મહેસાણા, 31 ઓગસ્ટ (હિ.સ.): મહેસાણા શહેરમાં રાષ્ટ્રીય રમતગમત દિવસની ઉજવણી નિમિત્તે આજે ભવ્ય સાયકલ રેલીનું આયોજન કરવામાં આવ્યું હતું. આ રેલી “હર ગલી, હર મેદાન, ખેલે સારા હિન્દુસ્તાન” થીમ હેઠળ યોજાઈ, જેનો હેતુ યુવાનોમાં રમતગમત પ્રત્યેનો ઉમંગ વધારવો, આરોગ્યપ્રદ જીવનશૈલી અપનાવવા પ્રેરણા આપવી તેમજ સમાજમાં ફિટનેસ માટે જાગૃતિ લાવવાનો હતો.

રેલીની શરૂઆત શહેરના કેન્દ્રસ્થળેથી થઈ હતી અને શહેરના મુખ્ય માર્ગો પરથી પસાર થઈને ફરીથી સમાપન સ્થળે પહોંચી હતી. સાયકલ રેલીમાં શાળા–કૉલેજના વિદ્યાર્થીઓ, ખેલાડીઓ, વિવિધ સંસ્થાઓના પ્રતિનિધિઓ તેમજ સામાન્ય નાગરિકોએ ઉત્સાહપૂર્વક ભાગ લીધો હતો. સમગ્ર માર્ગ દરમિયાન ભાગ લેનારાઓ દ્વારા રમતગમત અને સ્વાસ્થ્ય સંબંધિત સૂત્રોચ્ચાર કરવામાં આવ્યા હતા.

કાર્યક્રમ દરમિયાન અધિકારીઓએ જણાવ્યું કે રમતગમત માત્ર મનોરંજન નહીં પરંતુ શિસ્ત, સ્વાસ્થ્ય અને રાષ્ટ્રીય એકતાનું પ્રતિક છે. યુવાનોને દૈનિક જીવનમાં રમતગમત અને ફિટનેસને સ્થાન આપવા અનુરોધ કરવામાં આવ્યો હતો.

મહેસાણા ખાતે યોજાયેલી સાયકલ રેલી રાષ્ટ્રીય રમતગમત દિવસની ઉજવણીને યાદગાર બનાવતા યુવાનોમાં નવી ઊર્જા અને પ્રેરણા જગાડનાર સાબિત થઈ.

---------------

હિન્દુસ્થાન સમાચાર / RINKU AMITKUMAR THAKOR