નવી દિલ્હી, 15 ઓક્ટોબર (હિ.સ.). કેન્દ્રીય નાણાં અને કોર્પોરેટ બાબતોના મંત્રી નિર્મલા સીતારમણ એ, ગુરુવારે બેંગકોકમાં યુકેના ચાન્સેલર ઓફ ધ એક્સચેકર જ્હોન હીલી સાથે મુલાકાત કરી. આ દરમિયાન બંને નેતાઓએ અનેક મહત્વપૂર્ણ મુદ્દાઓ પર ચર્ચા કરી. નાણાં મંત્રાલયે સોશિયલ મીડિયા પ્લેટફોર્મ 'એક્સ' પર જારી કરેલા એક નિવેદનમાં જણાવ્યું કે સીતારમણ એ થાઈલેન્ડની રાજધાની બેંગકોકમાં આઈએમએફ-વિશ્વ બેંકની વાર્ષિક બેઠકો દરમિયાન યુકેના ચાન્સેલર ઓફ ધ એક્સચેકર, જ્હોન હીલી સાથે મુલાકાત કરી. આ દરમિયાન સીતારમણ એ અગાઉના 'આર્થિક અને નાણાકીય સંવાદ'ના પરિણામોને આગળ વધારતા, ચોથા 'ભારત-યુકે નાણાકીય બજાર સંવાદ', ફિનટેક બેઠકો અને તેનાથી સંબંધિત આઈયુકેએફપી બેઠકોના સફળ સમાપ્તિ પર પણ ચર્ચા કરી.

મંત્રાલયના જણાવ્યા અનુસાર, આ બેઠકમાં નાણાં મંત્રી સીતારમણ એ સામાન્ય પ્રાથમિકતાઓ અને એક રચનાત્મક તથા સમાવેશી જી-20 પ્રક્રિયાની દિશામાં યુકે સાથે મળીને કામ કરવાના ભારતના સંકલ્પને પુનરાવર્તિત કર્યો. સાથે જ સીતારમણ એ તેમને એ પણ જણાવ્યું કે ભારત 14મા આર્થિક અને નાણાકીય સંવાદ (ઈએફડી) ને લઈને ઉત્સુક છે, જેમાં મહત્વપૂર્ણ ખનિજો, ગ્રીન ટેક અને શહેર-ક્ષેત્ર ભાગીદારીઓમાં સહયોગનો પ્રસ્તાવ છે. બંને પક્ષોએ પુષ્ટિ કરી કે આગામી ઈએફડી આ વર્ષે ડિસેમ્બરમાં આયોજિત કરવામાં આવશે.

આ પહેલા સીતારમણ, ગુરુવારે બેંગકોકના સુવર્ણભૂમિ હવાઈ મથકે પહોંચતા થાઈલેન્ડમાં ભારતના રાજદૂત પુનીત અગ્રવાલે તેમનું સ્વાગત કર્યું. આ સાથે જ થાઈલેન્ડ સરકારના નાણાં મંત્રાલય હેઠળના ટ્રેઝરી વિભાગના ઉપ મહાનિર્દેશક રુએચા વરાટોર્ન એ પણ સીતારમણનું સ્વાગત કર્યું.

ઉલ્લેખનીય છે કે, કેન્દ્રીય નાણાં મંત્રી નિર્મલા સીતારમણ બેંગકોકમાં આઈએમએફ-વિશ્વ બેંકની વાર્ષિક બેઠકોમાં ભાગ લેવા માટે ત્રણ દિવસીય પ્રવાસે છે. આ ઉપરાંત તેઓ જી20 અને જી-7 ના નાણાં મંત્રીઓ તથા કેન્દ્રીય બેંક ગવર્નરો (એફએમસીબીજી) ની બેઠકોમાં ભાગ લેશે, અને અનેક દેશો તથા સંગઠનો સાથે દ્વિપક્ષીય બેઠકો પણ કરશે.

હિન્દુસ્થાન સમાચાર / પ્રજેશ શંકર / અમરેશ દ્વિવેદી

હિન્દુસ્થાન સમાચાર / માધવી વ્યાસ