સુરત, 19 ફેબ્રુઆરી (હિ.સ.)-દેશના નંબર 1 ક્લિન સિટી સુરત મહાનગરપાલિકાનું નાણાંકીય વર્ષ 2025-26નું ડ્રાફ્ટ બજેટ આજે મ્યુનિસિપલ કમિશનર શાલિની અગ્રવાલે રજૂ કર્યું હતું. કમિશનરે ઐતિહાસિક રૂપિયા 9603 કરોડનું બજેટ રજૂ કર્યું છે, જે પૈકી 4562 કરોડ વિકાસ કામો માટે ફાળવ્યા છે.સુરત મ્યુનિસિપલ કમિશરે સ્ટેન્ડિંગ કમિટી સમક્ષ આજે 2025-26ના વર્ષનું 9603 કરોડનું ડ્રાફ્ટ બજેટ રજૂ કર્યું હતું. જેમાં બ્રિજ નિર્માણ માટે 130 કરોડની, તાપી નદીના શુદ્ધિકરણ માટે 25 કરોડની જોગવાઈ કરવામાં આવી છે. આગની ઘટનાઓ વધુ બનતી હોવાથી ફાયર એકેડમી સ્થાપવામાં આવશે. નાગપુર બાદ દેશમાં બીજી એકેડમી સુરત ખાતે સ્થાપવામાં આવશે. સાથે જ દરેક ઘર પર ક્યુઆર કોડ લગાવવામાં આવશે.

આ અંદાજિત રૂ.469 કરોડનું રેવેન્યુ સરપ્લસ ધરાવતું બજેટ છે. વર્ષ 2023-24માં રૂ. 117 કરોડ રેવન્યુ સરપ્લસ અને વર્ષ 2024-25 માં રૂ. 425 કરોડ મળી કુલ રૂ. 542 કરોડ રેવન્યુ સરપ્લસ ફંડ સુરત શહેરના વિકાસ કાર્યો માટે ઉપલબ્ધ કરાયું છે. સુરત ને Growth Hub તરીકે આગળ ધપાવવા માટે વર્ષ 2025-26માં સુરત મહાનગરપાલિકાના અત્યાર સુધીના ઈતિહાસનું સૌથી મોટું કદ ધરાવતું રૂ. 4562 કરોડનું કેપિટલ કામો માટેનું બજેટ જાહેર કરાયું છે. નવા વિસ્તારોના વિકાસ માટે તબક્કાવાર કુલ અંદાજીત 5481 કરોડના ખર્ચ કરાશે. આંતરમાળખાકીય સુવિધાઓ પૂરી પાડવાનું આયોજન છે. વર્ષ 2024-25 કરતા રૂ. 868 કરોડનો વધારો કરાયો છે.

સુરત મનપાએ દૂષિત પાણીને 2035 સુધીમાં શુદ્ધ કરવાનો લક્ષ્યાંક નક્કી કર્યો છે. આ શુદ્ધ પાણી ઉદ્યોગ ગૃહોને સપ્લાય કરાશે. ડુમસ સી ફેસ ડેવલપમેન્ટ માટે 153 કરોડ, આરોગ્ય માટે 9 કરોડની જોગવાઈ કરાઈ છે. શહેરમાં 16 નવા હેલ્થ સેન્ટર ઉભા કરાશે. સુરત દેશનું પહેલું ઈવી બીઆરટીએસ બસ સેવા આપનારું શહેર બનશે. 2025-26 દરમિયાન સુરત શહેરની સિટી અને બીઆરટીએસ બસોને ઈલેક્ટ્રીકમાં કન્વર્ટ કરાશે.

સુરતની પહેલ ‘સ્વસ્થ મહિલા, સ્વસ્થ સમાજ’ અંતર્ગત 5 લાખ થી વધુ મહિલાઓનું ગર્ભાશયના સર્વાઇકલ કેન્સર, બ્રેસ્ટ કેન્સર અને ઓરલ કેન્સરનું સ્ક્રીનીંગ અન્વયે 9,71,419 મહિલાઓનું સ્ક્રીનીંગ કરવામાં આવ્યું છે. જ્યારે 9,98,760 પુરુષોનું ઓરલ કેન્સરનું સ્ક્રીનીંગ કરવામાં આવ્યું છે. જે પૈકી 202 બ્રેસ્ટ કેન્સર, 323 ઓરલ કેન્સર અને 94 સર્વાઇકલ કેન્સરનું નિદાન કરી સારવાર હેઠળ મુકવામાં આવેલ છે.

સુરત મનપાએ 2024-25માં કુલ 5280 કરોડની આવક મેળવી હતી, તેની સામે વર્ષ 2025-26માં 5510 કરોડની આવકનો અંદાજ રજૂ કરાયો છે. તે પૈકી ઓક્ટ્રોયની અવેજીમાં સરકાર તરફથી મળતી ગ્રાન્ટ 1025 કરોડ, જનરલ ટેક્સ 889 કરોડ, યુઝર ચાર્જ 1245 કરોડ, વાહન વેરો 160 કરોડ, વ્યવસાય વેરો 180 કરોડ, નોન ટેક્સ રેવન્યુ 1625 કરોડ, રેવન્યૂ ગ્રાન્ટ, સબસિડી અને કોન્ટ્રીબ્યુશન 229 કરોડ તેમજ અન્ય આવક 157 કરોડની થશે તેવો અંદાજ મુકાયો છે.

સુરત મનપા દ્વારા એસ્ટાબ્લીશમેન્ટ માટે 49 ટકા, વહીવટી અને જનરલ ખર્ચ 3 ટકા, મરામત-વિજળી ખર્ચ 19 ટકા, સર્વિસ ખર્ચ 10 ટકા, કોન્સ્ટ્રીબ્યુશન સબસિડી અને ગ્રાન્ટ 7 ટકા, લોન ચાર્જિસ તથા અન્ય નાણાંકીય ખર્ચ 1 ટકા, ધસારા પાછળ 11 ટકા રકમ ખર્ચવામાં આવશે.

---------------

હિન્દુસ્થાન સમાચાર / યજુવેન્દ્ર દુબે