-ચૂંટણીમાં વિજય પછી દિલ્હી એકમના નેતાઓ સાથે પ્રથમ વાતચીત

નવી દિલ્હી, 11 જૂન (હિ.સ.). વડા પ્રધાન નરેન્દ્ર મોદીએ, બુધવારે તેમના સત્તાવાર નિવાસસ્થાન 7, લોક કલ્યાણ માર્ગ ખાતે દિલ્હીના ભારતીય જનતા પાર્ટી (ભાજપ)ના તમામ સાંસદો અને ધારાસભ્યોને મળ્યા. વડા પ્રધાન નિવાસસ્થાને તેમની મુલાકાત લગભગ સાડા ત્રણ કલાક ચાલી. લોકસભા ચૂંટણી 2024માં દિલ્હીની તમામ સાત બેઠકો પર ભાજપની ઐતિહાસિક જીત અને 2025ની વિધાનસભા ચૂંટણીમાં નિર્ણાયક બહુમતી મેળવ્યા પછી આ પહેલી વાર છે કે વડા પ્રધાને પાર્ટીના દિલ્હી એકમના નેતાઓ સાથે સીધી વાતચીત કરી છે.

આ બેઠક એવા સમયે થઈ છે જ્યારે કેન્દ્રમાં ભાજપ સરકારે 11 વર્ષ પૂર્ણ કર્યા છે અને દિલ્હીના મુખ્યમંત્રી રેખા ગુપ્તાના નેતૃત્વ હેઠળની સરકારના 100 દિવસ પણ પૂર્ણ થયા છે. પક્ષના નેતાઓએ આ પ્રસંગને પ્રતિકાત્મક અને ઉજવણીનો ક્ષણ ગણાવ્યો હતો.

સૂત્રોના જણાવ્યા અનુસાર, આ બેઠકમાં દિલ્હીના 100 દિવસના રિપોર્ટ કાર્ડ પર ચર્ચા કરવામાં આવી હતી. વડા પ્રધાન નરેન્દ્ર મોદીએ તમામ ધારાસભ્યો સાથે ચર્ચા કરી હતી. તેમણે સાંસદોને તેમના સંસદીય ક્ષેત્રમાં શક્ય તેટલો સંપર્ક અભિયાન વધારવા પણ કહ્યું હતું. તેમણે 'ક્લીન દિલ્હી ગ્રીન દિલ્હી' મિશન પર કામ કરવાનો મંત્ર આપ્યો હતો. વડા પ્રધાને ધારાસભ્યો અને સાંસદોને રાજધાનીને કેવી રીતે વિકસિત કરવી તે અંગે ટિપ્સ પણ આપી હતી.

બીજી તરફ, દિલ્હી વિધાનસભાના ડેપ્યુટી સ્પીકર અને ભાજપના ધારાસભ્ય મોહન સિંહ બિષ્ટે બેઠક વિશે કહ્યું, આ એક સુવર્ણ કાળ રહ્યો છે. વડા પ્રધાન મોદીના નેતૃત્વમાં દેશમાં અને હવે દિલ્હીમાં પણ શાનદાર કાર્ય થયું છે, જેના માટે અમે તેમનો આભાર માનવા આવ્યા છીએ.

ઉત્તર પશ્ચિમ દિલ્હીના સાંસદ યોગેન્દ્ર ચંદોલિયાએ જણાવ્યું હતું કે, આ બેઠકનો મુખ્ય ઉદ્દેશ્ય વડા પ્રધાન મોદી દ્વારા દિલ્હીના ભવિષ્ય માટે નિર્ધારિત રાજકીય અને વહીવટી દ્રષ્ટિકોણની ચર્ચા કરવાનો હતો. તેમણે કહ્યું, પહેલાં જ્યારે અમે ચૂંટણી જીત્યા પછી મળ્યા હતા, ત્યારે દિલ્હીમાં અમારી પાસે સત્તા નહોતી, પરંતુ આજે 27 વર્ષ પછી, ભાજપે અહીં સરકાર બનાવી છે.

હિન્દુસ્થાન સમાચાર / આકાશ કુમાર રાય / પ્રભાત મિશ્રા

હિન્દુસ્થાન સમાચાર / માધવી વ્યાસ