નવી દિલ્હી, 13 ઓક્ટોબર ( હિ.સ.) કેન્દ્રીય નાણાં મંત્રી નિર્મલા સીતારમણે મંગળવારે કહ્યું કે, છેલ્લા દોઢ વર્ષમાં રૂપિયામાં નોંધપાત્ર ઘટાડો થયો છે. તેમણે કહ્યું હતું કે, ભારતીય રિઝર્વ બેંક (આરબીઆઇ) સ્થાનિક ચલણમાં અતિશય અસ્થિરતાને અંકુશમાં લેવાના પ્રયાસો ચાલુ રાખશે.

કેન્દ્રીય નાણાં મંત્રીએ, નવી દિલ્હીમાં આયોજિત બ્લૂમબર્ગ ન્યૂ ઇકોનોમી ફોરમ-2026માં પેનલ ચર્ચા દરમિયાન આ વાત કહી હતી. તેમણે સ્પષ્ટતા કરી હતી કે, આરબીઆઇ ડોલર સામે રૂપિયાનું કોઈ ચોક્કસ મૂલ્ય નક્કી કરવા કે, બચાવવાનો પ્રયાસ કરી રહ્યું નથી, પરંતુ તેનો મુખ્ય ઉદ્દેશ માત્ર બજારમાં અસ્થિરતાને નિયંત્રિત કરવાનો છે. તેમણે કહ્યું હતું કે, આરબીઆઇના તાજેતરના પગલાંથી રૂપિયાને ટેકો મળ્યો છે. સોમવારે રૂપિયો 1 ટકા વધ્યો હતો, જ્યારે મંગળવારે પ્રારંભિક વેપારમાં તે ડોલર દીઠ 94.96 પર મજબૂત થયો હતો.

તેમણે ધ્યાન દોર્યું હતું કે, ભારતની આર્થિક મૂળભૂત બાબતો મજબૂત છે, જ્યારે દેશ પાસે પૂરતા પ્રમાણમાં વિદેશી હૂંડિયામણનો ભંડાર છે. નાણાં મંત્રીએ કહ્યું કે રૂપિયાની અસ્થિરતાનું મુખ્ય કારણ બાહ્ય પડકારો છે, જ્યારે કેન્દ્ર સરકાર દેશની અંદર વ્યાપક આર્થિક મૂળભૂત બાબતોને મજબૂત રાખવા માટે કામ કરી રહી છે. તેમણે ધ્યાન દોર્યું હતું કે રાજકોષીય શિસ્ત રોકાણકારો માટે ચિંતાનો વિષય ન હોવો જોઈએ. જોકે, ભારતીય રૂપિયો ડોલરને સતત પડકાર આપી રહ્યો હોવાથી સરકાર તેની નોંધ લેશે.

રિઝર્વ બેન્કે ગયા અઠવાડિયે રૂપિયાની મંદીને રોકવા માટે અનેક પગલાંની જાહેરાત કરી હતી. કેન્દ્રીય બેંકે સરકારી માલિકીની તેલ અને ગેસ માર્કેટિંગ કંપનીઓ માટે એક વિશેષ સુવિધા શરૂ કરવાની જાહેરાત કરી હતી, જે હાજર બજારમાંથી ડોલર માટેની તેમની માંગને દૂર કરશે. વધુમાં, રૂપિયો સંબંધિત અટકળોને અંકુશમાં રાખવા માટે વિદેશી ચલણ ડેરિવેટિવ્ઝ ટ્રેડિંગ માટેના નિયમો, કડક કરવામાં આવ્યા હતા. આરબીઆઇએ બેંકોને 200,000 ડોલરથી વધુની ડોલરની ખરીદી પર 20 ટકા અનામતની જોગવાઈ કરવા પણ કહ્યું છે.

હિન્દુસ્થાન સમાચાર/પ્રજેશ શંકર/સુનીત નિગમ

હિન્દુસ્થાન સમાચાર / ડો.હિતેશ એન.વ્યાસ