નવી દિલ્હી, 18 જાન્યુઆરી (હિ.સ.): આંતરરાષ્ટ્રીય નાણાકીય ભંડોળ (આઈએમએફ) એ, ચાલુ નાણાકીય વર્ષ 2025-26 માટે ભારત માટે જીડીપી વૃદ્ધિ અનુમાન વધારીને 7.3 ટકા કર્યું છે. આ તેના ઓક્ટોબર અંદાજ કરતા 0.7 ટકા વધારે છે.

સોમવારે જાહેર કરાયેલા તેના વર્લ્ડ ઇકોનોમિક આઉટલુક રિપોર્ટમાં, વોશિંગ્ટન સ્થિત બહુપક્ષીય નાણાકીય સંસ્થા, આંતરરાષ્ટ્રીય નાણાકીય ભંડોળે જણાવ્યું હતું કે ચાલુ નાણાકીય વર્ષ 2025-26 માટે આર્થિક વૃદ્ધિમાં વધારો ત્રીજા ક્વાર્ટરમાં અપેક્ષા કરતાં વધુ સારા આર્થિક પ્રદર્શન અને ચોથા ક્વાર્ટરમાં મજબૂત ગતિને કારણે છે. અગાઉ, આઈએમએફ એ ઓક્ટોબરમાં ભારતનો જીડીપી વૃદ્ધિ દર 6.6 ટકા રહેવાનો અંદાજ મૂક્યો હતો.

અહેવાલમાં કહેવામાં આવ્યું છે કે, આગામી નાણાકીય વર્ષ 2026-27 માટે ભારતનો જીડીપી વૃદ્ધિ આગાહી પણ અગાઉના 6.2 ટકાથી વધારીને 6.4 ટકા કરવામાં આવી છે. જોકે, આંતરરાષ્ટ્રીય નાણાકીય ભંડોળ (આઈએમએફ) એ તેના અહેવાલમાં જણાવ્યું છે કે, આગામી સમયગાળામાં ભારતનો વિકાસ દર થોડો નરમ પડી શકે છે. ચક્રીય અને અસ્થાયી પરિબળોની અસર ધીમે ધીમે ઓછી થતી જાય છે, તેથી નાણાકીય વર્ષ 2027-28 માં ભારતનો વિકાસ દર 6.4 ટકા રહેવાનો અંદાજ છે.

સરકાર દ્વારા જાહેર કરાયેલા આંકડા અનુસાર, ચાલુ નાણાકીય વર્ષ 2025-26 ના પ્રથમ છ મહિનામાં (એપ્રિલ-સપ્ટેમ્બર) ભારતનો જીડીપી વૃદ્ધિ દર 8 ટકા હતો. જુલાઈ-સપ્ટેમ્બર ક્વાર્ટરમાં આ વૃદ્ધિ 8.2 ટકા નોંધાઈ હતી. તેના પ્રથમ એડવાન્સમેન્ટમાં, આંકડા મંત્રાલયે ચાલુ નાણાકીય વર્ષમાં ભારતીય અર્થતંત્ર 7.4 ટકાના દરે વૃદ્ધિ પામવાનો અંદાજ મૂક્યો છે. નાણાકીય વર્ષ 2024-25 માં આર્થિક વિકાસ દર 6.5 ટકા હતો.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / ડો.હિતેશ એન.વ્યાસ