છિંદવાડા, નવી દિલ્હી, 10 ઓક્ટોબર (હિ.સ.) મધ્યપ્રદેશમાં કોલ્ડરિફ કફ સિરપથી થતા કિડનીના ચેપથી અત્યાર સુધીમાં 23 બાળકોના મૃત્યુ થયા છે. આ કેસમાં, મધ્યપ્રદેશ સ્પેશિયલ ઇન્વેસ્ટિગેશન ટીમ (એસઆઈટી) કોલ્ડરિફ કફ સિરપ બનાવતી તમિલનાડુ સ્થિત કંપની શ્રીસન ફાર્માસ્યુટિકલ્સના માલિક જી. રંગનાથનને ચેન્નાઈથી ટ્રાન્ઝિટ રિમાન્ડ પર છિંદવાડા લાવી છે. તેમને શુક્રવારે પારસિયા કોર્ટમાં રજૂ કરવામાં આવનાર છે. સ્થાનિક પોલીસ કોર્ટ પરિસરની આસપાસ બંદોબસ્ત ગોઠવી રહી છે.

હકીકતમાં, કોલ્ડરિફ કફ સિરપના સેવનને કારણે છેલ્લા એક મહિનાથી મધ્યપ્રદેશમાં બાળકો સતત મૃત્યુ પામી રહ્યા છે. ગુરુવારે બપોરે વધુ એક બાળકનું મૃત્યુ થયું. છિંદવાડાના મોરડોગરી પારસિયાના રહેવાસી બાબુ પવારના પુત્ર ગાર્વિક (1 વર્ષ)નું નાગપુર મેડિકલ કોલેજમાં સારવાર દરમિયાન મૃત્યુ થયું. આ સાથે, રાજ્યમાં કફ સિરપના સેવનથી મૃત્યુ પામેલા બાળકોની કુલ સંખ્યા 23 પર પહોંચી ગઈ છે.

બાળકોના મૃત્યુ બાદ, 5 ઓક્ટોબરે પારસિયા પોલીસ સ્ટેશનમાં કોલ્ડ્રિફ કફ સિરપ બનાવતી કંપની શ્રીસન ફાર્માના માલિક ગોવિંદન રંગનાથન વિરુદ્ધ એફઆઈઆર નોંધવામાં આવી હતી. મધ્યપ્રદેશ સરકારે આ કેસની તપાસ માટે એસઆઈટી ની રચના કરી હતી. એસઆઈટી ટીમ બુધવારે ચેન્નાઈ પહોંચી હતી અને તે રાત્રે રંગનાથનની ધરપકડ કરી હતી. ગુરુવારે, એસઆઈટી એ રંગનાથનને સ્થાનિક કોર્ટમાં રજૂ કરીને ટ્રાન્ઝિટ રિમાન્ડની માંગણી કરી હતી.

કોર્ટમાંથી ટ્રાન્ઝિટ રિમાન્ડ મેળવ્યા બાદ, એસઆઈટી ટીમ ગુરુવારે રાત્રે ચેન્નાઈથી રંગનાથનને ઉપાડી ગઈ હતી અને શુક્રવારે સવારે 6 વાગ્યાની આસપાસ નાગપુર પહોંચી હતી. ત્યારબાદ રંગનાથનને નાગપુરથી છિંદવાડા લાવવામાં આવ્યો હતો. ટીમ સવારે 10 વાગ્યાની આસપાસ રંગનાથન સાથે છિંદવાડા પહોંચી હતી અને ત્યાંથી સીધી પારસિયા કોર્ટમાં ગઈ હતી.

હિન્દુસ્થાન સમાચાર / મુકેશ તોમર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ