નવી દિલ્હી, 29 ઓગસ્ટ (હિ.સ.). રાષ્ટ્રપતિ દ્રૌપદી મુર્મુએ કહ્યું છે કે, સેન્ટ્રલ પબ્લિક સેક્ટર એન્ટરપ્રાઇઝ (સીપીએસઈ) વર્ષ 2047 સુધીમાં વિકસિત ભારતના નિર્માણના રાષ્ટ્રીય ધ્યેયને પ્રાપ્ત કરવામાં મહત્વપૂર્ણ ભૂમિકા ભજવશે. તેમણે ભાર મૂક્યો હતો કે, જાહેર ક્ષેત્રના સાહસો (પીએસયુ) ફક્ત આર્થિક અને નાણાકીય યોગદાન સુધી મર્યાદિત નથી, પરંતુ સંતુલિત અને સમાવિષ્ટ વિકાસ સાથે રાષ્ટ્ર નિર્માણમાં પણ અગ્રણી છે.

રાષ્ટ્રપતિ મુર્મુએ, શુક્રવારે અહીં એક કાર્યક્રમમાં વર્ષ 2022-23 માટે સ્કોપ (સ્ટેન્ડિંગ કોન્ફરન્સ ઓફ પબ્લિક એન્ટરપ્રાઇઝ) એમિનન્સ એવોર્ડ્સ રજૂ કર્યા. આ પ્રસંગે, તેમણે કહ્યું કે, આ પુરસ્કારો જાહેર સાહસોના બહુપક્ષીય યોગદાનની ઉજવણી છે. કોઈપણ સારા સાહસને સામાજિક, આર્થિક, પર્યાવરણીય, તકનીકી અને નૈતિકતાના તમામ પરિમાણો પર તેના સારા પ્રદર્શન દ્વારા ઓળખવામાં આવે છે. તેમણે કહ્યું કે સ્વતંત્રતા પછી, જાહેર ક્ષેત્ર દેશના ઔદ્યોગિકીકરણ, માળખાગત વિકાસ, સામાજિક ઉત્થાન અને પ્રાદેશિક સંતુલન માટે એક શક્તિશાળી સાધન રહ્યું છે. સમય જતાં પીએસયુ ની ભૂમિકા અને અપેક્ષાઓ બદલાઈ છે, પરંતુ બદલાતા વાતાવરણમાં પણ, તેઓએ તેમના પ્રદર્શન દ્વારા રાષ્ટ્રીય લક્ષ્યો પ્રાપ્ત કરવામાં નોંધપાત્ર યોગદાન આપ્યું છે.

રાષ્ટ્રપતિએ કહ્યું કે, વિકાસના ઉત્પ્રેરક અને રાષ્ટ્ર અને સમાજની સમૃદ્ધિના આધારસ્તંભ છે. તેમણે કહ્યું કે, આ ઉપક્રમોએ સુશાસન અને પારદર્શિતાના ઘણા સારા ઉદાહરણો રજૂ કર્યા છે. તેમણે આનંદ વ્યક્ત કર્યો કે સીપીએસઈ આત્મનિર્ભર ભારત અને 'મેક ઇન ઇન્ડિયા' જેવા રાષ્ટ્રીય અભિયાનોમાં અસરકારક ભૂમિકા ભજવી રહ્યા છે. રાષ્ટ્રપતિએ ખાસ કરીને 'ઓપરેશન સિંદૂર' દરમિયાન સ્વદેશી હવાઈ સંરક્ષણ નિયંત્રણ અને રિપોર્ટિંગ સિસ્ટમ 'આકાશતીર' ની અનન્ય ક્ષમતાનો ઉલ્લેખ કર્યો અને કહ્યું કે, તેની સફળતામાં જાહેર ક્ષેત્રનું યોગદાન ગર્વની વાત છે.

રાષ્ટ્રપતિએ કહ્યું કે, કૃષિ, ખાણકામ, સંશોધન, ઉત્પાદન, પ્રક્રિયા, ઉર્જા ઉત્પાદન અને સેવાઓ જેવા મહત્વપૂર્ણ ક્ષેત્રોમાં પીએસયુ નું યોગદાન નોંધપાત્ર રહ્યું છે. પીએસયુ દરેક પડકારનો સામનો કરી રહ્યા છે અને દેશ માટે આત્મનિર્ભર નવીનતા અને તકનીકી પ્રગતિનો માર્ગ મોકળો કરી રહ્યા છે. તેમણે અપેક્ષા રાખી હતી કે પીએસયુ તેમના નિર્ણયો રાષ્ટ્ર નિર્માણ માટે સમર્પિત કરશે, તેમનું કાર્ય નૈતિકતા પર આધારિત હશે અને તેમની વિચારસરણી સમાજ સેવા અને સંવેદનશીલતાથી પ્રેરિત હશે.

સ્કોપ ની પ્રશંસા કરતા રાષ્ટ્રપતિએ કહ્યું કે, આ પ્લેટફોર્મ જાહેર ક્ષેત્રના ઉપક્રમોને ટકાઉ વિકાસ, કોર્પોરેટ ગવર્નન્સ, સામાજિક જવાબદારી અને નવીનતા જેવા ક્ષેત્રોમાં તેમના ઉત્કૃષ્ટ કાર્યને માન્યતા આપીને વધુ સારું પ્રદર્શન કરવા માટે પ્રેરિત કરે છે. ઉલ્લેખનીય છે કે, સ્કોપ એમિનન્સ એવોર્ડ એ જાહેર ક્ષેત્રના ઉપક્રમોની વિશેષ સિદ્ધિઓ અને યોગદાનને રેખાંકિત કરવાનો એક મહત્વપૂર્ણ પ્રયાસ છે.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ