મેલબર્ન, નવી દિલ્હી, 13 ઓક્ટોબર (હિ.સ.). ઓસ્ટ્રેલિયાની પાંચ વખતની વિશ્વ કપ વિજેતા કેપ્ટન મેગ લેનિંગ આગામી મહિલા બિગ બેશ લીગની 12મી સિઝનમાં મેલબર્ન સ્ટાર્સની કપ્તાની કરતી જોવા મળશે. એનાબેલ સધરલેન્ડે બે સિઝન સુધી ટીમનું નેતૃત્વ કર્યા પછી કપ્તાની છોડવાનો નિર્ણય કર્યો છે. તે હવે પોતાની રમત, ખાસ કરીને બેટિંગ અને બોલિંગ પર વધુ ધ્યાન કેન્દ્રિત કરવા માંગે છે.

લેનિંગે છેલ્લી વાર 2023માં મેલબર્ન સ્ટાર્સની કપ્તાની કરી હતી. ત્યારબાદ તેમણે ટીમની કમાન સધરલેન્ડને સોંપી દીધી હતી. હવે તે ફરીથી નેતૃત્વની જવાબદારી સંભાળશે. મેલબર્ન સ્ટાર્સ અત્યાર સુધી મહિલા બિગ બેશ લીગનો ખિતાબ જીતી શકી નથી અને આ સિઝનમાં ટીમની નજર પહેલી ટ્રોફી પર હશે.

સોમવારે 25 વર્ષની થયેલી સધરલેન્ડે ગત સિઝનમાં મેલબર્ન સ્ટાર્સને બીજી વાર લીગની ફાઇનલમાં પહોંચાડી હતી. જોકે, ઓસ્ટ્રેલિયાના આંતરરાષ્ટ્રીય ખેલાડીઓ માટે આ વખતે કાર્યક્રમ ઘણો વ્યસ્ત છે. ઓસ્ટ્રેલિયન ટીમ એપ્રિલના મધ્ય સુધી ન્યુઝીલેન્ડ સામે બે શ્રેણીઓની યજમાની કરશે અને શ્રીલંકા, ભારત તથા દક્ષિણ આફ્રિકાનો પ્રવાસ પણ કરશે. આવા સંજોગોમાં સધરલેન્ડે પોતાની જવાબદારીઓ ઓછી કરીને મેદાન પરના પ્રદર્શનને પ્રાથમિકતા આપવાનો નિર્ણય કર્યો છે.

ટીમના નવા મુખ્ય કોચ રિચાર્ડ પાયરાહે સધરલેન્ડના નિર્ણયની પ્રશંસા કરી. તેમણે કહ્યું, “એનાબેલ માટે એ ઓળખવું કે ટીમના હિતમાં તેમણે પોતાના પ્રદર્શન પર ધ્યાન કેન્દ્રિત કરવું જોઈએ અને કપ્તાનીમાંથી હટી જવું જોઈએ, તે ખૂબ જ હિંમત અને નમ્રતાની વાત છે. તેમના માટે કપ્તાનીનું પદ જાળવી રાખવું અને આગળ વધતા રહેવું સરળ વિકલ્પ હોત, પરંતુ તેમનો આ નિર્ણય તેમના વ્યક્તિત્વ વિશે ઘણું બધું કહે છે.”

પાયરાહે કહ્યું કે આ સિઝનમાં સધરલેન્ડનું સર્વશ્રેષ્ઠ પ્રદર્શન જોવા મળશે. તેમણે લેનિંગના નવા અવસરને સ્વીકારવાના વલણની પણ પ્રશંસા કરી. તેમના મતે, આ વખતે લેનિંગ, સધરલેન્ડ અને કિમ ગર્થ મળીને નેતૃત્વની જવાબદારી વહેંચશે. ટીમનો લક્ષ્ય એવું વાતાવરણ બનાવવાનો છે, જ્યાં ખેલાડીઓ આનંદ સાથે રમે અને યોગ્ય રીતે જીત હાંસલ કરે.

ગત સિઝનમાં લેનિંગનું શાનદાર પ્રદર્શન

ગત સિઝનમાં મેલબર્ન સ્ટાર્સને ટોચના ચારમાં પહોંચાડવામાં લેનિંગની મહત્વની ભૂમિકા રહી હતી. તેમણે 479 રન બનાવીને લીગમાં સૌથી વધુ રન બનાવનાર બેટ્સમેનનું સ્થાન હાંસલ કર્યું હતું. આંતરરાષ્ટ્રીય ક્રિકેટમાંથી નિવૃત્તિ લીધા પછી પણ તે નેતૃત્વની ભૂમિકાઓમાં સક્રિય રહી છે. તે મહિલા પ્રીમિયર લીગમાં કપ્તાની કરી ચૂકી છે અને આ વર્ષે હન્ડ્રેડ સ્પર્ધામાં મેન્ચેસ્ટર સુપર જાયન્ટ્સનું નેતૃત્વ પણ કર્યું.

લેનિંગે કહ્યું, “ફરીથી કપ્તાની કરવી મારી યોજનામાં નહોતું, પરંતુ હું ટીમને જીત અપાવવામાં મદદ કરવા માટે તે જ કરવા માંગુ છું જે તેના માટે શ્રેષ્ઠ હોય. વરિષ્ઠ ખેલાડીઓ તરીકે અમે આ વિશે ચર્ચા કરી છે કે સંપૂર્ણ જવાબદારી કોઈ એક વ્યક્તિ પર છોડવાને બદલે અમે મળીને ટીમનું નેતૃત્વ કેવી રીતે કરી શકીએ.”

તેમણે કહ્યું, “અમે દરેક ખેલાડી પાસેથી તેનું સર્વશ્રેષ્ઠ પ્રદર્શન કરાવવા માંગીએ છીએ અને અમને લાગે છે કે આવું કરવાનો આ સૌથી સારો રસ્તો છે. તેથી હું આ જવાબદારી લેવા માટે તૈયાર છું.”

સધરલેન્ડ નેતૃત્વ જૂથનો ભાગ બની રહેશે

સધરલેન્ડને સત્તાવાર રીતે નેતૃત્વનું કોઈ પદ આપવામાં આવશે નહીં, પરંતુ તે લેનિંગ માટે સલાહકારની ભૂમિકામાં બની રહેશે. આ વર્ષે ઇંગ્લેન્ડમાં ઓસ્ટ્રેલિયાને સાતમો ટી-20 વિશ્વ કપ ખિતાબ અપાવવામાં પણ સધરલેન્ડે યોગદાન આપ્યું હતું.

તેમણે કહ્યું, “ગત બે સિઝનમાં સ્ટાર્સની કપ્તાની કરવી મને ખૂબ ગમ્યું. હું આ સિઝનમાં પણ નેતૃત્વ કરવાનું ચાલુ રાખવા અને આ ક્ષેત્રમાં મારા કૌશલ્યોને વિકસાવવા માટે ઉત્સુક છું. હું ટીમની સફળતામાં મારું સર્વશ્રેષ્ઠ યોગદાન આપવા માંગુ છું. મને લાગે છે કે નેતૃત્વની જવાબદારી વહેંચવાથી હું બેટ અને બોલ બંનેથી વધુ પ્રભાવ પાડી શકીશ.”

સધરલેન્ડે લેનિંગ પર ભરોસો વ્યક્ત કરતા કહ્યું કે ટીમ સુરક્ષિત હાથોમાં છે, કારણ કે તે રમતને સારી રીતે સમજે છે અને કેપ્ટન તરીકે તેમને ઘણી સફળતા મળી છે.

મેલબર્ન સ્ટાર્સે મહિલા બિગ બેશ લીગની 12મી સિઝન માટે અત્યાર સુધી 12 ખેલાડીઓ સાથે કરાર કર્યો છે. ટીમ પાસે ત્રણ સ્થાન હજુ ખાલી છે. સ્ટાર્સ પોતાના અભિયાનની શરૂઆત 29 ઓક્ટોબરના રોજ કરશે.

મેલબર્ન સ્ટાર્સની જાહેર કરાયેલી ટીમ:

સોફી ડે, ચાર્લી ડીન (ઇંગ્લેન્ડ), કિમ ગર્થ, ડેની ગિબ્સન (ઇંગ્લેન્ડ), મેસી ગિબ્સન, એમી જોન્સ (ઇંગ્લેન્ડ), મેગ લેનિંગ, રાઇસ મેકકેના, ઇન્ડિગો નોબલ, જ્યોર્જિયા પ્રેસ્ટવિજ, જો સેમ્યુઅલ અને એનાબેલ સધરલેન્ડ.

ટીમમાં સામેલ: ચાર્લી ડીન (ઇંગ્લેન્ડ), જો સેમ્યુઅલ.

ટીમમાંથી બહાર: મરિજાન કેપ (દક્ષિણ આફ્રિકા), માયા બુશિયર (સ્ટ્રાઈકર્સ).

કરાર વગરની ખેલાડીઓ: સાશા મોલોની, ઇનેસ મેકકિઓન અને સોફી રીડ.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ