- કચ્છની આરાધ્ય દેવી મા આશાપુરાના ચરણોમાં શ્રદ્ધા સાથે શીશ ઝૂકાવી માતાજીની આરતી ઉતારી; દેશની સુખાકારી, શાંતિ અને સમૃદ્ધિ માટે કરી પ્રાર્થના.

કચ્છ, 17 ઓક્ટોબર (હિ.સ.) : કચ્છની પવિત્ર ધરતી પર નવરાત્રિના પાવન દિવસોમાં ભક્તિ, આસ્થા અને શક્તિ ઉપાસનાનો માહોલ છવાયો છે. આ ધાર્મિક ઉત્સાહ વચ્ચે લખપત તાલુકામાં આવેલા કચ્છના સુપ્રસિદ્ધ યાત્રાધામ માતાના મઢ ખાતે દેશદેવી મા શ્રી આશાપુરાના દર્શનાર્થે રાજકીય અગ્રણીઓ અને ભાજપના કાર્યકરો પહોંચ્યા હતા. પ્રદેશ ભાજપ સંગઠન મહામંત્રી રત્નાકરજી તથા ગુજરાત સરકારના રાજ્યમંત્રી ત્રિકમભાઈ છાંગા સહિત ભાજપના કાર્યકરોએ માતાજીના પવિત્ર મંદિર ખાતે શીશ ઝૂકાવી આશીર્વાદ પ્રાપ્ત કર્યા હતા.

નવરાત્રિ દરમિયાન માતાના મઢમાં વિશેષ ધાર્મિક માહોલ જોવા મળે છે. કચ્છ સહિત ગુજરાત અને દેશના વિવિધ વિસ્તારોમાંથી મોટી સંખ્યામાં શ્રદ્ધાળુઓ મા આશાપુરાનાં દર્શન કરવા ઉમટે છે. માતાજી પ્રત્યેની અખૂટ શ્રદ્ધા અને આસ્થાના કારણે આ યાત્રાધામનું ધાર્મિક મહત્ત્વ વિશેષ છે. ભક્તો અહીં પોતાની મનોકામનાઓ પૂર્ણ થાય અને જીવનમાં સુખ-સમૃદ્ધિ આવે તેવી ભાવના સાથે માતાજીના ચરણે પ્રાર્થના કરે છે.

માતાના મઢ ખાતે પહોંચેલા પ્રદેશ ભાજપ સંગઠન મહામંત્રી રત્નાકરજી, રાજ્યમંત્રી ત્રિકમભાઈ છાંગા તથા અન્ય કાર્યકરોએ મા આશાપુરાનાં દર્શન કરીને ધાર્મિક વિધિમાં ભાગ લીધો હતો. આ પ્રસંગે માતાજીની આરતી ઉતારી ભક્તિભાવપૂર્વક પૂજન કરવામાં આવ્યું હતું. મંદિરના પવિત્ર વાતાવરણમાં માતાજી પ્રત્યેની શ્રદ્ધા વ્યક્ત કરતાં ઉપસ્થિત અગ્રણીઓએ સમગ્ર દેશના કલ્યાણ, નાગરિકોની સુખાકારી અને સમાજમાં શાંતિ તથા સદભાવના જળવાઈ રહે તે માટે પ્રાર્થના કરી હતી.

મા આશાપુરા કચ્છવાસીઓની આસ્થાનું મુખ્ય કેન્દ્ર છે. માતાજીના આશીર્વાદથી જીવનમાં આવતી મુશ્કેલીઓ દૂર થાય અને નવી આશા તથા હકારાત્મક ઊર્જાનો સંચાર થાય તેવી શ્રદ્ધા ભક્તોના હૃદયમાં વસેલી છે. નવરાત્રિ જેવા શક્તિ આરાધનાના પર્વે માતાજીનાં દર્શનનું વિશેષ મહત્ત્વ હોવાથી યાત્રાધામમાં ભક્તિનો અનોખો રંગ જોવા મળે છે.

આ પાવન અવસરે મા આશાપુરા સૌના જીવનમાં સુખ, શાંતિ, સમૃદ્ધિ અને ઉત્તમ આરોગ્ય અર્પે, દેશ પ્રગતિના પંથે આગળ વધે તથા સૌની મનોકામનાઓ પૂર્ણ થાય તેવી ભાવપૂર્વક પ્રાર્થના કરવામાં આવી હતી. માતાજીના આશીર્વાદ સાથે નવરાત્રિ પર્વની શ્રદ્ધા અને ભક્તિમય ઉજવણીનો સંદેશ પણ પ્રસરી રહ્યો છે.

---------------

હિન્દુસ્થાન સમાચાર / Rohit Ramjibhai Padhiyar