અમરેલી, 03 જાન્યુઆરી (હિ.સ.) અમરેલી તાલુકાના ખીજડીયા ગામની અધિકારીઓ દ્વારા વિઝિટ કરવામાં આવી હતી. આ મુલાકાત દરમિયાન ગામના સરપંચશ્રી તેમજ ગ્રામજનો સાથે બેઠકો યોજી ગામની સુરક્ષા અને કાયદો-વ્યવસ્થા સંબંધિત વિવિધ મુદ્દાઓ પર વિસ્તૃત સંવાદ કરવામાં આવ્યો.

સંવાદ દરમિયાન ગામમાં રાત્રી પેટ્રોલિંગની વ્યવસ્થા, અજાણ્યા વ્યક્તિઓની અવરજવર, મહિલાઓ અને બાળકોની સુરક્ષા, રસ્તાઓ પર ટ્રાફિક શિસ્ત, તેમજ અસામાજિક પ્રવૃત્તિઓ અંગે નાગરિકોના અભિપ્રાયો અને સૂચનો લેવામાં આવ્યા. ગ્રામજનોએ પોતાની સમસ્યાઓ ખુલ્લેઆમ રજૂ કરી, જેને ધ્યાનપૂર્વક સાંભળીને તાત્કાલિક અને દીર્ઘકાળીન ઉકેલ માટે ચર્ચા કરવામાં આવી.

અધિકારીઓએ નાગરિકોને કાયદાકીય જાગૃતિ આપી અને કોઈ પણ શંકાસ્પદ પ્રવૃત્તિ જણાય તો તરત પોલીસને જાણ કરવાની અપીલ કરી. સાથે જ, ગામમાં પરસ્પર સહકાર અને સંકલનથી સુરક્ષા જાળવવાની જરૂરિયાત પર ભાર મૂકવામાં આવ્યો.

આ વિઝિટથી પોલીસ અને પ્રજાજનો વચ્ચે વિશ્વાસનો સેતુ વધુ મજબૂત બન્યો છે. આવા સંવાદાત્મક કાર્યક્રમો દ્વારા ગ્રામ્ય વિસ્તારોમાં શાંતિ, સલામતી અને સકારાત્મક વાતાવરણ જાળવવાનો ઉદ્દેશ સફળતાપૂર્વક આગળ વધારવામાં આવી રહ્યો છે.

---------------

હિન્દુસ્થાન સમાચાર / Gondaliya Abhishek Nandrambhai