લખનૌ,21 ફેબ્રુઆરી (હિ.સ) શુક્રવારે, ઉત્તર પ્રદેશની રાજધાની લખનૌમાં આવેલી આદર્શ જેલના કેદીઓએ મહાકુંભમાંથી લાવવામાં આવેલા સંગમના પાણીથી સ્નાન કર્યું. રાજ્યના જેલ મંત્રી દારાસિંહ ચૌહાણના નિર્દેશ પર આ ખાસ વ્યવસ્થા કરવામાં આવી છે.

જેલ મંત્રી ચૌહાણે આદર્શ જેલમાં પોતાના હાથે સંગમ જળનો કળશ એક મોટા પાત્રમાં રેડીને કાર્યક્રમની શરૂઆત કરી. મંત્રીએ કહ્યું કે રાજ્ય સરકારે કેદીઓની ધાર્મિક લાગણીઓ અને માન્યતાઓનું સન્માન કરવા માટે આ પગલું ભર્યું છે. રાજ્યની તમામ જેલોમાં બંધ કેદીઓને જેલની અંદર જ સંગમના પવિત્ર જળમાં સ્નાન કરાવવામાં આવશે. કેદીઓને પુણ્ય પ્રાપ્તિથી વંચિત ન રાખવા જોઈએ, અમે તેમની ધાર્મિક લાગણીઓનો આદર કરીએ છીએ.

મંત્રી ચૌહાણે જણાવ્યું હતું કે સંગમમાં સ્નાન કરવા માંગતા કેદીઓ માટે જેલ પ્રશાસન જેલની અંદર જ તળાવો અથવા મોટા ટબમાં સંગમનું પાણી નાખીને સ્નાનની વ્યવસ્થા કરી રહ્યું છે. જેલોમાં સ્નાન વ્યવસ્થા દરમિયાન, યજ્ઞ, હવન અને કળશ પૂજનની પણ વ્યવસ્થા કરવામાં આવશે.

લખનૌની આદર્શ જેલમાં સંગમ જલ સ્નાન કાર્યક્રમની શરૂઆત પ્રસંગે, મુખ્ય સચિવ જેલ અનિલ ગર્ગ, ડાયરેક્ટર જનરલ જેલ પીવી રામશાસ્ત્રી અને આદર્શ જેલના અધિકારીઓ હાજર રહ્યા હતા.

હિન્દુસ્થાન સમાચાર/શ્રી ચંદ્રા/પવન કુમાર

હિન્દુસ્થાન સમાચાર / હર્ષ શાહ