નવી દિલ્હી, 30 જુલાઈ (હિ.સ.) અહાન પાંડે અને અનિત પડા જેવા નવા ચહેરાઓથી શણગારેલી 'સૈયારા' એ, બોક્સ ઓફિસ પર એવી ધમાલ મચાવી કે, કોઈને તેની અપેક્ષા નહોતી. ફિલ્મ રિલીઝ થતાં જ આ ફિલ્મે ધમાલ મચાવી દીધી અને તેની જબરદસ્ત સફળતા જોઈને અજય દેવગણને પણ, તેની બહુપ્રતિક્ષિત ફિલ્મ 'સન ઓફ સરદાર-2' ની રિલીઝ તારીખ મુલતવી રાખવી પડી. હવે જ્યારે 'સૈયારા'નો જાદુ ચાલુ છે, ત્યારે 1 ઓગસ્ટના રોજ નક્કી કરાયેલી નવી રિલીઝ તારીખ પણ મૂંઝવણમાં મુકાઈ ગઈ છે.

અહેવાલો પર વિશ્વાસ કરવામાં આવે તો, અજય દેવગણ અને તેમની ટીમે 'સન ઓફ સરદાર-2' ને દેશભરમાં લગભગ 3,500 સ્ક્રીન પર રિલીઝ કરવાની યોજના બનાવી હતી. પરંતુ હવે આ આંકડો ઘટીને 2,500 સ્ક્રીન પર આવવાની ધારણા છે. આ ઘટાડાનું સૌથી મોટું કારણ 'સૈયારા' અને 'મહાવતાર નરસિમ્હા' જેવી ફિલ્મોનું જબરદસ્ત પ્રદર્શન છે. બંને ફિલ્મો હાલમાં બોક્સ ઓફિસ પર સારી કમાણી કરી રહી છે અને થિયેટર માલિકોને સારો નફો આપી રહી છે. આવી સ્થિતિમાં, થિયેટરો તેમને દૂર કરવાના મૂડમાં નથી, જેની સીધી અસર અજયની ફિલ્મના સ્ક્રીન શેરિંગ પર પડી શકે છે.

સૂત્રોનું માનીએ તો, 'સન ઓફ સરદાર-2'ના વિતરકો માંગ કરી રહ્યા છે કે, ફિલ્મને કુલ શો સમયના 60 ટકા સમય મળવો જોઈએ, પરંતુ થિયેટરના માલિકો આ સાથે સંપૂર્ણપણે સહમત નથી. હાલમાં, મોટાભાગના સિંગલ સ્ક્રીન થિયેટરો દિવસમાં ફક્ત બે શો આપવા તૈયાર છે, જ્યારે બિન-રાષ્ટ્રીય ચેઇન સિનેમા હોલ પણ આ દિશામાં ઝુકાવતા હોય તેવું લાગે છે. તે જ સમયે, પીવીઆર આઇનોક્સ જેવા મુખ્ય મલ્ટિપ્લેક્સ જૂથોએ આ અસંતુલન પર નારાજગી વ્યક્ત કરી છે અને પરિસ્થિતિ અંગે ચિંતા વ્યક્ત કરી છે. હાલમાં, નિર્માતા અને થિયેટર માલિકો વચ્ચે વાતચીતનો દોર ચાલી રહ્યો છે અને એવી અપેક્ષા છે કે છેલ્લી ઘડીએ કોઈ નક્કર કરાર થઈ શકે છે. હાલમાં, એવું કહેવું ખોટું નહીં હોય કે 'સૈયારા'એ 'સન ઓફ સરદાર 2' ના માર્ગમાં મોટી દિવાલ ઉભી કરી છે.

સિદ્ધાંત ચતુર્વેદી અને તૃપ્તિ ડિમરીની ફિલ્મ 'ધડક-2' એ 'સન ઓફ સરદાર-2' ની આસપાસના હોબાળાથી દૂર રહેવા માટે એક અલગ રસ્તો પસંદ કર્યો છે. આ ફિલ્મ ફક્ત 1,000 સ્ક્રીન પર રિલીઝ થશે. માહિતી અનુસાર, નિર્માતા કરણ જોહર આ મર્યાદિત રિલીઝથી સંપૂર્ણપણે સંતુષ્ટ છે. તેઓ તેને એક લક્ષિત વ્યૂહરચના તરીકે જોઈ રહ્યા છે, જેમ ધર્મા પ્રોડક્શન્સે અગાઉ 'કેસરી-2' સાથે અપનાવી હતી.

હિન્દુસ્થાન સમાચાર / લોકેશ ચંદ્ર દુબે / સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ