જામનગર, 18 જાન્યુઆરી (હિ.સ.) : મહારાષ્ટ્રની સ્થાનિક સ્વરાજ્યની ચૂંટણીઓમાં ભારતીય જનતા પાર્ટીના ગઠબંધનના વિજયને વધાવવા માટે શહેર ભાજપ જામનગર દ્વારા શહેર ભાજપ કાર્યાલય ખાતે ઉજવણી કરવામાં આવી હતી. આ ઉજવણીમાં કાર્યકર્તાઓમાં ભારે ઉત્સાહ જોવા મળ્યો હતો.

આ ઉજવણીમાં ભારતીય જનતા પાર્ટી શહેર ભાજપ અધ્યક્ષ બીનાબેન કોઠારી, ધારાસભ્ય દિવ્યેશભાઈ અકબરી, મહામંત્રી વિજયસિંહ જેઠવા, મેયર વિનોદ ખીમસુરિયા, ડેપ્યુટી મેયર ક્રિષ્નાબેન સોઢા, શાસકપક્ષ નેતા આશિષ જોશી, સ્ટેન્ડિંગ કમિટી ચેરમેન નિલેશ કગથરા, દંડક કેતન નાખવા, શિક્ષણ સમિતિ ચેરમેન પરષોત્તમભાઈ કકનાણા સહિત પૂર્વ ધારાસભ્યો, પૂર્વ પ્રમુખો, પૂર્વ મેયરો, કોર્પોરેટરો, વોર્ડ સમિતિના સભ્યો, વોર્ડ પ્રભારીઓ અને વિવિધ સેલ-મોરચાના અધ્યક્ષો સહિત મોટી સંખ્યામાં કાર્યકર્તાઓ ઉપસ્થિત રહ્યા હતા.

મહારાષ્ટ્રમાં બૃહન્મુંબઈ મ્યુનિસિપલ કોર્પોરેશન (BMC) સહિત કુલ 29 મહાનગરપાલિકાઓ માટે 15 જાન્યુઆરી, 2026ના રોજ મતદાન યોજાયું હતું. 16 જાન્યુઆરી, 2026ના રોજ મતગણતરી બાદ પરિણામો જાહેર કરવામાં આવ્યા હતા. આ ચૂંટણીમાં ભાજપ ગઠબંધનનો વિજય નિશ્રિત લાગી રહ્યો છે. હાલ સુધીમાં ભારતીય જનતા પાર્ટી (ભાજપ) એ 137 બેઠકો પર આગળ છે, જ્યારે એકનાથ શિંદેની શિવસેનાને 90 બેઠકો મળી હતી.

મહાવિકાસ આઘાડી (MVA) માં શિવસેના (UBT), કોંગ્રેસ અને શરદ પવારની NCP નો સમાવેશ થાય છે. ઉદ્ધવ ઠાકરેની શિવસેનાએ રાજ ઠાકરેની MNS સાથે પણ કેટલીક બેઠકો પર ગઠબંધન કર્યું હતું. કુલ 227 વોર્ડ માટે યોજાયેલી આ ચૂંટણીમાં બહુમતી માટે 114 બેઠકો જરૂરી હતી અને મુંબઈમાં આશરે 52.94% મતદાન નોંધાયું હતું.

BMC એશિયાની સૌથી મોટી સ્થાનિક સ્વરાજ્યની સંસ્થા છે, જેનું બજેટ આશરે 74,000 કરોડ રૂપિયા છે, જે કેટલાક નાના રાજ્યોના બજેટ કરતાં પણ વધુ છે. છેલ્લા 25 વર્ષથી BMC પર શિવસેનાનું વર્ચસ્વ હતું, પરંતુ પક્ષના ભાગલા પડ્યા બાદ શિંદે જૂથ અને ઉદ્ધવ જૂથ બંને માટે આ ચૂંટણી પ્રતિષ્ઠાનો જંગ બની હતી. મુંબઈના ઘાટકોપર, મુલુન્ડ, કાંદિવલી અને બોરીવલી જેવા વિસ્તારોમાં ગુજરાતી મતદારોની ભૂમિકા નિર્ણાયક રહી હતી.

---------------

હિન્દુસ્થાન સમાચાર / Dhaval Nilesh bhai bhatt