સોમનાથ, 26 સપ્ટેમ્બર (હિ.સ.) સોમનાથ સ્વસ્થ નારી સશક્ત પરિવાર અભિયાન અંતર્ગત જિલ્લાના વિવિધ આરોગ્ય કેન્દ્રો ખાતે મહિલાઓ માટે મેડિકલ કેમ્પનું આયોજન કરવામાં આવે છે. આ અભિયાન હેઠળ વિવિધ સામૂહિક અને પ્રાથમિક આરોગ્ય કેન્દ્ર ખાતે મહિલાઓ માટે મેડિકલ કેમ્પ યોજાઇ રહ્યાં છે. આ અભિયાન અંતર્ગત ઉના તાલુકાના સામૂહિક અને પ્રાથમિક આરોગ્ય કેન્દ્ર ખાતે મહિલાઓ અને બાળકોની યોગ્ય તપાસ કરી જરૂરી દવા આપવામાં આવી હતી.

આ અભિયાન અંતર્ગત ઉનાના આયુષ્માન આરોગ્ય મંદિર ખાતે જનરલ મહિલા કેમ્પ યોજાયો હતો. તે ઉપરાંત પ્રાથમિક આરોગ્ય કેન્દ્ર, ભાચા ખાતે મહિલાઓ અને બાળકો માટે મેડિકલ કેમ્પનું આયોજન કરવામાં આવ્યું હતું.

આ મેડિકલ કેમ્પમાં સ્ત્રી રોગ નિષ્ણાત ડો.નલિન કાતરિયા અને બાળરોગ નિષ્ણાત ડો.કિરણ કાતરિયા દ્વારા ૮૧ સગર્ભા મહિલાઓને યોગ્ય સારવાર આપી જરૂરી માર્ગદર્શન આપવામાં આવ્યું હતું. મહિલાઓ સાથે જ ૪૧ બાળકોને તપાસ કરી જરૂરી દવા આપવામાં આવી હતી.

હિન્દુસ્થાન સમાચાર / ભરતસિંહ જાદવ