દહેરાદૂન, નવી દિલ્હી, 31 ઓગસ્ટ (હિ.સ.). ચમોલીના સરહદી વિસ્તારને જોડતા જ્યોતિર્મઠ-મલારી રોડ પરના તમક નાલા પરનો પુલ ધોવાઈ ગયો છે, જેના કારણે રસ્તો સંપૂર્ણપણે બંધ થઈ ગયો છે. બોર્ડર રોડ ઓર્ગેનાઈઝેશન રસ્તા પર અવરજવર શરૂ કરવામાં વ્યસ્ત છે. ચારધામ જવાના માર્ગો હજુ પણ બંધ છે. હવામાન વિભાગે રાજ્યના આઠ જિલ્લામાં વરસાદ માટે ઓરેન્જ એલર્ટ જારી કર્યું છે.
રાજ્યમાં સતત મુશળધાર વરસાદને કારણે સામાન્ય લોકોના જનજીવન પર ભારે અસર પડી છે. આ દરમિયાન, ચમોલી, રુદ્રપ્રયાગ, બાગેશ્વર જિલ્લામાં આપત્તિગ્રસ્ત સ્થળોએ શોધ અને બચાવ કાર્ય ચાલી રહ્યું છે. સમયાંતરે વરસાદ શોધ અને બચાવમાં અવરોધો ઉભા કરી રહ્યો છે. રાજ્ય આપત્તિ વ્યવસ્થાપન સત્તામંડળની સૂચના પર, સ્થાનિક વહીવટીતંત્ર રાહત, શોધ અને બચાવ કાર્યમાં રોકાયેલું છે.
મોડી રાતથી ચમોલી જિલ્લામાં સતત વરસાદ ચાલુ છે. વરસાદને કારણે, જોશીમઠથી નીતિ ખીણને જોડતો રસ્તો તમક નાળા પાસેનો પુલ ધોવાઈ જવાથી સંપૂર્ણપણે બંધ થઈ ગયો છે. આ રસ્તો વ્યૂહાત્મક દૃષ્ટિકોણથી ખૂબ જ મહત્વપૂર્ણ છે. સરહદ પાર કરતા સૈનિકો માટે મહત્વપૂર્ણ વસ્તુઓ આ રસ્તા પરથી લઈ જવામાં આવે છે. આ વિસ્તારના છથી વધુ ગામોનો સંપર્ક સંપૂર્ણપણે કપાઈ ગયો છે. સ્થાનિક લોકો કહે છે કે, છેલ્લા એક મહિનાથી, વિવિધ સ્થળોએ રસ્તો તૂટવાને કારણે લોકોને વારંવાર સમસ્યાઓનો સામનો કરવો પડી રહ્યો છે. જોકે, વહીવટીતંત્રનું કહેવું છે કે, રસ્તો સરળ બનાવવા માટે બીઆરઓ ને જરૂરી સૂચનાઓ આપવામાં આવી છે.
તે જ સમયે, ઉત્તરકાશી ગંગોત્રી રાષ્ટ્રીય ધોરીમાર્ગ ધરાસુ, નેતાલા, ચડેથી ભટવાડી ખાતે કાટમાળ અને પથ્થરોને કારણે અવરોધિત છે. બીઆરઓ માર્ગ સરળ બનાવવામાં રોકાયેલ છે. આ ઉપરાંત, હર્ષિલ અને ધરાલી વચ્ચેનો રસ્તો હળવા વાહનો માટે સરળ છે. યમુનોત્રી રાષ્ટ્રીય ધોરીમાર્ગ સિલાઈ બંધ, ઝારજર ગઢ જંગલચટ્ટી, બનાસ અને નારદચટ્ટી પાસે રસ્તો બંધ છે. કુમાઉ વિભાગના શેર નાલા અને સૂર્ય નાલામાં પાણીના વધુ પડતા પ્રવાહને કારણે હલ્દવાની-ચોરગાલિયા સિતારગંજ રાજ્ય ધોરીમાર્ગ બંધ છે.
સાત જિલ્લાઓમાં ભારેથી અતિ ભારે વરસાદની ચેતવણી
હવામાન કેન્દ્ર દેહરાદૂન દ્વારા આજે દહેરાદૂન, ઉત્તરકાશી, રુદ્રપ્રયાગ, ચમોલી, બાગેશ્વર, પિથોરાગઢ, ચંપાવત અને ઉધમ સિંહ નગરમાં વરસાદ માટે ઓરેન્જ એલર્ટ જારી કરવામાં આવ્યું છે. અલકનંદા, ગંગા, યમુના, સરયુ, ગોમતી, પિંડર, કાલી નદીના કિનારે રહેતા લોકોને ચેતવણી જારી કરવામાં આવી છે. પોલીસ લાઉડસ્પીકર દ્વારા લોકોને સતત ચેતવણી આપી રહી છે. રાજ્ય આપત્તિ વ્યવસ્થાપન સત્તામંડળે જિલ્લાઓને એલર્ટ મોડમાં રહેવા સૂચના આપી છે.
હિન્દુસ્થાન સમાચાર / વિનોદ પોખરિયાલ / સંજીવ પાશ
હિન્દુસ્થાન સમાચાર / માધવી વ્યાસ
31 Aug 2025
