નવી દિલ્હી, 12 જાન્યુઆરી (હિ.સ.). નાણામંત્રી નિર્મલા સીતારમણ, 1 ફેબ્રુઆરીએ સવારે 11 વાગ્યે લોકસભામાં નાણાકીય વર્ષ 2026-27 માટેનું કેન્દ્રીય બજેટ રજૂ કરશે. સામાન્ય રીતે કેન્દ્રીય બજેટ 1 ફેબ્રુઆરીએ રજૂ કરવામાં આવે છે, પરંતુ આ વર્ષે, રવિવારની તારીખ અંગેની અનિશ્ચિતતાને કારણે, લોકસભાના અધ્યક્ષ ઓમ બિરલાએ સોમવારે તારીખની પુષ્ટિ કરી.

સંસદીય બાબતોના મંત્રી કિરેન રિજિજુએ એક્સ પોસ્ટ પર લખ્યું કે, ભારત સરકારની ભલામણ પર રાષ્ટ્રપતિ દ્રૌપદી મુર્મુએ, બજેટ સત્ર 2026 માટે સંસદના બંને ગૃહો બોલાવવાને મંજૂરી આપી છે. આ સત્ર 28 જાન્યુઆરીથી શરૂ થશે અને 2 એપ્રિલ સુધી ચાલુ રહેશે. પ્રથમ તબક્કો 13 ફેબ્રુઆરીએ સમાપ્ત થશે. બીજો તબક્કો 9 માર્ચથી શરૂ થશે. આ પહેલા, આર્થિક સર્વેક્ષણ 2025-26 લોકસભામાં 29 જાન્યુઆરીએ રજૂ કરવામાં આવશે.

1 ફેબ્રુઆરીએ કેન્દ્રીય બજેટ રજૂ કરવાની પરંપરા 2017 માં શરૂ થઈ હતી, પરંતુ રવિવારે બજેટ રજૂ કરવાનું ભાગ્યે જ બને છે. અગાઉ, 28 ફેબ્રુઆરી, 1999 ના રોજ, તત્કાલીન નાણામંત્રી યશવંત સિંહાએ રવિવારે કેન્દ્રીય બજેટ રજૂ કર્યું હતું. 2017 માં, કેન્દ્ર સરકારે નવા નાણાકીય વર્ષની શરૂઆત પહેલાં, 1 એપ્રિલ, ભંડોળનો યોગ્ય ઉપયોગ સુનિશ્ચિત કરવા માટે બજેટની તારીખ 28 ફેબ્રુઆરીથી બદલીને 1 ફેબ્રુઆરી કરી હતી.

જ્યારે કેન્દ્રીય નાણામંત્રી નિર્મલા સીતારમણ આ વર્ષે બજેટ રજૂ કરશે, ત્યારે તે તેમનું સતત નવમું બજેટ હશે. આનાથી તેઓ ભૂતપૂર્વ વડા પ્રધાન મોરારજી દેસાઈના 10 વખત બજેટ રજૂ કરવાના રેકોર્ડની ખૂબ નજીક પહોંચી જશે. જોકે, નિર્મલા સીતારમણ, પહેલાથી જ એક જ નાણાંમંત્રી તરીકે સૌથી વધુ સતત બજેટ રજૂ કરવાનો રેકોર્ડ ધરાવે છે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / માધવી વ્યાસ