કાબુલ, નવી દિલ્હી, 01 સપ્ટેમ્બર (હિ.સ.). રવિવારે મોડી રાત્રે અફઘાનિસ્તાનના કુનાર પ્રાંતમાં આવેલા 6.0 ની તીવ્રતાના ભૂકંપે ભારે વિનાશ મચાવ્યો છે. અત્યાર સુધીમાં મૃત્યુઆંક 800 થી વધુ થઈ ગયો છે, જ્યારે 2800 થી વધુ લોકો ઘાયલ થયા છે. ભૂકંપનું કેન્દ્ર જલાલાબાદથી લગભગ 27 કિલોમીટર દૂર હતું. આ પછી, 5.2 ની તીવ્રતાના બે આંચકા પણ અનુભવાયા. સરકારી પ્રવક્તા ઝબીહુલ્લાહ મુજાહિદના જણાવ્યા અનુસાર, પૂર્વી અફઘાનિસ્તાનમાં આવેલા ભૂકંપમાં ઓછામાં ઓછા 812 લોકો માર્યા ગયા અને 2,817 ઘાયલ થયા.

સમગ્ર વસાહતો નાશ પામી, બચાવ કાર્યમાં મુશ્કેલીઓ

તાલિબાન સરકારના જણાવ્યા અનુસાર, નુરગલ, સાવકી, વાટપુર, મનોગી, ચોકે અને ચાપા દારા સૌથી વધુ પ્રભાવિત છે. ઘણા ગામો સંપૂર્ણપણે માટીમાં ડૂબી ગયા છે. તાલિબાનના એક વરિષ્ઠ અધિકારીએ બીબીસીને જણાવ્યું, આ વિનાશ અકલ્પનીય છે. અમારી પ્રાથમિકતા કાટમાળમાંથી મૃતદેહો કાઢવાની નહીં, પરંતુ બચી ગયેલા લોકો સુધી પહોંચવાની છે. ભૂસ્ખલન અને સતત વરસાદને કારણે મોટાભાગના રસ્તાઓ બંધ થઈ ગયા છે, જેના કારણે બચાવ ટીમોને હવાઈ પરિવહન પર આધાર રાખવો પડ્યો છે. અત્યાર સુધીમાં, લગભગ 420 ઘાયલો અને મૃતકોને હેલિકોપ્ટર દ્વારા હોસ્પિટલોમાં લઈ જવામાં આવ્યા છે.

માનવ સંકટ વધુ ઘેરું બન્યું, આંતરરાષ્ટ્રીય સહાય ધીમી પડી

યુએનના અહેવાલ મુજબ, અફઘાનિસ્તાન પહેલાથી જ ગંભીર માનવીય સંકટનો સામનો કરી રહ્યું છે, જ્યાં અડધાથી વધુ વસ્તીને તાત્કાલિક મદદની જરૂર છે. સ્થાનિક અધિકારીઓએ જણાવ્યું હતું કે, અત્યાર સુધી કોઈ વિદેશી સરકારે સીધી મોટી મદદ મોકલી નથી. જોકે, ભારતે કાબુલમાં 1,000 પરિવાર તંબુ મોકલ્યા છે અને 15 ટન ખાદ્ય પદાર્થો કુનાર પહોંચાડવાની પ્રક્રિયામાં છે. તે જ સમયે ભારતે કહ્યું છે કે, મંગળવારથી વધુ રાહત સામગ્રી મોકલવામાં આવશે. જ્યારે ચીને જરૂરિયાત મુજબ મદદ પૂરી પાડવાની જાહેરાત કરી છે.

અફઘાન સરકારે 14.6 મિલિયન ડોલરનું વચન આપ્યું છે

અફઘાન સરકારે ભૂકંપનો સામનો કરવા માટે તાત્કાલિક 14.6 મિલિયન ડોલરનું વચન આપ્યું છે. ટોલો ન્યુઝ ના અહેવાલ મુજબ, જાહેર આરોગ્ય મંત્રાલયના પ્રવક્તા શરાફત ઝમાને જાહેરાત કરી છે કે, સરકારે ભૂકંપ પીડિતોને મદદ કરવા માટે તાત્કાલિક સેવાઓ માટે 100 મિલિયન અફઘાન ડોલર (14.6 મિલિયન ડોલર) ફાળવ્યા છે. અધિકારીઓએ જણાવ્યું હતું કે, જરૂર પડ્યે રકમ વધારી શકાય છે. યુએન એજન્સીઓએ આંતરરાષ્ટ્રીય દાતાઓને ભૂકંપનો સામનો કરવા માટે સહાય વધારવા હાકલ કરી છે.

દુર્ગમ વિસ્તારોમાં ખતરો વધ્યો, રોગચાળાની શક્યતા

યુએન ઓફીસ ફોર ધ કોઓર્ડિનેશન ઓફ હ્યુમેનિટેરિયન અફેર્સ (યુએનઓસીએચએ) ના અધિકારી કેટ કેરીએ જણાવ્યું હતું કે, અસરગ્રસ્ત વિસ્તાર છેલ્લા 48 કલાકથી ભારે વરસાદનો સામનો કરી રહ્યો છે, જેના કારણે ભૂસ્ખલનનું જોખમ વધી રહ્યું છે. મોબાઇલ નેટવર્ક નિષ્ફળતા અને તૂટેલા રસ્તાઓને કારણે દૂરના ગામડાઓ સુધી પહોંચવું અત્યંત મુશ્કેલ છે. રાહત કાર્યકરો શક્ય તેટલી વહેલી તકે પ્રાણીઓના મૃતદેહ દૂર કરવામાં રોકાયેલા છે જેથી પાણીના સ્ત્રોતો પ્રદૂષિત ન થાય. અધિકારીઓ માને છે કે, બચાવ ટીમો દૂરના વિસ્તારોમાં પહોંચતા મૃત્યુઆંક વધી શકે છે.

હિન્દુસ્થાન સમાચાર / આકાશ કુમાર રાય / પ્રભાત મિશ્રા

હિન્દુસ્થાન સમાચાર / ડો.હિતેશ એન.વ્યાસ