જમ્મુ, નવી દિલ્હી, 02 જૂન (હિ.સ.). પ્રધાનમંત્રી નરેન્દ્ર મોદી, 6 જૂને શ્રી માતા વૈષ્ણોદેવીજી મંદિરના બેઝ કેમ્પ કટરાથી કાશ્મીર સુધીની ટ્રેન સેવાનું ઉદ્ઘાટન કરી શકે છે. આ પછી, વંદે ભારત ટ્રેન કટરા અને બારામુલા વચ્ચે દોડવાનું શરૂ કરશે.

અધિકારીઓએ જણાવ્યું છે કે, કાશ્મીર માટે ટ્રેન સેવાઓ શરૂ કરવાની તૈયારીઓને અંતિમ સ્વરૂપ આપવામાં આવી રહ્યું છે અને પ્રધાનમંત્રી 6 જૂને ખીણ માટે પહેલી ટ્રેનને લીલી ઝંડી આપી શકે છે. આ ટ્રેન સેવા 19 એપ્રિલે શરૂ થવાની હતી, પરંતુ તે દિવસે ખરાબ હવામાનની આગાહીને ધ્યાનમાં રાખીને તેને મુલતવી રાખવામાં આવી હતી.

અધિકારીઓએ જણાવ્યું હતું કે, આ રૂટ ખોલવાથી 3 જુલાઈથી 9 ઓગસ્ટ સુધી શરૂ થનારી શ્રી અમરનાથજીની યાત્રા માટે ઉપયોગી સાબિત થઈ શકે છે. ખાસ કરીને જ્યારે આ સિઝનમાં વહેલા અને ભારે વરસાદના અહેવાલો છે, જે રામબન અને બનિહાલના સંવેદનશીલ ભાગ વચ્ચે જમ્મુ-શ્રીનગર રાષ્ટ્રીય ધોરીમાર્ગને અવરોધિત કરી શકે છે.

તેમણે કહ્યું કે, રેલ્વે ટ્રેક ખોલવાથી શ્રી અમરનાથજીના યાત્રાળુઓને કટરાથી શ્રીનગર જવા માટે મદદ મળી શકે છે. તેમણે કહ્યું કે, જો જરૂર પડે તો યાત્રાળુઓનો ધસારો ઓછો કરવા માટે ખાસ ટ્રેનો ચલાવી શકાય છે. ખાસ કરીને હાઇવે બ્લોકેજના કિસ્સામાં.

અધિકારીઓના જણાવ્યા અનુસાર, હાલમાં ફક્ત વંદે ભારત ટ્રેન કટરા અને બારામુલા વચ્ચે દોડવાની અપેક્ષા છે. પ્રધાનમંત્રી કટરાથી બારામુલા અને બારામુલાથી કટરા સુધીની ટ્રેનને, વર્ચ્યુઅલી લીલી ઝંડી આપશે. તેઓ કટરા સ્ટેડિયમ ખાતે એક રેલીને સંબોધિત કરશે. કટરાથી ટ્રેન સેવાઓને લીલી ઝંડી આપતા પહેલા પ્રધાનમંત્રી મોદી, ચેનાબ નદી પરના વિશ્વના સૌથી ઊંચા રેલ પુલ અને રિયાસી જિલ્લામાં રેલ્વે ટ્રેક પરના પ્રથમ કેબલ સ્ટે બ્રિજની મુલાકાત લે તેવી શક્યતા છે.

સૂત્રોના જણાવ્યા અનુસાર, શરૂઆતમાં આ ટ્રેન કટરાથી બારામુલા સુધી દોડશે. જો કે, જમ્મુ રેલ્વે સ્ટેશન પર પ્લેટફોર્મની સંખ્યા વધારવા સહિત વિસ્તરણ કાર્ય પૂર્ણ થયા પછી, ટ્રેન ખીણ માટે જમ્મુથી દોડવાનું શરૂ કરશે, જે ઓગસ્ટ-સપ્ટેમ્બરમાં શરૂ થશે.

કટરાથી બારામુલા સુધી ટ્રેનના અનેક સફળ પરીક્ષણો થયા છે. ઓપરેશન સિંદૂર દરમિયાન સેનાના જવાનોને લઈ જતી ટ્રેન પણ શ્રીનગર સુધી ટ્રેક પર દોડી હતી.

પહેલગામ આતંકવાદી હુમલા પછી, ટ્રેકનું નવેસરથી સુરક્ષા ઓડિટ હાથ ધરવામાં આવ્યું હતું અને વધુ પોલીસ કર્મચારીઓની તૈનાતી અને માળખાગત સુવિધાઓને મજબૂત બનાવવા સહિત તમામ મુદ્દાઓ ઉકેલાઈ ગયા છે.

કુલ 272 કિમી લાંબા ઉધમપુર-શ્રીનગર-બારામુલા રેલ લિંક પ્રોજેક્ટમાંથી, 209 કિમી તબક્કાવાર શરૂ કરવામાં આવ્યો હતો, જેમાં 118 કિમી લાંબા કાઝીગુંડ-બારામુલા સેક્શનનો પ્રથમ તબક્કો ઓક્ટોબર 2009 માં શરૂ કરવામાં આવ્યો હતો. ત્યારબાદ જૂન 2013 માં 18 કિમી લાંબા બનિહાલ-કાઝીગુંડ, જુલાઈ 2014 માં 25 કિમી ઉધમપુર-કટરા અને ગયા વર્ષે ફેબ્રુઆરીમાં 48.1 કિમી લાંબા બનિહાલ-સાંગલદાન સેક્શનનું કામ શરૂ થયું હતું.

46 કિમી લાંબા સાંગલદાન-રિયાસી સેક્શન પર કામ ગયા વર્ષે જૂનમાં પૂર્ણ થયું હતું, જેનાથી રિયાસી અને કટરા વચ્ચે કુલ 17 કિમી બાકી હતું જે લગભગ ત્રણ મહિના પહેલા પૂર્ણ થયું હતું, ત્યારબાદ વંદે ભારત સહિત અનેક ટ્રેનોના ટ્રાયલ શરૂ થયા હતા. આ પ્રોજેક્ટ પર 41,000 કરોડ રૂપિયાનો ખર્ચ થયો છે. 4 જાન્યુઆરીના રોજ, કટરા-બનિહાલ સેક્શન પર ઇલેક્ટ્રિક ટ્રેનનું સફળ પરીક્ષણ કરવામાં આવ્યું હતું. રેલ્વેએ છેલ્લા કેટલાક મહિનામાં ટ્રેકના વિવિધ વિભાગો પર અનેક પરીક્ષણો કર્યા છે, જેમાં અંજી ખાડ અને ચેનાબ બ્રિજના બે મુખ્ય સીમાચિહ્નોનો સમાવેશ થાય છે. કાશ્મીરને ખાસ ડિઝાઇન કરાયેલ નવી વંદે ભારત એક્સપ્રેસ ટ્રેન મળશે. આ નવી સેમી-હાઈ-સ્પીડ ટ્રેન કટરા અને શ્રીનગરને જોડશે. કટરા અને શ્રીનગરને જોડતી નવી સેમી-હાઈ-સ્પીડ ટ્રેન જમ્મુ અને કાશ્મીરમાં આવી ત્રીજી ટ્રેન હશે.

હિન્દુસ્થાન સમાચાર / બલવાન સિંહ / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ