નવી દિલ્હી, 24 જૂન (હિ.સ.). કેન્દ્રીય મહિલા અને બાળ વિકાસ મંત્રી અન્નપૂર્ણા દેવીએ કોંગ્રેસ પર વળતો પ્રહાર કરતા કહ્યું કે, તેમનું કામ ફક્ત જૂઠાણા અને ભ્રમ ફેલાવવાનું અને અમારી સરકારની યોજનાઓના અસરકારક અમલીકરણમાં અવરોધ ઊભો કરવાનું છે. તેમણે કહ્યું કે મોદી સરકાર કલ્યાણકારી યોજનાઓમાં પારદર્શિતા અને સમાવેશ સુનિશ્ચિત કરવા માટે ટેકનોલોજીનો ઉપયોગ કરી રહી છે. આંગણવાડી કેન્દ્રો દ્વારા ઘરે લઈ જવામાં આવતા રાશનનું વિતરણ કરવા માટે ફેશિયલ રેકગ્નિશન સિસ્ટમ (એફઆરએસ) ફરજિયાત બનાવવા બદલ સરકારની ટીકા કરવી યોગ્ય નથી.

કોંગ્રેસ નેતા જયરામ રમેશને જવાબ આપતા અન્નપૂર્ણા દેવીએ કહ્યું કે, ફેશિયલ રેકગ્નિશન સિસ્ટમ, બાયોમેટ્રિક અને આધાર જેવી આધુનિક ટેકનોલોજીની મદદથી સરકાર આજે છેલ્લી હરોળના લાભાર્થી સુધી પહોંચવામાં સફળ થઈ રહી છે. ટેકનોલોજીના ઉપયોગથી પ્રધાનમંત્રી માતૃ વંદના યોજનાના લાભાર્થીઓમાં ઘટાડો થયો છે એમ કહેવું બિલકુલ ખોટું છે. વર્ષ 2019-20માં, પહેલી વાર લાભાર્થીઓની સંખ્યા વધીને 72.05 લાખ થઈ ગઈ છે. 2024-25માં, આ સંખ્યા વધીને 80.48 લાખ થઈ ગઈ છે (અત્યાર સુધીની સૌથી વધુ સંખ્યા). 2025-26ના પ્રથમ ત્રિમાસિક ગાળામાં, લાભાર્થીઓની સંખ્યા વધીને 27 લાખથી વધુ થઈ ગઈ છે. પીએમ-કિસાન દ્વારા, 10 કરોડ ખેડૂતો દર મહિને તેમના ખાતામાં સીધા લાભ મેળવી રહ્યા છે, આધાર દ્વારા પ્રમાણિત થઈ રહ્યા છે, અને રાશનનો લાભ મેળવી રહ્યા છે.

આ કોંગ્રેસનો કાર્યકાળ નથી જ્યાં જો એક રૂપિયો આપવામાં આવે તો 15 પૈસા લાભાર્થી સુધી પહોંચે. આ મોદી સરકાર છે - અહીં જો 100 રૂપિયા આપવામાં આવે, તો લાભાર્થી સુધી પુરા 100 રૂપિયા પહોંચે છે.

ઉલ્લેખનીય છે કે, જયરામ રમેશે કેન્દ્રીય મહિલા અને બાળ વિકાસ મંત્રાલયના પરિપત્રને શેર કરતી વખતે કહ્યું હતું કે, ગર્ભવતી મહિલાઓ સામે વધુ એક અવરોધ ઉભો કરવામાં આવ્યો છે. રાષ્ટ્રીય ખાદ્ય સુરક્ષા કાયદા હેઠળ ઉપલબ્ધ મૂળભૂત અને કાનૂની અધિકારો માટે હવે ચહેરો ઓળખવાની સિસ્ટમ ફરજિયાત બનાવવામાં આવી છે.

તેમણે કહ્યું કે, વિશ્વભરમાંથી એવા પુરાવા છે કે આ ટેકનોલોજી ત્વચાના રંગ અને વર્ગના આધારે ભેદભાવ કરે છે.

હિન્દુસ્થાન સમાચાર / વિજયાલક્ષ્મી / પવન કુમાર

હિન્દુસ્થાન સમાચાર / માધવી વ્યાસ