે હવે લીગના મુખ્ય રોકાણ ભાગીદારો અને વિવિધ ફ્રેન્ચાઈઝી માલિકોની પસંદગી માટે સ્પર્ધાત્મક પ્રક્રિયા શરૂ કરવામાં આવશે.

તેમણે એમ પણ કહ્યું કે, વધારાનો સમય મળવાથી ફ્રેન્ચાઈઝીના શહેરો અને પ્રાદેશિક ઓળખને અંતિમ સ્વરૂપ આપવામાં મદદ મળશે, જેથી લીગ સમગ્ર દેશમાં મજબૂત પાયો બનાવી શકે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ