- પ્રધાનમંત્રીએ ઇન્દોર મેટ્રો અને સતના-દતિયા એરપોર્ટનું ઉદ્ઘાટન કર્યું

- દેવી અહલ્યાબાઈની સ્મૃતિમાં દેશનો પ્રથમ 300 રૂપિયાનો સિક્કો બહાર પાડ્યો

ભોપાલ, નવી દિલ્હી, 31 મે (હિ.સ.). પ્રધાનમંત્રી નરેન્દ્ર મોદીએ, શનિવારે દેવી અહલ્યાબાઈ હોલકરની 300મી જન્મજયંતિ નિમિત્તે ભોપાલના જંબુરી ગ્રાઉન્ડ ખાતે આયોજિત મહિલા સશક્તિકરણ મહા સંમેલનમાં હાજરી આપી હતી. તેમણે કાર્યક્રમમાં ઇન્દોર મેટ્રો અને સતના અને દતિયા એરપોર્ટનું ઉદ્ઘાટન કર્યું હતું. પ્રધાનમંત્રી મોદીએ, દેવી અહલ્યાબાઈની સ્મૃતિમાં દેશનો પ્રથમ 300 રૂપિયાનો સ્મારક સિક્કો તેમની 300મી જન્મજયંતિ નિમિત્તે બહાર પાડ્યો હતો. 35 ગ્રામ વજનના આ સિક્કામાં ચાંદીનો જથ્થો 50 ટકા છે. તેની એક બાજુ અહલ્યાબાઈનો ફોટો છે. દેશ અને દુનિયામાં આ પ્રકારનો આ પહેલો સિક્કો બહાર પાડવામાં આવ્યો છે, જેની કિંમત 300 રૂપિયા છે. આ પ્રસંગે તેમણે કહ્યું કે, લોકમાતા દેવી અહલ્યાબાઈ હોલકરનું નામ સાંભળતા જ મન શ્રદ્ધાથી ભરાઈ જાય છે. તેમના મહાન વ્યક્તિત્વ વિશે કહેવા માટે શબ્દો ઓછા પડે છે.

કાર્યક્રમને સંબોધતા પ્રધાનમંત્રી મોદીએ મહિલા શક્તિને સલામ કરી. તેમણે કહ્યું કે, આજનો કાર્યક્રમ દેવી અહલ્યાબાઈના વિચારને આગળ ધપાવે છે. આજે ઇન્દોરમાં મેટ્રો અને સતના-દતિયામાં એરપોર્ટ શરૂ થયું છે. આ બધા પ્રોજેક્ટ્સ મધ્યપ્રદેશમાં સુવિધાઓ વધારશે, વિકાસને વેગ આપશે અને રોજગારની નવી તકો ઉભી કરશે. આ પવિત્ર દિવસે, હું આ બધા વિકાસ કાર્યો માટે સમગ્ર રાજ્યને અભિનંદન આપું છું. તેમણે કહ્યું કે, લોકમાતા દેવી અહલ્યાબાઈ હોલકરનું નામ સાંભળવાથી મન શ્રદ્ધાથી ભરાઈ જાય છે. તેમણે ક્યારેય ભગવાનની સેવા અને લોકોની સેવાને અલગ માન્યું નહીં. એવું કહેવાય છે કે, તેઓ હંમેશા પોતાની સાથે શિવલિંગ રાખતા હતા. તે પડકારજનક સમયમાં રાજ્યનું નેતૃત્વ કરવાની કલ્પના કરી શકાય છે, કાંટાથી ભરેલો મુગટ હતો, પરંતુ લોકમાતાએ તેમના રાજ્યને નવી દિશા આપી. તેમણે ગરીબમાં ગરીબને સક્ષમ બનાવવા માટે કામ કર્યું.

પ્રધાનમંત્રીએ કહ્યું કે, જ્યારે અઢી થી ત્રણસો વર્ષ પહેલાં દેશ ગુલામીના બંધનમાં હતો, ત્યારે આવનારી ઘણી પેઢીઓ જે મહાન કાર્ય કરશે તે કહેવું સહેલું છે પણ કરવું સહેલું નથી. તેમણે કહ્યું કે, દેવી અહલ્યાબાઈ ભારતના વારસાના મહાન રક્ષક હતા. જ્યારે દેશની સંસ્કૃતિ, આપણા મંદિરો, આપણા તીર્થસ્થાનો પર હુમલો થઈ રહ્યો હતો, ત્યારે લોકમાતાએ તેમનું રક્ષણ કરવા માટે પહેલ કરી. તેમણે કાશી વિશ્વનાથ સહિત દેશભરમાં આપણા ઘણા મંદિરો અને તીર્થસ્થાનોનું પુનર્નિર્માણ કર્યું. હું ભાગ્યશાળી છું કે, જે કાશીમાં લોકમાતાએ આટલા વિકાસ કાર્યો કર્યા, ત્યાં મને સેવા કરવાની તક પણ મળી. આજે, જો તમે કાશી વિશ્વનાથ મહાદેવના દર્શન કરવા જાઓ છો, તો તમને ત્યાં દેવી અહલ્યાબાઈની પ્રતિમા પણ જોવા મળશે.

પ્રધાનમંત્રી મોદીએ કહ્યું કે, આજે જો દીકરીઓના લગ્નની ઉંમરની ચર્ચા થાય છે, તો કેટલાક લોકોને લાગે છે કે ધર્મનિરપેક્ષતા જોખમમાં છે. પરંતુ દેવી અહલ્યાબાઈએ આવા સામાજિક દુષણોની ચર્ચા કરી હતી. 250 વર્ષ પહેલાં, તેમણે આપણા દેશમાં નારી સુરક્ષા ટોળી બનાવવાનું કામ કર્યું હતું. તેમણે કહ્યું કે, માતા અહલ્યાબાઈએ શાસનનું એક એવું મહાન મોડેલ અપનાવ્યું જેમાં ગરીબો અને વંચિતોને સર્વોચ્ચ પ્રાથમિકતા આપવામાં આવી. તેમણે રોજગાર અને ઉદ્યોગો વધારવા માટે ઘણી યોજનાઓ શરૂ કરી. તેમણે કૃષિ અને વન પેદાશો આધારિત કુટીર ઉદ્યોગો અને હસ્તકલાને પ્રોત્સાહન આપ્યું. ખેતીને પ્રોત્સાહન આપવા માટે, તેમણે નાની નહેરોનું નેટવર્ક નાખ્યું અને તેનો વિકાસ કર્યો. તે સમયમાં, 300 વર્ષ પહેલાં, તેમણે પાણી સંરક્ષણ માટે ઘણા તળાવો બનાવ્યા.

પ્રધાનમંત્રીએ કહ્યું કે, મહિલાઓને પણ મિલકતનો અધિકાર હોવો જોઈએ, જેમના પતિ અકાળે મૃત્યુ પામ્યા છે, તેઓ ફરીથી લગ્ન કરી શકે છે. તે સમયમાં, આ વાતો કહેવી પણ ખૂબ મુશ્કેલ લાગતું હતું, પરંતુ દેવી અહલ્યાબાઈએ આ સામાજિક સુધારાઓને સંપૂર્ણ ટેકો આપ્યો. તેમણે માલવાની સેનામાં મહિલાઓની એક ખાસ ટુકડી પણ બનાવી હતી. પશ્ચિમી વિશ્વના લોકો આ જાણતા નથી. તેઓ આપણા વિષે ખરાબ વિચારતા રહે છે. તેઓ આપણી માતાઓ અને બહેનોના અધિકારોના નામે આપણને અપમાનિત કરવાનો પ્રયાસ કરે છે. દેવી અહલ્યાબાઈ રાષ્ટ્ર નિર્માણમાં આપણી સ્ત્રી શક્તિના અમૂલ્ય યોગદાનનું પ્રતીક છે. હું તેમને સલામ કરું છું. હું પ્રાર્થના કરું છું કે તમે જ્યાં પણ હોવ, અમારા પર તમારા આશીર્વાદ વરસાવો.

આ દરમિયાન, પ્રધાનમંત્રીએ ફરી એકવાર પાકિસ્તાનને પડકાર ફેંક્યો. તેમણે કહ્યું કે, ગોળીઓનો જવાબ તોપમારાથી આપવામાં આવશે. સિંદૂર ભારતની બહાદુરીનું પ્રતીક બની ગયું છે. તેમણે કહ્યું કે, આતંકવાદીઓએ મહિલા શક્તિને પડકાર ફેંક્યો હતો. આ પડકાર તેમના અને તેમના આકાઓ માટે ઘાતક બન્યો. આપણી સેનાએ સેંકડો કિલોમીટર દૂર દુશ્મનના ઘરમાં ઘૂસીને તેમના આતંકવાદી ઠેકાણાઓનો નાશ કર્યો. ઓપરેશન સિંદૂર ભારતના ઇતિહાસમાં અત્યાર સુધીનું સૌથી મોટું સફળ ઓપરેશન છે.

હિન્દુસ્થાન સમાચાર / મુકેશ તોમર / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ