વોશિંગ્ટન, નવી દિલ્હી, 21 સપ્ટેમ્બર (હિ.સ.): અમેરિકી પ્રમુખ ડોનાલ્ડ ટ્રમ્પે, બગરામ એર બેઝ અંગે ફરી એકવાર અફઘાનિસ્તાનને ધમકી આપી છે કે, જો આ એર બેઝ અમેરિકાને પરત નહીં કરવામાં આવે તો તેના પરિણામો ભયંકર આવશે. બ્રિટનની તાજેતરની મુલાકાત દરમિયાન, ટ્રમ્પે જણાવ્યું હતું કે, તેમની સરકાર અફઘાનિસ્તાનમાં બગરામ એર બેઝ મેળવવાનો પ્રયાસ કરી રહી છે. જો કે, આ પ્રયાસોને પડકારતા, અફઘાનિસ્તાનમાં વર્તમાન તાલિબાન શાસને જણાવ્યું હતું કે, અફઘાન ભૂમિએ ક્યારેય વિદેશી દળોને સ્વીકાર્યા નથી. 2021 માં, અમેરિકાએ અણધારી રીતે રાતોરાત અફઘાનિસ્તાનમાંથી તેના સૈનિકો પાછા ખેંચી લીધા હતા, ત્યારબાદ તાલિબાન ત્યાં સત્તામાં છે.

અમેરિકી પ્રમુખ ડોનાલ્ડ ટ્રમ્પે, અફઘાન તાલિબાન શાસનને ધમકી આપી છે કે, જો બગરામ એર બેઝ તેના સર્જક, યુએસને પરત નહીં કરવામાં આવે તો તેના પરિણામો ભયંકર હશે. તેમણે ટ્રુથ સોશિયલ પર લખ્યું હતું કે જો બગ્રામ એર બેઝ તેના સર્જક, યુએસને પરત નહીં કરવામાં આવે તો તેના પરિણામો ભયંકર હશે.

અગાઉ, બ્રિટનની તેમની મુલાકાત દરમિયાન, ટ્રમ્પે બ્રિટિશ વડા પ્રધાન કીર સ્ટારમર સાથે એક પ્રેસ કોન્ફરન્સમાં જણાવ્યું હતું કે, યુએસ બગરામ એર બેઝ ફરીથી મેળવવાનો પ્રયાસ કરી રહ્યું છે. ટ્રમ્પે દાવો કર્યો હતો કે, આ બેઝ ચીનના પરમાણુ શસ્ત્રો ઉત્પાદન સ્થળથી માત્ર એક કલાકના અંતરે છે, જે તેને અમેરિકા માટે વ્યૂહાત્મક રીતે મહત્વપૂર્ણ બનાવે છે.

અમેરિકાએ વીસ વર્ષ સુધી અફઘાનિસ્તાનના સૌથી મોટા લશ્કરી બેઝ, બગરામ એર બેઝનો ઉપયોગ કર્યો હતો. 2021 માં, વ્યાપક અરાજકતા વચ્ચે અમેરિકન સૈન્યએ રાતોરાત અફઘાનિસ્તાનમાંથી અણધારી રીતે પાછી ખેંચી લીધી. આ પછી, કાબુલ એરપોર્ટ પર થયેલા આત્મઘાતી હુમલામાં 13 અમેરિકન સૈનિકો સહિત 170 લોકો માર્યા ગયા. આ સમગ્ર ઘટના દરમિયાન, બે દાયકા પછી અફઘાનિસ્તાનમાં તાલિબાન શાસન પાછું આવ્યું.

અમેરિકાએ જે અરાજકતાપૂર્ણ રીતે અફઘાનિસ્તાનમાંથી રાતોરાત પોતાના સૈનિકો પાછા ખેંચી લીધા, બધા સાધનો છોડી દીધા, તેની વ્યાપક ટીકા થઈ હતી. હવે, ટ્રમ્પ તેમના પુરોગામી, બાઈડેન વહીવટના આ નિર્ણયની ટીકા કરી રહ્યા છે, અને કહી રહ્યા છે કે તેઓ પણ તેમના કાર્યકાળ દરમિયાન અફઘાનિસ્તાનમાંથી પોતાના સૈનિકો પાછા ખેંચવાના હતા, પરંતુ તાકાત અને ગૌરવ સાથે. ટ્રમ્પ કહે છે કે, અમેરિકાએ બગરામ એર બેઝને મફતમાં તાલિબાનને સોંપી દીધો તે એક મોટી ભૂલ હતી. ટ્રમ્પનો દાવો છે કે, અફઘાનિસ્તાનમાંથી અમેરિકાના આ પાછું ખેંચવાથી રશિયન રાષ્ટ્રપતિ પુતિનને યુક્રેન પર હુમલો કરવા માટે હિંમત મળી.

હિન્દુસ્થાન સમાચાર / સંજીવ પાશ

હિન્દુસ્થાન સમાચાર / માધવી વ્યાસ