પોરબંદર, 8 ડિસેમ્બર (હિ.સ.) : પોરબંદર જિલ્લા મહિલા અને બાળ અધિકારી કચેરી, પોરબંદર દ્વારા દીકરીઓના શિક્ષણ, સુરક્ષા, સન્માન તથા સમાજમાં લિંગ ગુણોત્તરમાં સુધારો લાવવા માટે જનજાગૃતિ વધારવાના હેતુથી કેન્દ્ર સરકારની મહત્વાકાંક્ષી બેટી બચાવો, બેટી પઢાવો (BBBP) યોજના અંતર્ગત જીલ્લા પંચાયત હોલ પોરબંદર ખાતે જાગૃતિ અને માર્ગદર્શન સેમિનારનું સફળ આયોજન કરવામાં આવ્યું હતું.

આ કાર્યક્રમમાં ડિસ્ટ્રિક્ટ મિશન કો-ઓર્ડિનેટર ડો. સંધ્યાબેન જોષીએ BBBP યોજનાના ધ્યેયો અને જિલ્લા પ્રગતિ અંગે માહિતગાર કર્યા હતા. જેંડર સ્પેશિયાલિસ્ટ ચિરાગ દવેએ જાતિગત ભેદભાવ અને મહિલાઓની સુરક્ષા મુદ્દે ચર્ચા કરી હતી. નાણાકીય જાગૃતિ સત્રમાં સૌરભભાઈ મારુ દ્વારા 'સુકન્યા સમૃદ્ધિ યોજના' તથા રાજ્ય સરકારની 'વ્હાલી દીકરી યોજના' અંગે વિગતવાર સમજણ આપવામાં આવી.

કાયદાકીય માર્ગદર્શનમાં ઘરેલું હિંસા સામેના કાયદા, સખી વન સ્ટોપ સેન્ટરની સેવાઓ તથા પોક્સો એક્ટ અંગે સમજણ આપવામાં આવી હતી. અને જાગૃતિ અભિયાનના ભાગરૂપે તમામ ઉપસ્થિત બહેનોને BBBP બેગ તથા માર્ગદર્શક પેમ્પલેટનું વિતરણ કરવામાં આવ્યું.આ સેમિનારમાં 77 આંગણવાડી કાર્યકર બહેનો સહિતના લાભાર્થીઓને વિવિધ મહિલા કલ્યાણલક્ષી યોજનાઓ, કાયદાકીય અધિકારો અને દીકરીઓની સુરક્ષા વિષે માર્ગદર્શન પૂરું પાડવામાં આવ્યું હતું.

આ મહત્વપૂર્ણ પ્રસંગે, સંકલ્પ ડિસ્ટ્રિક્ટ હબ ફોર એમ્પાવરમેંટ ઓફ વુમનના મુખ્ય અધિકારીઓ ઉપરાંત આઈસીડીએસ રાણાવાવના સીડીપીઓ દક્ષાબેન, સાંઈનાથ ચેરીટેબલ ટ્રસ્ટના નિમિષાબેન જોષી સહિત અન્ય પ્રતિનિધિઓ ખાસ ઉપસ્થિત રહ્યા હતા.

---------------

હિન્દુસ્થાન સમાચાર / Tejas Pravinbhai Dholariya