તેહરાન/જેરુસલેમ, નવી દિલ્હી, 15 જૂન (હિ.સ.). ઈરાન અને ઈઝરાયલ વચ્ચે વધતા લશ્કરી તણાવ વચ્ચે પરિસ્થિતિ વધુ ગંભીર બની છે. ઈઝરાયલી સેનાએ શનિવારે પુષ્ટિ આપી હતી કે તે ઈરાનના સપાટીથી સપાટી પર પ્રહાર કરતા મિસાઈલ સ્થળો પર હુમલો કરી રહી છે અને આ અભિયાન ચાલુ રહેશે.

ઈઝરાયલ સંરક્ષણ દળો (આઈડીએફ) એ કહ્યું કે, ઈરાન પાસે હજુ પણ એવા શસ્ત્રાગાર છે જે ઈઝરાયલને ગંભીર નુકસાન પહોંચાડી શકે છે. સેનાએ કહ્યું, અમે ઈરાન પર હુમલો કરી રહ્યા છીએ, અને આ સંઘર્ષ હજુ પૂરો થયો નથી. ઈઝરાયલ માટે ખતરો ઉભો કરતી દરેક વસ્તુ અથવા પરિસ્થિતિનો સંપૂર્ણપણે નાશ કરવામાં આવશે.

આ દરમિયાન, ઈરાનના સુપ્રીમ લીડર આયાતુલ્લાહ અલી ખામેનેઇ ના વરિષ્ઠ સલાહકાર અલી શમખાનીનું હોસ્પિટલમાં અવસાન થયું. ઈરાની મીડિયા અનુસાર, ઈઝરાયલી હવાઈ હુમલાના એક દિવસ પછી તેમનું અવસાન થયું, જોકે મૃત્યુનું ચોક્કસ કારણ જાણી શકાયું નથી. શમખાની લાંબા સમય સુધી ઈરાનના રાષ્ટ્રીય સુરક્ષા વડા હતા અને ચીન દ્વારા મધ્યસ્થી કરાયેલી સાઉદી અરેબિયા સાથેની ઐતિહાસિક સમાધાન વાટાઘાટોમાં મહત્વપૂર્ણ ભૂમિકા ભજવી હતી.

અમેરિકા-ઈરાન પરમાણુ વાટાઘાટો પર બ્રેક

વિવાદ વચ્ચે, ઓમાને વધુ એક ફટકો આપ્યો છે. મસ્કતમાં પ્રસ્તાવિત અમેરિકા-ઈરાન પરમાણુ વાટાઘાટોનો તાજેતરનો રાઉન્ડ રદ કરવામાં આવ્યો છે. ઓમાનના વિદેશ પ્રધાન બદર અલ્બુસૈદીએ સોશિયલ મીડિયા પ્લેટફોર્મ 'એક્સ' પર લખ્યું, રવિવારે યોજાનારી વાટાઘાટો હવે થશે નહીં. જોકે, અમે માનીએ છીએ કે વાતચીત અને રાજદ્વારી એકમાત્ર કાયમી ઉકેલ છે.

ઇરાકે ઇઝરાયલી વિમાનો પર નારાજગી વ્યક્ત કરી

બીજી તરફ, ઇઝરાયલી લડાકુ વિમાનો દ્વારા ઇરાકી હવાઈ ક્ષેત્રનો ઉપયોગ કરવાના કથિત આરોપો પર બગદાદમાં રોષ ફેલાયો છે. ઇરાકે દ્વિપક્ષીય કરારો અને આંતરરાષ્ટ્રીય કાયદાનો ઉલ્લેખ કરીને, ઇઝરાયલી વિમાનોને ઇરાન વિરુદ્ધ હુમલા કરવા માટે ઇઝરાયલી વિમાનોને ઇરાકી હવાઈ ક્ષેત્રનું ઉલ્લંઘન કરતા અટકાવવા અમેરિકાને હાકલ કરી છે.

ઇરાકના લશ્કરી પ્રવક્તા સબાહ અલ-નુમાને એક કડક નિવેદન જારી કરીને માંગ કરી છે કે, અમેરિકા તેની જવાબદારીઓ પૂર્ણ કરે અને જાયોની સાથે જોડાયેલા વિમાનો ને ઇરાકી હવાઈ ક્ષેત્ર દ્વારા ઈરાન પર હુમલો કરતા અટકાવે.

હિન્દુસ્થાન સમાચાર / આકાશ કુમાર રાય / પ્રભાત મિશ્રા

હિન્દુસ્થાન સમાચાર / માધવી વ્યાસ