નવી દિલ્હી, 01 જુલાઈ (હિ.સ.) ઓઇલ માર્કેટિંગ કંપનીઓ (ઓએમસી) એ, આજે ​​19 કિલોગ્રામ કોમર્શિયલ એલપીજી ગેસ સિલિન્ડર સસ્તો કર્યો. જોકે, ઘરેલુ ઉપયોગ માટે વપરાતા 14.2 કિલોગ્રામ ગેસ સિલિન્ડરના ભાવમાં કોઈ ફેરફાર કરવામાં આવ્યો નથી. ગેસના ભાવ નક્કી કરવા માટે દર મહિનાની શરૂઆતમાં કરવામાં આવેલા સુધારા પછી, આજે કોમર્શિયલ ગેસના ભાવમાં પ્રતિ સિલિન્ડર 58.50 રૂપિયા સુધીનો ઘટાડો કરવામાં આવ્યો છે. ઓઇલ માર્કેટિંગ કંપનીઓએ સતત ચોથા મહિને કોમર્શિયલ ગેસ સિલિન્ડરના ભાવમાં ઘટાડો કર્યો છે.

ભાવ ઘટાડા પછી, હવે દિલ્હીમાં 19 કિલોગ્રામ ગેસ સિલિન્ડર માટે 1,665 રૂપિયા ચૂકવવા પડશે, જ્યારે જૂનમાં તેની કિંમત 1,723.50 રૂપિયા હતી. મે મહિનામાં, આ સિલિન્ડર માટે 1,747.50 રૂપિયા, એપ્રિલ મહિનામાં 1,762 રૂપિયા અને માર્ચ મહિનામાં 1,803 રૂપિયા ચૂકવવા પડતા હતા. આ રીતે, માર્ચ પછી, 19 કિલોગ્રામ એલપીજી ગેસ સિલિન્ડરના ભાવમાં 138 રૂપિયાનો ઘટાડો કરવામાં આવ્યો છે.

કોમર્શિયલ ગેસ સિલિન્ડરના ભાવમાં ઘટાડા બાદ, કલકતામાં તેની કિંમત હવે 1,826 રૂપિયાથી ઘટીને 1,769 રૂપિયા થઈ ગઈ છે. તેવી જ રીતે, મુંબઈમાં, આજથી, આ સિલિન્ડર 1,674.50 રૂપિયાને બદલે 1,616 રૂપિયામાં ઉપલબ્ધ છે. ચેન્નઈમાં, 19 કિલોગ્રામ ગેસ સિલિન્ડરનો ભાવ 1,881 રૂપિયાથી ઘટીને 1,823.50 રૂપિયા થઈ ગયો છે.

નોંધનીય છે કે, છેલ્લા કેટલાક મહિનાઓથી કોમર્શિયલ ગેસ સિલિન્ડરના ભાવમાં સતત ઘટાડો થઈ રહ્યો છે. અગાઉ, એપ્રિલ, મે અને જૂન મહિનામાં પણ 19 કિલોગ્રામ કોમર્શિયલ એલપીજી ગેસ સિલિન્ડરના ભાવમાં ઘટાડો કરવામાં આવ્યો હતો. ચાલુ નાણાકીય વર્ષમાં, એપ્રિલ મહિનામાં કોમર્શિયલ ગેસ સિલિન્ડરના ભાવમાં પ્રતિ સિલિન્ડર 41 રૂપિયા, મે મહિનામાં 14.50 રૂપિયા અને જૂન મહિનામાં 24 રૂપિયાનો ઘટાડો કરવામાં આવ્યો હતો. જોકે, એપ્રિલ પહેલા, માર્ચમાં કોમર્શિયલ એલપીજી ગેસ સિલિન્ડરના ભાવમાં 6 રૂપિયાનો વધારો કરવામાં આવ્યો હતો.

હિન્દુસ્થાન સમાચાર / યોગિતા પાઠક / વીરેન્દ્ર સિંહ

હિન્દુસ્થાન સમાચાર / ડો.હિતેશ એન.વ્યાસ