મહેસાણા, 12 જાન્યુઆરી (હિ.સ.) જિલ્લા કલેક્ટરે આજ રોજ સવાલા ગામ ની મુલાકાત લઈ ગામના વહીવટી રેકર્ડની વિગતવાર ચકાસણી કરી હતી. આ દરમિયાન ગામ રેકર્ડનું નિરીક્ષણ કરી એપેન્ડીક્ષ-એ ફોર્મ ભરી વહીવટી પ્રક્રિયાની સમીક્ષા કરવામાં આવી. પંચાયત કચેરીમાં રાખવામાં આવેલા દસ્તાવેજો, નોંધપોથીઓ અને રેકર્ડની સાચવણી અંગે પણ કલેક્ટરે માહિતી મેળવી.
મુલાકાત દરમિયાન કલેક્ટરે ગ્રામજનો સાથે ખુલ્લો અને સીધો સંવાદ કર્યો. સંવાદમાં આરોગ્ય સેવાઓની ઉપલબ્ધતા, શિક્ષણની ગુણવત્તા, બાળકોના પોષણ સંબંધિત યોજનાઓ, મધ્યાહન ભોજન યોજનાની અમલવારી, જાહેર પુરવઠા વ્યવસ્થા તેમજ મહેસુલી બાબતો અંગે વિસ્તૃત ચર્ચા કરવામાં આવી. ગ્રામજનો દ્વારા રજૂ કરાયેલા પ્રશ્નો અને સૂચનોને ધ્યાનપૂર્વક સાંભળી સંબંધિત અધિકારીઓને યોગ્ય કાર્યવાહી કરવા સૂચનાઓ આપવામાં આવી.
આ ઉપરાંત ગામમાં ચાલી રહેલા તથા પ્રસ્તાવિત વિવિધ વિકાસના કામો અંગે પણ ચર્ચા કરવામાં આવી. રસ્તા, પાણી પુરવઠો, સ્વચ્છતા, લાઇટિંગ, શાળા તથા આરોગ્ય સુવિધાઓ જેવી મૂળભૂત વ્યવસ્થાઓની હાલની સ્થિતિની સમીક્ષા કરી, વિકાસ કાર્ય સમયસર અને ગુણવત્તાપૂર્વક પૂર્ણ થાય તે માટે ભાર મૂકવામાં આવ્યો.
કલેક્ટરે જણાવ્યું હતું કે સરકારની યોજનાઓનો લાભ દરેક નાગરિક સુધી પહોંચે અને ગામડાંના સર્વાંગી વિકાસ માટે વહીવટ અને જનસહભાગિતા બંને જરૂરી છે. આવી મુલાકાતો દ્વારા ગામની વાસ્તવિક સમસ્યાઓ જાણી વિકાસને વધુ ગતિ આપવામાં આવશે.
---------------
હિન્દુસ્થાન સમાચાર / RINKU AMITKUMAR THAKOR
