નવી દિલ્હી, 18 ઓક્ટોબર (હિ.સ.). કોંગ્રેસના મહાસચિવ જયરામ રમેશે, રાજકીય પક્ષોને સર્ચેબલ ફોર્મેટમાં મતદાર યાદીઓ આપવાના નિર્ણય પર કેન્દ્ર સરકાર અને ચૂંટણી પંચ પર નિશાન સાધ્યું છે.

તેમણે આરોપ લગાવ્યો કે, કોંગ્રેસ અને લોકસભામાં વિરોધ પક્ષના નેતા રાહુલ ગાંધી છેલ્લા બે વર્ષથી આ માંગ કરી રહ્યા હતા, પરંતુ પંચે તેનો સ્વીકાર કર્યો નથી. રમેશે મુખ્ય ચૂંટણી કમિશનર જ્ઞાનેશ કુમારના રાજીનામાની માંગણીનો પુનરોચ્ચાર કર્યો અને મતદાર યાદીઓના સ્પેશિયલ સમરી રિવિઝન (એસએસઆર) ને તાત્કાલિક રોકવા અને ચૂંટણી પંચની માહિતી ટેકનોલોજી સિસ્ટમમાં વ્યાપક ફેરફારોની માંગ કરી.

રવિવારે, જયરામ રમેશે સોશિયલ મીડિયા પ્લેટફોર્મ એક્સ પર જણાવ્યું હતું કે, ચૂંટણી પંચે 15 ઓક્ટોબરના રોજ એક આદેશ જારી કર્યો હતો, જેમાં 17 રાજ્યો અને કેન્દ્રશાસિત પ્રદેશોમાં બે વર્ષના અંતરાલ પછી શરૂ થયેલા સ્પેશિયલ સમરી રિવિઝન (એસએસઆર) માટે રાજકીય પક્ષોને સર્ચેબલ ફોર્મેટમાં મતદાર યાદીઓ પ્રદાન કરવાનો નિર્ણય લેવામાં આવ્યો હતો. કોંગ્રેસ લાંબા સમયથી માંગ કરી રહી છે કે, તમામ રાજકીય પક્ષો આ ફોર્મેટમાં મતદાર યાદી ઉપલબ્ધ કરાવે, પરંતુ પંચે તેને વારંવાર નકારી કાઢ્યું છે.

રમેશે આરોપ લગાવ્યો કે, કોંગ્રેસ પાર્ટી દ્વારા મધ્યપ્રદેશમાં કથિત નકલી મતદારોનો મુદ્દો ઉઠાવ્યા બાદ 2018 માં ચૂંટણી પંચે શોધી શકાય તેવી મતદાર યાદીઓ આપવાનું બંધ કરી દીધું હતું. આનાથી રાજકીય પક્ષો માટે મતદાર યાદી ચકાસવી મુશ્કેલ બની ગઈ અને કથિત ચૂંટણી છેતરપિંડી છુપાવવા માટે સિસ્ટમનો ઉપયોગ કરવામાં આવ્યો.

રમેશે કહ્યું કે, મુખ્ય ચૂંટણી કમિશનરે ચૂંટણી પંચમાં જનતાનો વિશ્વાસ પુનઃસ્થાપિત કરવા માટે રાજીનામું આપવું જોઈએ. તેમણે ઉમેર્યું કે, માત્ર તેમના રાજીનામાથી સમસ્યાનો ઉકેલ આવશે નહીં, પરંતુ ચૂંટણી પંચ અને તેની માહિતી ટેકનોલોજી સિસ્ટમમાં વ્યાપક સુધારાની જરૂર છે. તેમણે SIR ને તાત્કાલિક સસ્પેન્ડ કરવાની પણ માંગ કરી.

હિન્દુસ્થાન સમાચાર / પ્રશાંત શેખર / અનુપ શર્મા

હિન્દુસ્થાન સમાચાર / માધવી વ્યાસ