નવી દિલ્હી, 18 ઓક્ટોબર (હિ.સ.). મધ્ય પ્રદેશના ગ્વાલિયરમાં થયેલા માર્ગ અકસ્માત પર રાષ્ટ્રપતિ દ્રૌપદી મુર્મુ, ઉપરાષ્ટ્રપતિ સીપી રાધાકૃષ્ણન અને વડાપ્રધાન નરેન્દ્ર મોદીએ ઊંડો શોક વ્યક્ત કર્યો છે. તેમણે આ ભયાનક દુર્ઘટનામાં જીવ ગુમાવનારા લોકોના પરિવારો પ્રત્યે ઊંડી સંવેદના વ્યક્ત કરી. વડાપ્રધાને પીએમએનઆરએફ માંથી મૃતકોના પરિવારોને 2-2 લાખ રૂપિયાની અનુગ્રહ રાશિ અને ઘાયલોને 50-50 હજાર રૂપિયા આપવાની જાહેરાત કરી.

રાષ્ટ્રપતિ મુર્મુએ એક્સ પર લખ્યું, મધ્ય પ્રદેશના ગ્વાલિયરમાં થયેલા માર્ગ અકસ્માતમાં લોકોના જીવ ગુમાવ્યાના સમાચાર હૃદયદ્રાવક છે. હું શોકગ્રસ્ત પરિવારો પ્રત્યે મારી ઊંડી સંવેદના વ્યક્ત કરું છું અને ઘાયલો ઝડપથી સ્વસ્થ થાય તેવી પ્રાર્થના કરું છું.

વડાપ્રધાન મોદીએ કહ્યું કે, મધ્ય પ્રદેશના ગ્વાલિયરમાં થયેલા અકસ્માતમાં લોકોના જીવ ગુમાવ્યાના સમાચારથી ખૂબ દુઃખ થયું. શોકગ્રસ્ત પરિવારો પ્રત્યે તેમની સંવેદનાઓ. ઘાયલો ઝડપથી સ્વસ્થ થાય તેવી કામના કરીએ છીએ. તેમણે કહ્યું કે, વડાપ્રધાન રાષ્ટ્રીય રાહત કોષ (પીએમએનઆરએફ) માંથી જીવ ગુમાવનારાઓના પરિવારોને 2-2 લાખ રૂપિયાની અનુગ્રહ રાશિ આપવામાં આવશે. ઘાયલોને 50-50 હજાર રૂપિયા આપવામાં આવશે.

ઉલ્લેખનીય છે કે, મધ્ય પ્રદેશના ગ્વાલિયરમાં શીતળા માતા મંદિર પાસે શનિવાર-રવિવારની મધ્યરાત્રિએ સપ્તમી પર શીતળા માતાના દર્શન કરવા પહોંચેલા શ્રદ્ધાળુઓ પર અડધી રાત પછી કાળ બનીને તૂટી પડેલો તેજ ગતિનો ટ્રક ચીનોર રોડના ઢાળ પર અનિયંત્રિત થઈને પોલીસના સ્ટોપર (અવરોધક) તોડતો શ્રદ્ધાળુઓ, દુકાનો અને મંદિરના પ્રવેશદ્વાર સાથે અથડાયો. ટક્કરથી દીવાલ ધરાશાયી થઈ ગઈ અને ઘણા લોકો કાટમાળમાં દટાઈ ગયા. માર્ગ અકસ્માતમાં 13 લોકોના મોતની પુષ્ટિ થઈ છે, જ્યારે 29 લોકો ઘાયલ છે. તેમાંથી સાતની હાલત ગંભીર જણાવાઈ છે. મૃતકોમાં મહિલાઓ, બાળકો અને વૃદ્ધો પણ સામેલ છે.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / માધવી વ્યાસ