- ૧૨૫થી વધુ ગ્રામજનોએ વિનામૂલ્યે તબીબી સેવાનો લાભ લીધો

ગાંધીનગર, 18 ઓક્ટોબર (હિ.સ.) : નેશનલ સિક્યુરિટી ગાર્ડ (NSG)ના સ્થાપના દિવસ નિમિત્તે ગાંધીનગર નજીક આવેલા લેકાવાડા ગામ ખાતે ગ્રામજનો માટે એક વિશાળ અને સફળ મેડિકલ કેમ્પનું આયોજન કરવામાં આવ્યું હતું. NSG અને તેમની સમગ્ર ટીમ દ્વારા અત્યંત સરાહનીય અને સમર્પિત ભાવથી આ કેમ્પનું સંચાલન કરવામાં આવ્યું હતું.

ગામના ગરીબ અને જરૂરિયાતમંદ લોકોને ઘરઆંગણે ગુણવત્તાયુક્ત તબીબી સેવાઓ મળી રહે તે હેતુથી યોજાયેલા આ કેમ્પમાં ૧૨૫ જેટલા ગ્રામજનોએ ઉત્સાહભેર ભાગ લીધો હતો. આ પ્રસંગે જીએમઈઆરએસ (GMERS) સિવિલ હોસ્પિટલ, ગાંધીનગરના તબીબી અધિક્ષક ડો. મીતા પરીખના માર્ગદર્શન હેઠળ વિવિધ વિભાગના નિષ્ણાત તબીબો, તબીબી સ્ટાફ અને સેન્ટ્રલ સર્વિસ લેબોરેટરીની ટીમે સક્રિય સેવાઓ આપી હતી.

કેમ્પ દરમિયાન નિષ્ણાત ડોક્ટરો દ્વારા દર્દીઓની સઘન તપાસ કરવામાં આવી હતી. જેમાંથી ૭૫ જેટલા લોકોના રક્તના નમૂના લઈ રૂટીન તેમજ વિશેષ લેબોરેટરી તપાસ જેવી કે RBS, LFT, RFT, થાયરોઈડ, વિટામિન B12, વિટામિન D3 અને ઈલેક્ટ્રોલાઈટ્સના ટેસ્ટ કરવામાં આવ્યા હતા. આ ઉપરાંત જરૂરિયાતમંદ દર્દીઓને સ્થળ પર જ વિનામૂલ્યે જરૂરી દવાઓનું વિતરણ પણ કરવામાં આવ્યું હતું.

આ સફળ આયોજન પાછળ ડૉ. મીતા પરીખનું કુશળ આયોજન અને નેતૃત્વ, વિવિધ વિભાગોના ફેકલ્ટી ડૉક્ટરોની નિષ્ણાત સેવા, સેન્ટ્રલ સર્વિસ લેબોરેટરીની ટીમની ચોકસાઈ અને સમયબદ્ધ કામગીરી તેમજ નર્સિંગ ટીમની દર્દીકેન્દ્રિત સેવા પ્રશંસનીય રહી હતી. દરેક સભ્યએ પોતાની જવાબદારી નિષ્ઠા, સમર્પણ અને સેવાભાવથી નિભાવીને કેમ્પને સફળ બનાવ્યો હતો.

સ્થાનિક ગ્રામજનોએ NSG ટીમ અને સિવિલ હોસ્પિટલના તબીબોની આ માનવતાવાદી પહેલને બિરદાવી આભાર વ્યક્ત કર્યો હતો.

---------------

હિન્દુસ્થાન સમાચાર / અભિષેક બારડ