જૂનાગઢ, 23 નવેમ્બર (હિ.સ.) : ખાસ સઘન સુધારણા (SIR) કાર્યક્રમ–2025 અંતર્ગત આજે જિલ્લા ચૂંટણી અધિકારી અને કલેક્ટર, જુનાગઢ અનિલ રાણાવસિયા પ્રાંત અધિકારી, કેશોદ કિશન ગરસર દ્વારા કેશોદ વિસ્તારના અગતરાય અને વણપરિયા કન્યા વિદ્યામંદિર સહિતના વિવિધ મતદાન મથકોની મુલાકાત લીધી હતી. આ દરમ્યાન ખાસ કેમ્પમાં ચાલી રહેલી મેગા કલેક્શન કામગીરી તેમજ SIR ડિજિટાઇઝેશનની પ્રગતિની વિગતવાર સમીક્ષા કરવામાં આવી હતી.

મેગા કલેક્શન કેમ્પ દરમિયાન નાયબ જિલ્લા ચૂંટણી અધિકારી નિકુંજકુમાર ધુળા અને મદદનીશ નોંધણી અધિકારી અને મામલતદાર, માંગરોળ દ્વારા સ્થાનિક આગેવાનોની ઉપસ્થિતિમાં મામલતદાર કચેરી ખાતે બેઠક યોજી હતી અને SIR બાબતે સમજૂતી આપી હતી. ત્યારબાદ માંગરોળ નગરપાલિકા વિસ્તારના વિવિધ બુથો તેમજ શેરીયાઝ તથા માળીયા તાલુકાના કૂકસવાડાના વિવિધ મતદાન મથકની મુલાકાત લઈને કલેક્શન તથા ડિજિટાઇઝેશન કામગીરીની સમીક્ષા કરી.

જિલ્લાના કુલ 13,00,344 મતદારોમાંથી 6,22,433 મતદારોના ગણતરી ફોર્મ ડિજિટાઇઝ થઈ ચૂક્યા છે, જે 47.87% જેટલી પ્રગતિ દર્શાવે છે. ગણતરી ફોર્મ જમા કરવાની અંતિમ તારીખ 04 ડિસેમ્બર, 2025 નજીક આવી રહી હોવાથી, મતદારોને સમયસર ફોર્મ જમા કરવાની જિલ્લા ચૂંટણી તંત્ર દ્વારા અપીલ કરવામાં આવેલ છે. ગણતરી ફોર્મ જમા કરવાથી ડ્રાફ્ટ મતદારયાદીમાં મતદારનું નામ સુનિશ્ચિત થઈ જશે.

---------------

હિન્દુસ્થાન સમાચાર / ભરતસિંહ જાદવ