-એર ઇન્ડિયા 21 જૂનથી 15 જુલાઈ વચ્ચે દર અઠવાડિયે 38 આંતરરાષ્ટ્રીય ફ્લાઇટ્સ ઘટાડશે

નવી દિલ્હી, 20 જૂન (હિ.સ.) ટાટા ગ્રુપની આગેવાની હેઠળની એર ઇન્ડિયાએ, શુક્રવારે ફરી એકવાર 8 ફ્લાઇટ્સ રદ કરી છે. એરલાઇન્સે એક સાથે 8 આંતરરાષ્ટ્રીય અને સ્થાનિક ફ્લાઇટ્સ રદ કરી છે, જેમાં ચેન્નાઈથી દુબઈ, દિલ્હીથી મેલબોર્ન, હૈદરાબાદથી મુંબઈ અને અમદાવાદથી દિલ્હીનો સમાવેશ થાય છે. એરલાઇને તેના આંતરરાષ્ટ્રીય ફ્લાઇટ ઓપરેશન્સમાં મોટા ફેરફારોની જાહેરાત કરી છે.

એર ઇન્ડિયાએ કહ્યું કે, જાળવણી અને સંચાલનના કારણોસર આ બધી ફ્લાઇટ્સ રદ કરવામાં આવી છે. 12 જૂને અમદાવાદમાં થયેલા વિમાન દુર્ઘટના પછી મુશ્કેલીઓનો સામનો કરી રહેલી એરલાઇને કહ્યું કે, તે 21 જૂનથી 15 જુલાઈ વચ્ચે દર અઠવાડિયે 38 આંતરરાષ્ટ્રીય ફ્લાઇટ્સ ઘટાડશે, જ્યારે એરલાઇને ત્રણ આંતરરાષ્ટ્રીય રૂટ પર સેવાઓ અસ્થાયી રૂપે સ્થગિત કરી છે. 18 આંતરરાષ્ટ્રીય રૂટ પર ફ્લાઇટ્સમાં આ ઘટાડો શેડ્યૂલમાં સ્થિરતા પુનઃસ્થાપિત કરવા અને મુસાફરોને છેલ્લી ઘડીની અસુવિધા ઘટાડવાના ઉદ્દેશ્યથી કરવામાં આવી રહ્યો છે. એરલાઇન્સે જણાવ્યું કે, ડીજીસીએ દ્વારા આદેશ આપવામાં આવેલા પ્રી-ફ્લાઇટ સુરક્ષા તપાસને કારણે ફ્લાઇટ્સ ઘટાડવામાં આવી છે. અત્યાર સુધીમાં, 33 બોઇંગ 787 વિમાનોમાંથી 26 નું નિરીક્ષણ પૂર્ણ થઈ ગયું છે. એર ઇન્ડિયા તેના બોઇંગ 777 વિમાનોની પણ તપાસ કરશે.

ઉડ્ડયન કંપનીની આ વિગતવાર જાહેરાત એક દિવસ પહેલા કરવામાં આવેલી જાહેરાત પછી આવી છે, જેમાં એર ઇન્ડિયાએ મોટા પેસેન્જર વિમાનો દ્વારા સંચાલિત ફ્લાઇટ્સમાં 15 ટકાના કામચલાઉ ઘટાડાની વાત કરી હતી. એરલાઇન્સે એક નિવેદનમાં સ્પષ્ટતા કરી હતી કે, આ ઘટાડો 21 જૂનથી અમલમાં આવશે અને ઓછામાં ઓછા 15 જુલાઈ, 2025 સુધી ચાલુ રહેશે. એરલાઇને જણાવ્યું હતું કે, દિલ્હી-નૈરોબી, અમૃતસર-લંડન (ગેટવિક) અને ગોવા (મોપા)-લંડન (ગેટવિક) પર સેવાઓ 15 જુલાઈ સુધી સ્થગિત રહેશે. હાલમાં, દિલ્હી-નૈરોબી રૂટ પર દર અઠવાડિયે ચાર ફ્લાઇટ્સ છે, જ્યારે અમૃતસર-લંડન (ગેટવિક) અને ગોવા (મોપા)-લંડન (ગેટવિક) રૂટ પર દર અઠવાડિયે ત્રણ ફ્લાઇટ્સ છે.

આ ઉપરાંત, ઉત્તર અમેરિકા, યુરોપ, ઓસ્ટ્રેલિયા અને દૂર પૂર્વના મુખ્ય શહેરોને જોડતા 18 આંતરરાષ્ટ્રીય રૂટ પર ફ્લાઇટ્સની સંખ્યામાં પણ ઘટાડો કરવામાં આવશે. ઉત્તર અમેરિકાના મહત્વપૂર્ણ રૂટ કે જેના પર ફ્લાઇટ્સ ઘટાડવામાં આવશે તેમાં દિલ્હી-ટોરોન્ટો, દિલ્હી-વાનકુવર, દિલ્હી-સાન ફ્રાન્સિસ્કો, દિલ્હી-શિકાગો અને દિલ્હી-વોશિંગ્ટનનો સમાવેશ થાય છે.

એર ઇન્ડિયાએ કહ્યું કે, તે જુલાઈના મધ્ય પછી સંપૂર્ણ કામગીરીમાં પાછા ફરવાની આશા રાખે છે અને ડીજીસીએ અને નાગરિક ઉડ્ડયન મંત્રાલય સાથે નજીકથી કામ કરવાનું વચન આપ્યું છે.

હિન્દુસ્થાન સમાચાર / પ્રજેશ શંકર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ