અરૂણસિંહ રણાના 2 અને અપક્ષ મહેશ વસાવાના 3 ઉમેદવારનો થયો વિજય

રાજ્ય કક્ષાએ બહુચર્ચિત દૂધધારા ડેરીની ચૂંટણીમાં પરિણામ મેન્ડેટ આધારીત આવ્યું

ભાજપા અને સી.આર.પાટીલનો આભાર વ્યક્ત કરતા કહ્યું પાર્ટી મારા માટે શિરમોર છે ઘનશ્યામ પટેલ

પશુપાલકોના પ્રશ્નોને લઈને મક્કમતાથી લડત આપવામાં આવશે અરુણસિંહ રણાએ હારનો સ્વીકાર કર્યો

ભરૂચ 20 સપ્ટેમ્બર (હિ.સ.)

ભરૂચની દૂધધારા ડેરીની યોજાયેલ ચૂંટણીમાં વર્તમાન ચેરમેન ઘનશ્યામ પટેલ અને તેમની પેનલનો દબદબો જોવા મળ્યો હતો જ્યારે વાગરાના ધારાસભ્ય અરુણસિંહ રાણાની પેનલનો રકાશ થયો હતો.સત્યનો વિજય અને અસત્યનો પરાજય થયો છે.

ભરૂચને દૂધધારા ડેરીની રસાકસી ભરી ચૂંટણીમાં વર્તમાન ચેરમેન ઘનશ્યામ પટેલનો દબદબો જોવા મળ્યો છે .દૂધધારા ડેરીની 14 બેઠકો માટે યોજાયેલી ચૂંટણીમાં તમામ 296 મતદારોએ મત અધિકારનો ઉપયોગ કરતા સો ટકા મતદાન નોંધાયું હતું ત્યારે આજરોજ સવારથી આયોજન ભવન ખાતે મત ગણતરી પ્રક્રિયા હાથ ધરવામાં આવી હતી .ચુસ્ત પોલીસ બંદોબસ્ત વચ્ચે મત ગણતરી પ્રક્રિયાનો પ્રારંભ થયો હતો. તબક્કાવાર પરિણામો આવતા ગયા હતા .ડેરીની ચૂંટણીમાં ઘનશ્યામ પટેલની ભવ્ય જીત થઈ હતી તો તેમની પેનલના 10 ઉમેદવારોનો પણ વિજય થયો હતો. આ તરફ અપક્ષ ચૂંટણી લડી રહેલા પૂર્વ ધારાસભ્ય મહેશ વસાવાની હાર થઈ હતી તો બીજી તરફ તેમની પેનલના ત્રણ અપક્ષ ઉમેદવારોનો વિજય થયો હતો .આ તરફ ધારાસભ્ય અરુણસિંહ રણાની પેનલના ફાળે માત્ર 2 બેઠક આવી હતી.

દૂધધારા ડેરીની ચૂંટણીમાં ભાજપના જ બંને દિગ્ગજો વાગરાના ધારાસભ્ય અરુણસિંહ રણા અને નર્મદા જિલ્લા ભાજપના પૂર્વ પ્રમુખ ઘનશ્યામ પટેલ વચ્ચે જંગ હતો ચૂંટણીની જાહેરાતથી ભારે રસાકસી ભર્યો માહોલ જોવા મળી રહ્યો હતો પરંતુ 17 વર્ષથી ડેરીના ચેરમેન એવા ઘનશ્યામ પટેલે તેમનું વર્ચસ્વ સાબિત કરી બતાવ્યું હતું. પરિણામો અંગે ઘનશ્યામ પટેલે જણાવ્યું હતું કે મતદારોએ ધાકધમકી અને પૈસાની રાજનીતિને જાકારો આપ્યો છે તેમની ભવ્ય જીત થતા આગામી સમયમાં ડેરીના વિકાસ માટે કાર્યો કરવામાં આવશે.બોનસ પણ મળશે .હું ચેરમેન નિમિત્ત માત્ર છુ પરંતુ તમે બધા જ ચેરમેન છો .ભાજપા અને સી.આર.પાટીલનો આભાર વ્યક્ત કરતા કહ્યું પાર્ટી મારા માટે શિરમોર છે.

આ તરફ ચેરમેન પદના દાવેદાર ગણાતા જીગ્નેશ પટેલની પણ હાર થઈ હતી. ધારાસભ્ય અરૂણસિંહ રણાએ મીડિયા સમક્ષ જણાવ્યું હતું કે મોટાભાગની તમામ બેઠકો પર હારનું અંતર માત્ર બેથી ત્રણ મતનું જ છે ત્યારે આવનારા સમયમાં પશુપાલકોના પ્રશ્નોને લઈને મક્કમતાથી લડત આપવામાં આવશે અરુણસિંહ રણાએ હારનો સ્વીકાર કર્યો હતો.

દૂધધારા ડેરીની ચૂંટણીની મતગણતરીમાં એક ટ્વીસ્ટ પણ જોવા મળ્યો હતો. વાગરા બેઠક પર બે ઉમેદવારો વચ્ચે ટાઈ પડી હતી જેમાં નાની બાળકી પાસે ચિઠ્ઠી ઉપાડવામાં આવતા ઘનશ્યામ પટેલની પેનલના ઉમેદવાર સંજયસિંહ રાજનો ભવ્ય વિજય થયો હતો.તમામ વિજેતા ઉમેદવારોને તેમના ટેકેદારોએ વધાવી લીધા હતા. ફટાકડા ફોડી મીઠાઈ વહેંચી જીતનું જશ્ન મનાવાયુ હતું.

દૂધધારા ડેરીની ચૂંટણી ભાજપના જ બે દિગ્ગજ નેતાઓ વચ્ચે અસ્તિત્વનો જંગ બની ગઈ હતી જેમાં છેલ્લા 17 વર્ષથી ચેરમેન એવા ઘનશ્યામ પટેલે ફરી બાજી મારી છે ત્યારે પુનઃ એક વાર તેમનું ચેરમેન બનવું નિશ્ચિત લાગી રહ્યું છે.

ભરૂચ દૂધધારા ડેરી ફાઈનલ પરિણામ કુલ બેઠક 15 જેમાંથી અરૂણસિંહ રણાની પેનલને 02,ઘનશ્યામ પટેલની પેનલને ફાળે 10 બેઠક જ્યારે મહેશ વસાવાની પેનલના 03 ઉમેદારોની જીત થઈ હતી જેમાં બહુમતી ઘનશ્યામ પટેલની મળી છે.

---------------

હિન્દુસ્થાન સમાચાર / અતુલકુમાર પટેલ