નવી દિલ્હી, 1 જુલાઈ (હિ.સ.) બોલીવુડના કિંગ ખાન શાહરૂખ ખાન માત્ર એક મહાન અભિનેતા જ નથી, પરંતુ તેમને મહાન સિનેમાની ઊંડી સમજ ધરાવતો કલાકાર પણ માનવામાં આવે છે. તેમના ચાહકો માત્ર ભારતમાં જ નહીં, પરંતુ સમગ્ર વિશ્વમાં છે. તાજેતરમાં શાહરૂખ ખાને ફિલ્મ 'તન્વી ધ ગ્રેટ'નું ટ્રેલર જોયું, જે તેમને એટલું ગમ્યું કે તેમણે તરત જ તેની પ્રશંસા કરી. તેમણે સોશિયલ મીડિયા પર ફિલ્મની પ્રશંસા જ નહીં, પરંતુ તેના દિગ્દર્શન અને અભિનયને પણ ખાસ ગણાવ્યો. રસપ્રદ વાત એ છે કે આ ફિલ્મ શાહરૂખના એક નજીકના મિત્ર દ્વારા દિગ્દર્શિત કરવામાં આવી છે અને તેમણે ફિલ્મમાં અભિનય પણ કર્યો છે. શાહરૂખની પ્રતિક્રિયાથી ફિલ્મ પ્રત્યે લોકોની ઉત્સુકતા વધુ વધી ગઈ છે.

'તન્વી ધ ગ્રેટ' ફિલ્મનું દિગ્દર્શન પીઢ અભિનેતા અનુપમ ખેર દ્વારા કરવામાં આવ્યું છે, જેમણે ચાર દાયકાથી વધુ સમયથી હિન્દી સિનેમાને, પોતાના અભિનયથી સમૃદ્ધ બનાવ્યું છે. હવે ફરી એકવાર અનુપમ ખેર દિગ્દર્શનની દુનિયામાં પાછા ફર્યા છે. તાજેતરમાં આ ફિલ્મનું ટ્રેલર રિલીઝ થયું હતું, જેને થોડા કલાકોમાં જ જબરદસ્ત પ્રતિસાદ મળવા લાગ્યો હતો.

શાહરૂખ ખાને ફિલ્મ પ્રત્યે પોતાની લાગણીઓ પણ વ્યક્ત કરી. તેમણે પોતાના એક્સ હેન્ડલ પર અનુપમ ખેર માટે, એક ખાસ પોસ્ટ બનાવી અને લખ્યું, મારા મિત્ર અનુપમ ખેર, જે હંમેશા જોખમ લેવામાં ડરતા નથી, પછી ભલે તે અભિનય હોય, દિગ્દર્શન હોય કે જીવન. 'તન્વી ધ ગ્રેટ'નું ટ્રેલર અદ્ભુત છે. આ સુંદર સફર માટે મારી શુભકામનાઓ! શાહરૂખ ખાન તરફથી મળેલી આ પ્રશંસાએ ફિલ્મની ચર્ચા તો વધારી જ છે, પરંતુ અનુપમ ખેર દ્વારા દિગ્દર્શિત આ વાર્તા વિશે દર્શકોની ઉત્સુકતા પણ બમણી કરી દીધી છે.

'તન્વી ધ ગ્રેટ' એક ભાવનાત્મક અને હૃદયસ્પર્શી ફિલ્મ છે, જેમાં શુભાંગી દત્ત મુખ્ય ભૂમિકામાં છે. તે ફિલ્મમાં તન્વીની ભૂમિકામાં જોવા મળશે, જ્યારે અનુપમ ખેર તેના દાદાની ભૂમિકા ભજવી રહ્યા છે. આ ફિલ્મમાં બોમન ઈરાની, જેકી શ્રોફ, પલ્લવી જોશી અને અરવિંદ જેવા અનુભવી કલાકારો પણ મહત્વપૂર્ણ ભૂમિકાઓમાં જોવા મળશે, જે વાર્તામાં વધુ ઊંડાણ ઉમેરશે. 'તન્વી ધ ગ્રેટ' 18 જુલાઈ 2025 ના રોજ સિનેમાઘરોમાં રિલીઝ થશે. ફિલ્મનું ટ્રેલર પહેલાથી જ દર્શકોના હૃદયને સ્પર્શી ગયું છે અને જ્યારથી શાહરૂખ ખાને તેની પ્રશંસા કરી છે, ત્યારથી ચાહકો ફિલ્મ પ્રત્યે વધુ ઉત્સાહિત થયા છે.

હિન્દુસ્થાન સમાચાર / લોકેશ ચંદ્ર દુબે

હિન્દુસ્થાન સમાચાર / માધવી વ્યાસ