અમરેલી, 03 જાન્યુઆરી (હિ.સ.) અમરેલી જિલ્લા મેજિસ્ટ્રેટશ્રી તથા પોલીસ અધિક્ષકશ્રીના માર્ગદર્શન અને આદેશ હેઠળ જિલ્લામાં કાયદો-વ્યવસ્થાની સ્થિતિ મજબૂત બનાવવા માટે પાસા (PASA) અધિનિયમ હેઠળ મહત્વપૂર્ણ કાર્યવાહી હાથ ધરવામાં આવી છે. જાહેર શાંતિ અને સલામતી માટે જોખમરૂપ બની રહેલા ભયજનક વ્યક્તિ સામે અમરેલી એલ.સી.બી. તેમજ બગસરા પોલીસે સંયુક્ત રીતે કડક પગલાં લીધા છે.
આ કાર્યવાહી દરમિયાન નદિમ નામના આરોપીને ઝડપી લેવામાં આવ્યો હતો. આરોપી વિરુદ્ધ અગાઉથી ગુનાહિત પ્રવૃત્તિઓ, જાહેરમાં ભય ફેલાવવાના બનાવો તેમજ શાંતિ ભંગની ફરિયાદો નોંધાયેલી હતી. ગુપ્ત માહિતી અને પોલીસ તપાસના આધારે નદિમને પાસા હેઠળ અટકાયત કરવા માટે યોગ્ય ઠરાવવામાં આવ્યો.
જિલ્લા મેજિસ્ટ્રેટશ્રી દ્વારા પાસા હેઠળ અટકાયતનો હુકમ આપવામાં આવતા આરોપી નદિમને મધ્યસ્થ જેલ, સુરત ખાતે ધકેલવામાં આવ્યો છે. અમરેલી એલ.સી.બી. અને બગસરા પોલીસની ઝડપી અને અસરકારક કામગીરીથી વિસ્તારમાં અસામાજિક તત્વોમાં કડક સંદેશો પહોંચ્યો છે.
પોલીસ વિભાગે સ્પષ્ટ કર્યું છે કે જાહેર સલામતી સાથે કોઈ સમાધાન કરવામાં આવશે નહીં અને કાયદો-વ્યવસ્થાને ખોરવતા તત્વો સામે આવી કાર્યવાહી ભવિષ્યમાં પણ સતત ચાલુ રહેશે. નાગરિકોને શાંતિ જાળવવામાં સહકાર આપવા તથા કોઈ શંકાસ્પદ પ્રવૃત્તિ જણાય તો તરત પોલીસને જાણ કરવાની અપીલ કરવામાં આવી છે.
---------------
હિન્દુસ્થાન સમાચાર / Gondaliya Abhishek Nandrambhai
