અમદાવાદ, 6 નવેમ્બર (હિ.સ.) : અમદાવાદમાં રાણીપ વિસ્તારમાં એક મહિલાએ જવેલર્સની દુકાનમાં સોનીની આંખમાં મરચું નાખી નાખીને લૂંટ કરવાનો પ્રયાસ કર્યો હતો. રાણીપમાં આવેલી જવેલર્સની દુકાનમાં જ્યારે સોની એકલો બેઠો હતો ત્યારે એક મહિલા ગ્રાહક બનીને આવેલી મહિલાએ અચાનક હાથમાં રહેલો મરચાંનો પાઉડર સોનીની આંખમાં નાખવાનો પ્રયાસ કર્યો. જોકે આ મરચાંના પાઉડર સોનીના આંખમા ન જતાં સોની તરત જ ઊભો થયો અને તેણે ચોરી કરવા આવેલી મહિલાને એક બાદ એક ધડાધડ 20 લાફા ઝીંકી દીધા હતા.

આ સમગ્ર ઘટના CCTV કેમેરામાં કેદ થઈ છે. આ ઘટના અંગે સોનીએ તો ફરિયાદ કરવાની ઇનકાર કર્યો છે, પરંતુ પોલીસે મહિલાની તપાસ શરૂ કરી છે.

રાણીપ શાકમાર્કેટ પાસે જવેલર્સની દુકાનમાં બપોરના સમયે સોની બેઠા હતા. ત્યારે એક મહિલા ગ્રાહક બનીને આવી હતી આ મહિલા દુકાનમાં આવતાં જ તેણે પોતાની પાસેનો મરચાંનો પાઉડર સોનીની આંખમાં નાખીને લૂંટ કરવાનો પ્રયાસ કર્યો હતો. જોકે આ પાઉડર સોનીની આંખમાં ગયો નહોતો. બાદમાં સોનીને મહિલાના ઇરાદાની જાણ થતાં તેણે પોતાની જગ્યાએથી ઊભા થઈને મહિલાને એક બાદ એક 20 લાફા મારી દીધા હતા. સોની ટેબલ કૂદીને મહિલા પાસે આવ્યો અને મહિલાને ખેંચીને દુકાનની બહાર પણ કાઢી હતી. આ સમગ્ર ઘટના CCTV કેમેરામાં કેદ પણ થઈ છે.

રાણીપ પોલીસ સ્ટેશનના પીઆઇ કેતન વ્યાસે જણાવ્યું હતું કે સોની આ અંગે ફરિયાદ કરવાનો ઇનકાર કરી રહ્યા છે, પરંતુ પોલીસે CCTVના આધારે મહિલાની તપાસ શરૂ કરી છે.

હિન્દુસ્થાન સમાચાર / હર્ષ શાહ