નવી દિલ્હી, 20 ડિસેમ્બર (હિ.સ): એન્ફોર્સમેન્ટ ડિરેક્ટોરેટ (ઈડી) એ, શનિવારે ઉદ્યોગપતિ અનિલ અંબાણીના પુત્ર, જય અનમોલ અંબાણીની બેંક લોન છેતરપિંડી સંબંધિત મની લોન્ડરિંગ કેસના સંદર્ભમાં સતત બીજા દિવસે પૂછપરછ કરી.

સત્તાવાર સૂત્રોએ જણાવ્યું હતું કે, અનિલ અંબાણીના 34 વર્ષીય પુત્ર અનમોલનું નિવેદન શુક્રવારે પ્રિવેન્શન ઓફ મની લોન્ડરિંગ એક્ટ (પીએમએલએ), 2002 હેઠળ પ્રથમ વખત નોંધવામાં આવ્યું હતું અને પૂછપરછ આજે પણ ચાલુ રહી હતી. જોકે, રિલાયન્સ અનિલ ધીરુભાઈ અંબાણી ગ્રુપે હજુ સુધી આ વિકાસ પર કોઈ ટિપ્પણી કરી નથી. સૂત્રોએ જણાવ્યું હતું કે ઈડી તપાસ યસ બેંક સાથે સંબંધિત છે. 31 માર્ચ, 2017 સુધીમાં, બેંકનું રિલાયન્સ અનિલ ધીરુભાઈ અંબાણી ગ્રુપમાં આશરે ₹6,000 કરોડનું રોકાણ હતું, જે એક વર્ષમાં વધીને આશરે ₹13,000 કરોડ થયું. આ કંપનીઓમાં રિલાયન્સ હોમ ફાઇનાન્સ લિમિટેડ અને રિલાયન્સ કોમર્શિયલ ફાઇનાન્સ લિમિટેડનો સમાવેશ થાય છે.

નોંધનીય છે કે, રિલાયન્સ ગ્રુપ કંપનીઓ સાથે સંકળાયેલા કથિત બેંક લોન છેતરપિંડીના કેસમાં એન્ફોર્સમેન્ટ ડિરેક્ટોરેટ (ઈડી) એ અનિલ અંબાણીની પણ પૂછપરછ કરી છે. એન્ફોર્સમેન્ટ ડિરેક્ટોરેટ (ઈડી) નો આરોપ છે કે, આ રોકાણોનો મોટો ભાગ બિન-કાર્યક્ષમ રોકાણોમાં ફેરવાઈ ગયો, જેના પરિણામે બેંકને આશરે ₹3,300 કરોડનું નુકસાન થયું.

હિન્દુસ્થાન સમાચાર / પ્રજેશ શંકર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ