નવી દિલ્હી, 18 ઓક્ટોબર (હિ.સ.). કેન્દ્રીય ઔદ્યોગિક સુરક્ષા દળ (સીઆઈએસએફ), 1 નવેમ્બરથી તેના વહીવટી અને સંચાલન માળખામાં ફેરફાર કરશે. કેન્દ્રીય ગૃહ મંત્રાલયે તેને મંજૂરી આપી દીધી છે. તેનો ઉદ્દેશ્ય મહત્વપૂર્ણ માળખાકીય સુવિધાઓ અને વ્યૂહાત્મક સંસ્થાઓની સુરક્ષા વ્યવસ્થાને વધુ વિશિષ્ટ અને અસરકારક બનાવવાનો છે.

દળ ઔદ્યોગિક ક્ષેત્રો અનુસાર સેક્ટરનું પુનર્ગઠન કરશે. આમાં ઉદ્યોગો અને સંસ્થાઓની સુરક્ષા જરૂરિયાતોનું ધ્યાન રાખવામાં આવશે. આમાં વીજળી, કોલસો, સ્ટીલ, પેટ્રોલિયમ અને કુદરતી ગેસ, બંદર, સરકારી ઇમારતો, સંગ્રહાલયો, સ્મારકો અને જાહેર પરિવહન પ્રણાલીનો સમાવેશ થાય છે.

સીઆઈએસએફ અનુસાર, નવી વ્યવસ્થાથી સંચાલન દેખરેખ સુધરશે અને વિવિધ ક્ષેત્રોમાં વિશેષજ્ઞતા વિકસિત થશે. સુરક્ષા પ્રક્રિયાઓમાં એકરૂપતા આવશે. સંબંધિત મંત્રાલયો, વિભાગો અને સંસ્થાઓના મેનેજમેન્ટ સાથે સંકલન મજબૂત થશે.

દિલ્હી સેક્ટર સરકારી ઇમારતો, સંગ્રહાલયો અને જાહેર પરિવહન પ્રણાલીની સુરક્ષા સંભાળશે. તેને સરકારી ભવન, સંગ્રહાલય અને સ્મારક તથા જન પરિવહન પ્રણાલી (જીબીએમએમ અને એમઆરટીએસ) સેક્ટર બનાવવામાં આવશે. વીજળી ક્ષેત્ર માટે બે સેક્ટર બનાવવામાં આવશે. ઉત્તરીય ક્ષેત્ર (નવી દિલ્હી) અને ઉત્તર પૂર્વીય ક્ષેત્ર-II (કોલકતા) ને અનુક્રમે વિદ્યુત-I અને વિદ્યુત-II ક્ષેત્રો તરીકે પુનર્ગઠિત કરવામાં આવ્યા છે.

કોલસા અને સ્ટીલ ક્ષેત્ર માટે અલગ સેક્ટર હશે. આમાં રાંચી સ્થિત પૂર્વીય સેક્ટરને કોલસા સેક્ટર બનાવવામાં આવશે. ભિલાઈ સ્થિત કેન્દ્રીય સેક્ટરને સ્ટીલ સેક્ટરમાં બદલવામાં આવશે. ગુવાહાટી સ્થિત પૂર્વોત્તર સેક્ટરને પેટ્રોલિયમ અને કુદરતી ગેસ સેક્ટર બનાવવામાં આવશે. મુંબઈ સ્થિત પશ્ચિમી સેક્ટરને પશ્ચિમી તટ બંદર અને ચેન્નઈ સ્થિત દક્ષિણી સેક્ટરને પૂર્વીય તટ બંદર સેક્ટરમાં બદલવામાં આવશે.

આ ઉપરાંત, બેંગલુરુ સ્થિત પરમાણુ ઊર્જા વિભાગ અને અવકાશ વિભાગ (ડીએઈ અને ડીઓએસ) સેક્ટર પહેલાની જેમ કાર્યરત રહેશે. નવી દિલ્હી સ્થિત એરપોર્ટ સેક્ટર-એક અને બેંગલુરુ સ્થિત એરપોર્ટ સેક્ટર-બે ની હાલની કાર્યાત્મક વ્યવસ્થા પણ ચાલુ રહેશે.

ઉલ્લેખનીય છે કે, અગાઉ સીઆઈએસએફની વહીવટી અને સંચાલન દેખરેખ મુખ્યત્વે ભૌગોલિક ક્ષેત્રોના આધારે થતી હતી. છેલ્લા 25 વર્ષોમાં, દળે ઉડ્ડયન અને પરમાણુ ઊર્જા તેમજ અવકાશ વિભાગ સાથે સંકળાયેલા વ્યૂહાત્મક સંસ્થાઓ સહિત કેટલાક ક્ષેત્રોમાં કાર્યાત્મક વ્યવસ્થા અપનાવી છે.

હિન્દુસ્થાન સમાચાર / અનૂપ શર્મા / સંજીવ પાશ

હિન્દુસ્થાન સમાચાર / માધવી વ્યાસ