રિયાદ (સૌદી અરબ), નવી દિલ્હી, 11 ઓક્ટોબર (હિ.સ.). સાઉદી અરબની રાજધાની રિયાદના કિંગ ખાલિદ આંતરરાષ્ટ્રીય હવાઈ મથક પર, શનિવારે થયેલા હુમલામાં એક અમેરિકી સહિત ઓછામાં ઓછા 12 લોકો માર્યા ગયા અને 309 અન્ય ઘાયલ થયા. સાઉદી અરબના જનરલ ઓથોરિટી ઓફ સિવિલ એવિએશન (નાગરિક ઉડ્ડયન મહાસત્તા મંડળ) એ જણાવ્યું કે મૃતકોમાં ચાર સાઉદી નાગરિકો, બે બાંગ્લાદેશી અને ઇજિપ્ત, જોર્ડન, સીરિયા, પેલેસ્ટાઇન અને સુદાનનો એક-એક વ્યક્તિ સામેલ છે. અધિકારીઓએ સોશિયલ મીડિયા પોસ્ટમાં જણાવ્યું કે ઘાયલોની સ્થાનિક હોસ્પિટલોમાં સારવાર ચાલી રહી છે. અનેક લોકોની હાલત ગંભીર છે. ઈરાન સમર્થિત આતંકવાદી જૂથ હુતીએ આ હુમલાની જવાબદારી લીધી નથી.

ગલ્ફ ન્યૂઝ અને સીબીએસ ન્યૂઝના અહેવાલ મુજબ, હુમલા બાદ હવાઈ મથકનું કામકાજ રોકી દેવામાં આવ્યું. હવાઈ મથકને નુકસાન થયું છે. અધિકારીઓ તેનું આકલન કરી રહ્યા છે. અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે તેઓ જલદી જ કોઈને કોઈ નિર્ણય લેશે. વિદેશ સચિવ માર્કો રુબિયોએ કહ્યું, અમેરિકા સાઉદી અરબ પર હુતીના હુમલાઓની સખત નિંદા કરે છે. તેમણે કહ્યું કે રિયાદ એરપોર્ટ પર થયેલા હુમલામાં એક અમેરિકી નાગરિક સહિત અનેક નિર્દોષ લોકોના જીવ ગયા. વિદેશ વિભાગના એક પ્રવક્તાએ કહ્યું કે ટ્રમ્પ પ્રશાસને સાઉદી અરબના અધિકારીઓ સાથે વાત કરી છે.

આતંકવાદી સંગઠન હુતીએ હજુ સુધી શનિવારના હુમલાની જવાબદારી લીધી નથી. જોકે, હુતીએ આ સપ્તાહની શરૂઆતમાં આ હવાઈ મથક પર હુમલાનો દાવો કર્યો હતો. હુમલામાં એક પાયલટ સહિત ત્રણ સાઉદી માર્યા ગયા હતા. જણાવવામાં આવ્યું છે કે શનિવારે એક મિસાઈલે ઘરેલું ફ્લાઈટ્સના ટર્મિનલ 3 અને 4 વાળા એક સંકુલ પર હુમલો કર્યો. યમનમાં સંયુક્ત રાષ્ટ્રના વિશેષ દૂત હેન્સ ગ્રુન્ડબર્ગે શનિવારના હુમલાને પ્રાદેશિક સુરક્ષા માટે ગંભીર ખતરો ગણાવ્યો છે.

આ હુમલા બાદ ફ્લાઇટરડાર 24 ટ્રેકરે જણાવ્યું કે ફ્લાઈટ્સને બીજી જગ્યાએ ડાયવર્ટ કરી દેવામાં આવી. અમેરિકા, બ્રિટન, જર્મની, ઓસ્ટ્રેલિયા અને કેનેડા જેવા દેશોએ નાગરિકોને એરપોર્ટથી દૂર રહેવાની ચેતવણી આપી. રિયાદ એરપોર્ટ પર હુમલો એવા સમયે થયો, જ્યારે મોટી આંતરરાષ્ટ્રીય ઊર્જા પરિષદની તૈયારી કરવામાં આવી રહી હતી. આ પરિષદ રવિવારે યોજાવાની છે.

ફ્લાઇટ-ટ્રેકિંગ સાઇટ ફ્લાઇટઅવેર મુજબ, છેલ્લા 24 કલાકમાં રિયાદ એરપોર્ટ પર ઓછામાં ઓછી 291 ફ્લાઈટ્સ રદ કરવામાં આવી. તાજા હુમલા પહેલાં એર ઇન્ડિયા, ફ્લાયદુબઈ, લુફ્થાંસા ગ્રુપ અને પાકિસ્તાન ઇન્ટરનેશનલ એરલાઇન્સ એ એરલાઇન્સમાં સામેલ છે જેમણે અલગ-અલગ સમય માટે રિયાદ અને અન્ય સાઉદી એરપોર્ટ્સથી આવતી-જતી ફ્લાઈટ્સને સ્થગિત કરી દીધી હતી.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ