•નિકોરા ગામની મંગેતરને લેવા આવેલ જાનના હેલિકોપ્ટરને જોવા આખું ગામ દોડ્યું

•ખરચીના યુવાને નિકોરા ગામમાં સોટો પાડી તેની મંગેતરને હેલિકોપ્ટરમાં લાવ્યો

•વસાવા સમાજ દરેક સમાજ સાથે ચાલે છે વિકાસ કરી આગળ આવ્યા છે

ભરૂચ 17 ફેબ્રુઆરી (હિ.સ.). સમગ્ર ગુજરાત રાજ્યમાં હાલમાં લગ્નની સિઝન ચાલી રહી છે.ત્યારે ભરૂચ જિલ્લાના ખરચી ગામનો એક યુવક હેલિકોપ્ટરમાં જાન લઈને ભરૂચ જિલ્લાના નર્મદા નદીના કિનારે આવેલ નિકોરા ગામ પહોંચ્યો હતો.જ્યાં ગ્રામ્ય પંથકમા પહેલીવાર હેલીકોપ્ટરમાં વરરાજા આવતા લોકો મોટી સંખ્યામાં જોવા ઉમટી પડ્યા હતા.

ગુજરાત રાજ્યમાં ગામડાઓમાં હેલિકોપ્ટરમાં બેસી પરણવા આવવાનો ક્રેઝ વધ્યો છે.ત્યારે હાલમાં લગ્નની સિઝન ચાલી રહી છે. તેમાં પોતાના જીવનના આ પ્રસંગને વધુ યાદગાર બનાવવા નવયુગલો અવનવી રીતો અજમાવતા હોય છે. શહેરોમાં લક્ઝ્યુરિયસ ગાડીઓમાં બેસીને વરરાજા જાન લઇને આવતા હોય છે.તો ક્યાંક ભાતીગળ બળદગાડામાં જાનૈયાઓ જોતરાય છે. તો ક્યાંક જાન ટ્રેક્ટર કે ટ્રોલીમાં અથવા તો જેસીબી મશીનમાં વરરાજા નીકળ્યા હોવાના વીડિયો સામે આવ્યા છે.ભરૂચ જિલ્લામાં હવે શહેરની સાથે ગામડાંઓ પણ સમૃદ્ધ બન્યા છે ભરૂચ જિલ્લામાં આવેલા ખરચી ગામના સુખદેવ રામા વસાવાના પુત્ર અજયકુમારના ગતરોજ થયેલા લગ્નમાં ખરચી આખું ગામ હિલોળે ચઢ્યું હતું જેનું કારણ હતું કે,અજયકુમાર વસાવા પોતાના પરીવાર સાથે ભરૂચ તાલુકાના એક નાનકડાં ગામમાં નિકોરા ગામના રામજી ત્રિભોવન વસાવાની સુપુત્રી વૈશાલીકુમારી સાથે લગ્ન કરવા હેલિકોપ્ટરથી જાન લઈને આવતાં હેલિકોપ્ટરને જોવા લોકોના ટોળા ઉમટ્યાં હતાં.અજયકુમાર લગ્ન કરીને વૈશાલીને હેલિકોપ્ટરમાં જ પોતાના ઘરે લઈ ગયો હતો. જોકે અહીંયા કોઈ પણ ઘટના ન બને તે માટે ફાયર અને એમ્બ્યુલન્સ સહિતનો બાઉન્સરો બંદોબસ્ત સાથે બોડીગાર્ડ પણ રાખવામાં આવ્યો હતો.દરેક સમાજ પ્રગતિ કરી રહ્યો છે ત્યારે વસાવા સમાજ પણ જમાના સાથે તાલ મિલાવવા પુરુષાર્થ કરી પ્રગતિ કરી રહ્યો છે જેના ફળસ્વરૂપ ખરચી ગામના વસાવા યુવાને ભરૂચ જિલ્લામાં બતાવી દીધું છે કે અમે પણ દરેક સમાજ સાથે ચાલીએ છીએ વિકાસ કરી આગળ આવ્યા છીએ.

હિન્દુસ્થાન સમાચાર / અતુલકુમાર પટેલ