ઇટાનગર, નવી દિલ્હી, 19 ઓક્ટોબર (હિ.સ.): આસામ રાઇફલ્સની ખોંસા બટાલિયને, અરુણાચલ પ્રદેશના તિરાપ જિલ્લામાં નેશનલ સોશિયાલિસ્ટ કાઉન્સિલ ઓફ નાગાલેન્ડ-ખાપલાંગ (એનએસસીએન-કે) જૂથના સશસ્ત્ર આતંકવાદીઓ દ્વારા અપહરણ કરાયેલા બે કામદારોને લગભગ 12 કલાકમાં કોઈ જાનહાનિ વિના છોડાવ્યા.

રવિવારે રાજ્ય પોલીસ મુખ્યાલયના સૂત્રોના જણાવ્યા અનુસાર, તિરાપ જિલ્લાના દાદમ સર્કલના લાહુ ગામમાં રોડ બાંધકામ પ્રોજેક્ટમાં રોકાયેલા શ્રી અગ્રવાલ કન્સ્ટ્રક્શન કંપનીના બે કામદારોનું શનિવારે સાંજે લગભગ 4:00 વાગ્યે આશરે સાતથી આઠ સશસ્ત્ર એનએસસીએન-કે, આતંકવાદીઓના જૂથ દ્વારા અપહરણ કરવામાં આવ્યું હતું. વિશ્વસનીય ગુપ્ત માહિતીના આધારે, આસામ રાઇફલ્સની ખોંસા બટાલિયને લોંગડિંગ પોલીસ સાથે મળીને ગઈકાલે (શનિવારે) અત્યંત સાવધાની સાથે સંયુક્ત બચાવ કામગીરી શરૂ કરી. સશસ્ત્ર આતંકવાદીઓનો સામનો કરવા અને અપહરણ કરાયેલા કામદારોને સુરક્ષિત રીતે બચાવવા માટે, જનરલ એરિયા ન્ગીસામાં નોકના ટ્રેક અને જનરલ એરિયા ન્ગીનુમાં નોકના ટ્રેક પર બે વ્યૂહાત્મક હુમલો કરવામાં આવ્યો હતો.

રવિવારે વહેલી સવારે, ઘોર અંધારામાં, સંયુક્ત સુરક્ષા દળોએ ગેરિલા શૈલીની શોધખોળ શરૂ કરી. જોકે, આતંકવાદીઓને કોઈક રીતે સુરક્ષા દળોના ઓપરેશનની ખબર પડી ગઈ. સવારે 5:50 વાગ્યે (રવિવારે) તેઓએ પહેલા પોતાની બંદૂકોથી ગોળીબાર કર્યો અને પછી સુરક્ષા દળો પર મોર્ટાર છોડ્યા.

પરંતુ અપહરણ કરાયેલા કામદારોની સુરક્ષાને સર્વોપરી માનતા, સુરક્ષા દળોએ ઉશ્કેરણી વિના જવાબી કાર્યવાહી કરી નહીં. જોકે, જ્યારે બળવાખોરોનો મોર્ટાર અને ગોળીબાર વધ્યો, ત્યારે આસામ રાઇફલ્સના જવાનોએ વળતો જવાબ આપ્યો.

આ દરમિયાન, ભારે ગોળીબાર ચાલુ હતો, ત્યારે સુરક્ષા દળની બીજી ટીમે વ્યૂહાત્મક શોધખોળ હાથ ધરી અને જંગલમાંથી અપહરણ કરાયેલા બે કામદારોને સુરક્ષિત રીતે બચાવી લીધા.

રાજ્ય પોલીસ મુખ્યાલયના એક સત્તાવાર સૂત્રએ પુષ્ટિ આપી કે, બે કામદારોને બચાવી લેવામાં આવ્યા પછી પણ, આસામ રાઇફલ્સના જવાનોએ પ્રતિબંધિત આતંકવાદી સંગઠનના કાર્યકરો સામે વિસ્તારમાં કોમ્બિંગ ઓપરેશન ચાલુ રાખ્યું.

હિન્દુસ્થાન સમાચાર / અરવિંદ રાય / અમરેશ દ્વિવેદી

હિન્દુસ્થાન સમાચાર / માધવી વ્યાસ